一年一度父親節，前一晚已經同公公慶祝左，正日呢日我地去左飲茶。妹妮呢條裙又係yaya車比佢，yaya將一件朋友送贈既Polo 背心改裝而成，所以有隻Polo馬仔架。不過我又覺得的d顏色同塊花花布都襯得幾好噃！
妹妮呢排鐘意食芝士蝦球伊面 ，不過妹妮話上次去L.A.時食果d好味d，因為係龍蝦，有龍蝦味喎。唔通佢都有睇May姐有請，識講雞有雞味，龍蝦梗係有龍蝦味啦！
尋晚瞓覺時妹妮已經話唔記得畫張咭比爸B，要第朝一早起身畫。呢朝一早起身佢已經衝入房閉關畫畫，又唔比爸B入房，但係出門飲茶前都未畫好，於是返黎nap完又入房畫過。
畫好了！妹妮仲興𡚒過爸B咁既？
因為學校d同學仔好多都留長蔭，而家佢話又唔鐘意有蔭，所以幅畫入面既佢畫到好似光頭一樣！ －＿－
爸B話好耐無行旺角，於是又整裝出發，幫妹妮辮左個Elza 頭，貪靚妹好鐘意呀！
我地搭村巴去到油麻地再行去旺角，妹妮都無點去過旺角架，因為人又多車又多，今次目的地係去女人街呀
一落車即刻買支雪條解下涼先
食到成咀都係
而家呢條街除左擺檔賣野仲有賣藝潻！
但係又無人比＄
其實平時都好小同妹妮行街，就算行多數係行下商場涼下冷氣，呢日去女人街對佢黎講都幾新鮮架！唔好話妹妮，我同爸B都好耐無行過女人街了
呢度多數賣d遊客野，我估本地人都可能小d會黎行
妹妮行得好開心噃
見到得意野不過都無扭買，我見到d黐晒石既電話殻，都幾靚架，不過成＄170個又好似貴左d。
行晒成條女人街，於是趁早唔駛迫人去食晚飯，爸B話要食花園餐廳。細個時都成日同家人去花園餐廳架，lunch尢其抵食。妹妮就食肉醬意粉，爸B同媽me當然据扒啦！
其實晚餐同午餐一模一樣，但係就貴幾十蚊
我地覺得呢度係帶外藉朋友食既好地方，可能係香港呢d港式西餐先會用鐵板上再淋汁，滾到咋咋聲，都幾有特色吖！
賣相都唔錯架，不過鬼佬食扒多數係食扒既肉味，無咁多汁，但係呢種港式食法都我就幾like!
食飽後我地仲去左影貼紙相潻，對上一次影貼紙相都有成十年前了！！呢日見到d cosplay姐姐，妹妮話d裙好靚。我地要訓練妹妮大膽d，於是叫妹妮主動埋去叫d姐姐同佢影相，於是去爭扎左好耐就走埋去細細聲問了。姐姐們都好友善，其實呢d裙比小朋友著仲正，十足十日牌Shirley Temple果d 衫呀！
太耐無影過貼紙相，而家有好多種款揀架！ 我地影左成6個做型，原來影完之後仲有得比你畫下花，寫下字咁！
我地摸左好耐都唔識用，好彩收銀個阿姐好有心機教我地畫咋！
妹妮梗係博晒老命畫都花呢花碌啦
我地不經不覺都搞左成半個鐘架，比＄40 玩左成半個鐘都幾抵呀！
可惜出黎係一張過啦，係畫面睇d色sharp 好多架，出到黎好似fade左d
但係幾十蚊都無咩要求了，妹妮第一張貼紙相就係father's day 影了！
有d close up睇其實好得意架 ！
