Trick or Treat 2013

又到萬聖節了，而家上左小學，學校再無halloween party了！唯一有得扮野就係趁屋苑搞party囉。好彩每年屋苑都有搞，以前妹妮仲細無參加，成日聽到樓下一大班細路we wa 鬼叫去trick or treat都覺得好過癮。舊年妹妮開始參加，又真係幾好玩噃！我地見有d兩，三歲都玩，覺得自己太嚴謹了，瞓晏一晚半晚其實無咩所謂啫！點解之前無諗過比妹妮去玩呢？今年我地一樣報名參加

點知party前兩日，同學仔Sophia 媽咪邀請我地去佢地個clubhouse果邊既party，妹妮幼稚園最friend就係Sophia，比佢地一齊玩一定更開心，於是二話不說就過去玩！

妹妮扮tea party princess，Sophia 扮Alice in the wonderland。兩個襯到絕！

因為屋苑較大型，個function hall都大好多！我地果邊就係function room 玩，呢邊就係hall。但係我地果邊好cozy，其實都好好玩，呢邊就'空曠'd。第一個節目去左整巫師帽先！

整好喇！戴起都幾靚噃！！不過頭圍可能唔係好啱，好易跌呀

之後我地去左排隊畫花面，妹妮最鐘意畫花臉，次次有呢個counter佢都唔會錯過

排緊隊既細路又差唔多，排排下就傾埋一份研究邊個花靚D

今次有D特別小小既花，唔係淨係蝴蝶，花花，有恐龍，仲有一個係條鯊魚，當你一擘大口就好似鯊魚擘大口一樣！

呢個BB戴起afro head都好搞笑！

都係玩下啫，但係兩個研究左好耐呀！

首先Sophia去左噴花

妹妮去左畫花，妹妮揀黎揀去都係要靚果D，所以唔會揀下鯊魚，恐龍果D

之後再噴埋另一邊臉

呢個時候，佢開始肚餓了。。。想埋去搵野食

到Sophia都畫晒兩邊，可以去玩喇！

幾有型！點知係妹妮畫緊臉既時候，居然大抽獎果邊叫妹妮個號碼！於是由媽me代上台領獎

既然咁好彩，係lego iron man 公仔，就兩份分啦！！

抽埋獎後，我地一齊上樓上參觀鬼屋

其實Sophia 都話驚唔敢入鬼屋，不過舊年妹妮去完我地屋苑樓下個鬼屋，初初都擔心妹妮會驚到喊，點知同佢一齊入去，佢只係尖叫，又好似一D都唔驚咁！

兩個表情多多

聽見從鬼屋出黎既人都話好驚，搞到佢兩個都有小小縮沙，但係我話陪佢地一齊入，唔駛驚啦！點知原來每次只准一組人入，於是我地3個拖住行，都未轉彎，已唔見左妹妮，即刻返轉頭搵佢，原來佢驚到走返轉頭，仲一味尖叫好驚好驚。唔肯再行，Sophia本來都驚，所以一齊走返出去。連個收票secure 叔叔都話嚇到咁驚咁慘，比返張入場卷我地

無鬼屋唯有返樓下玩攤位遊戲啦，今次玩踢拖鞋

但係兩個妹子都唔識踢！只係踢到兩，三個身位

踢完拖鞋妹妮又走去攞野食，本來夠鐘要上去trick or treat，檔攤都打算收檔，但係個secure叔叔認得我地，話比夾小食個姐姐聽兩個細路入鬼屋驚到返轉頭，叫個姐姐夾多D食物比我地，真搞笑！

今年去左對面屋苑，好彩同我地果邊一樣有上門敲門trick or treat!! 不過係D鄰居無個識囉。

呢邊都好多細路參加，所以都好浩浩盪盪架！

個個攞到糖就好開心！

妹妮攝到個靚位攞糖呀！

睇下大家都有收穫，幾豐富！

我地洗樓分成4隊，再按不同次序輪流洗左4,5個單位

攞晒糖後我地同Sophia，仲有家姐同家姐個朋友仔影下合照

呢兩張相好鐘意呀！佢地擺好晒甫士咁，正呀！

散隊前大家返到接待處攞埋最後幾粒糖

呢個表情係咪嫌自己唔夠多糖呢？

臨走前再show hand, show off自己收穫

玩完一晚，肥妹妮盡興回家去！

開心上學

不經不覺妹妮已經升上小兩個月了，我同爸B最擔心都係佢適唔適應到新學校，新模式。妹妮自己一直好期待升小一，因為可以係學校食飯喎。頭一個月時妹妮話每日有兩個大姐姐帶住4個同學仔一齊小息，所以小息都有伴一齊食下小食。妹妮話都好鐘意間學校，但係一個月過後，無左大姐姐帶住，妹妮就話小息時得自己一個。我地問點解唔搵返d同學仔呀？妹妮話因為排隊排最後，落到操場D人散晒就搵唔返，自己一個企埋一邊食野。於是提議佢約實朋友仔係某個地方等啦，又鼓勵下佢同人搭訕啦，其實我覺得搭訕無壞吖，當識多個朋友囉，就算人地唔睬你，其實都無損失既。跟住咁啱去完朋友仔生日會，夾左好多棉花糖，妹妮就帶左返學請同學食。點知居然由零食呢招勝出！佢帶棉花糖果日就有成十個同學仔一齊玩，據妹妮講，自此以後佢地每日都成十個朋友仔一齊玩，仲有其他班同學仔都玩埋一齊架！

聽到佢返學返得開心番，爸媽就最安心。上個月家長日我地去到學校，見到壁佈上有好多相都有妹妮份架。

睇佢唱歌個口擘得幾大，真係好投入咁呀

睇書都好似好專心噃,  開學初期老師話妹妮平時都好靜，對住同學好小小，可能未適應新環境。對老師就好靜，要點名叫佢先肯細細聲講野。不過幾個星期後老師話妹妮已經開始會舉手爭答問題了。我地問妹妮點解係學校唔講野呀？佢話因為唔想講喎，因為講野好嘈咁話。。。但係佢平時好多野講噃！妹妮話淨係鐘意同爸B媽me講。。。比佢吹漲！！最近點解又肯舉手？因為識答咪舉手囉！！相信係熟左個環境，個膽大番D就真！

媽me好好彩抽中去做家長義工，每星期可以去學校幫手派飯一次，雖然唔係去妹妮班，但係都有機會裝到妹妮。佢每次食飯都慢吞吞，幸好多數都食得晒。。。最騎呢係唔知幾時開始佢既poo poo時間改左係午飯後，每次午飯之後都要去廁所坐一陣至得 -_- 我地急忙要教佢點自己抺pat pat，而家小學d 嬸嬸唔幫你抺架喇！

開頭最唔慣就係每日都有4,5樣功課，有時無啦啦單日都有7樣，做到好晏！但暫時都可以堅持8:30上床，因為第朝6:30就要起身喇。其實學校有功課堂，通常小朋友都做到一，兩份功課。同學們食完飯就開始拎功課做，但妹妮又走左去poo poo，加上個人me me摩摩手腳又慢，居然有時一份都無做要全部返屋企做。有次突然有成7樣功課，妹妮做到喊呀！唯一令妹妮話唔想返學就係多功課，不過我知有好多學校一日成十樣功課，所以而家都唔算太差了。而且同老師傾過後，好似見到妹妮有進步，每日都係學校做到2份至兩份半功課，見到妹妮逐漸適應了。

尋晚妹妮又講學校心事，佢話返學好開心呀！！仲話第一日返學時心情又緊張又興奮又開心（佢真係講晒呢三個詞語！）又話每次測驗都好緊張，因為想攞高分，又驚自己攞低分。我地叫佢relax D，如果盡左力，就算低分都唔會閙既。暫時開學日子尚短，妹妮都跟得上有餘，再經爸B既培訓，希望可以一直keep住好成績啦。

呢日除左見到妹妮係學校既生活相，從相中都感愛到佢真係好鐘意返學，見到佢係學校生活咁開心，真係好安慰架。希望妹妮繼續努力，做個好學生！