Merry Christmas

終於平安夜了，今日一早去又一城買埋最後一份抽獎用禮物，順便買多一份比妹妮。其實諗返起上次去playgroup時已經買了一份，不過送比妹妮就多一份都不算多！今次買了聖誕歌ＣＤ，因為之前已買了一隻，返來聽過才知是鋼琴音樂而已，今次問過時兒歌才買。

今日收到Lewis從美國寄來的聖誕禮物，剛剛在假期前趕到！thank you!!!件外套仔好cute架！

１１：３０去完Giogio Armani試facial massage後就趕返公司開lunch party，無錯，又係公司party，不過今次係老闆要開的，所以大家不用付出（禮物或食物), 食物都係由茶餐廳到會。

６：３０ＰＭ趕返屋企，因為到會都到了。今晚每人一份$150以下聖誕禮物，當然要借來當道具放在聖誕樹底，棵樹終於都像樣了！妹妮都悉心打扮，睇下頭上夾了幾多夾仔！

男士們掛住討論新手機，連爸Ｂ都傾得忘形，妹妮在男人堆中返而識望鏡頭。

今晚有火雞，豬仔骨，雞翼，芒果沙律等，再加壽司同蛋糕。妹妮今年都join埋食嘢...真係好多食物，奇就奇在我們都差不多食得晒所有食物，只剩下鞋霎霎的火雞。不過我們不會浪費，火雞留給煲妹妮的粥仔用。

又有新招式，唔知點解yayaGigi教妹妮‘smell your toes’，妹妮就遞起隻豬腿嗅嗅腳仔。真係唔明ＢＢ的腿力點解咁強，我記得去上yoga時單腳企，另一隻腳都提不到９０度，但妹妮居然可以提起至１５０度！！

其實今日真係有朋友生日，不過他有家室後都無join我們慶祝了，支腊祝由妹妮代吹啦！其實係想妹妮試下吹，因為她學了‘Ｗ for whistle’後識吹風。但今晚她想玩個蛋糕多Ｄ。

抽獎喇!! 每人都有一份, 永不落空, 爸b抽到我在franc franc買的茶壺, 其實自己買時都有暗地裏諗過抽到就好! 我代爸b買的是無印拖鞋毛毯set, 由阿茹抽到.

另外在franc franc買禮物時又順道買了個咖啡壺給yayaGigi, 不過送了後才醒起她用的都是即溶咖啡, 所以個壺都無用. 上年我自製印有妹妮同yayaGigi相片交去相鋪打印在飲水杯, 不過今年懶了, 買現成的算了.

聖誕節同老公在樹下影返張相。

ＰＡＲＴＩＥＳ

最近好忙，schedule排得密麻麻，通常年尾都特別多party，今個星期就更多節目了，有婚禮，有派對。

 

１２月２２日﹣昨晚便去Jack的婚禮。我們有一圍friend，所以好開心。睇到開席前播的video，好感動．．．因為我在幻想妹妮將來出嫁，我一定捨不得，看video時見到她由細到大的片段，我一定會喊到死。哈哈，又來發夢，妹妮而家才一歲多咋！

 

１２月２３日﹣今日公司同事自組派對，是potluck party，我們每人自己負責一樣餸，仲要準備$100內的禮物抽獎。今次買了L'occitant的禮物包...有手霜＋牛奶肥皂=>５號（右下）就係我買的！

 

而餸方面就買了肥牛及金菇，整金菇牛肉卷，煮食物這個重任就要交比yayaGigi。

 

一間房仔企滿13人, 好墟冚!

 

最後自己抽到１３號，都是shower gel， lotion來的。

 

不過有人抽到畜迪士尼腊筆, 相信只有我用得著...最後為了妹妮用shower gel交換了.

冬至

每年冬至我們都要食兩餐, 今年先去嫲嫲家...由於人多勢衆, 我們多數上酒樓的本來一早已經訂好枱, 但日子迫近就開始有人得,有人唔得. 最後鐵定星期五晚去映月樓.

妹妮今次第一次正式參與，因為舊年她仍然手抱咁大。今年可以食小小魚啦，肉啦。

雖然映月樓是一衆做過兄弟姊妹都會去過開餐的, 出奇地今次是我第一次去. 食物都可以的, 但不知是否要慳電, 整晚燈光昏暗...好似去食西餐般有情調 .

第二日第二輪到公公家, 每次公公都是自己煮, 自小過節公公都要在家吃的..即使年年的餸菜都差不多

妹妮去到邊都只要5分鐘warm up, 就可以當自己屋企一樣, 自出自入。今次玩波波（柑），整晚就是拿住兩個柑行來行去，但已逗得大家開心拍手。

早上攝多個節目, 同三藩市回來的auntie Mary及uncle Jimmy飲茶, 今次他們第二次見妹妮, 上次已是妹妮剛滿月時了. 今次再見,妹妮已可穩穩的坐在bb椅上一齊用餐了. 而且識揮手say hi, 飛吻了.

而家妹妮好小肯在網床內玩了，難得今次玩了幾分鐘！

呢張相妹妮好似大個好多呀！

妹妮十四個月大第一次Playgroup

期待一星期，今日帶妹妮去playgroup玩。今次試這個playgroup係散餐班，只要上堂前比錢就得，如果試過唔掂都不用焗住要再去嘛，所以今次當試堂囉。由於今日係特別日子...聖誕party，所以早一個星期已報名了。

第一次返學，咪me同yayaGigi一齊去。本來個名額是爸Ｂ的，他妒忌yayaGigi有得陪妹妮玩而主動話要去，但又因工事未能出席，最後又是由yayaGigi項上。小妹妮終於在十四個月生日後有得‘返學’了！

平時課程有講故事，唱遊，運動，free play等，不過導師話今日party會有點同平時不同。

去到班房門，已經好似公主出巡般周圍打招呼...hello!

入到班房自由活動，這處有好多不同國籍的小朋友，有印巴籍，有日籍，眼見都是由家長陪同的。有好多玩具任玩，妹妮自顧自手執‘屬於’她的玩具行來行去。

設計對白：比呢個你玩啦！咪諗住攞我支手推車呀！

大部份時間妹妮都係拿住自己鐘意的玩具行來行去，而且好固執，就算yayaGigi比另一件玩具，佢都死係要玩自己手執那件。否則即扭計大喊，唉，希望妹妮大些脾氣會轉好些啦！

free play一個鐘後就到snack time，今日party食物全由有份出席的家長們準備...當然無我份，都無人通知要帶食物。不過由於食物都是home made，所以好有住家菜feel。有些家長就買蛋糕，今日仲有home made薯蓉，三文治，焗薯餅，腸仔，炒麵等。妹妮居然最鐘意食noodles，仲食了起碼５口！

之後就輪住同santa影相，又喊喇！

導師好有心機引妹妮注意，先有呢張較果。

同santa影完相就返入班房玩派禮物，其實禮物全是由媽媽們自備的。我就係sign in 時導師才通知有派禮物環節，於是便走去樓下bookstore買份小禮物，等妹妮都可以從santa手中接過禮物囉。

snack time時因導師告之原來只有親屬才可以進入班房，於是yayaGigi只好在門外等。玩了大半堂先知yaya們是不淮進入的，入班房時妹妮見yayaGigi不入班房就喊晒喇。由santa手中攞禮物便無人替我們影相了，而妹妮接過禮物後便立即在咪me懷中呼呼入睡了。

直至已經行到去海港城都仲覺豬緊。

妹妮手執的便是咪me買的小禮物嘞，係沖涼用的小玩意。

california pizza對小朋友都好體貼呢，妹妮最鐘意就係畫畫。

爸Ｂ同妹妮影下一個懷疑妹妮多次望住然後‘嘩...嘩’聲的維港景。

呢張相妹妮好精靈，你睇一雙豆豉眼碌到幾大！

總括今次playgroup經驗，咪me覺得呢個playgroup真係好親子，所有都由家長負責，其實都不錯，係名附其實親子playgroup，亦比到機會家長們交換心得。不過咪me都要返工，本來諗住yayaGigi可以帶妹妮返學，但而定又不能由yayaGigi代勞，可能都只可以間中才參加一次了。

十四個月大喇!

今日妹妮十四個月大喇! 今仲仆到撞到個嘴仔腫晒，流到成口血...慘慘！變了孖膶腸, 心痛死爸Ｂ同咪me了

尋日同爸b帶妹妮去迪士尼興祝, 順便睇下新主題雪亮聖誕. 經過兩個月, 我同爸b都覺得妹妮學多很多, 仲好醒目, 而家見陌生人都會無限量供應飛吻同揮手. 今次就睇下妹妮有無進步, 仲會見到卡通人物就大喊嗎?

去到樂園第一個見到係聖誕老人, 呢個好似架, 因為夠大份同埋係鬼佬, 你知啦, 有些商場是但搵個男人戴個假髪著件紅衫就當聖誕老人嘛. 可能聖誕老人係真人關係, 妹妮都無話好驚, 只係初初會別個臉仔. 不過都成功影到全家幅, 無喊, YEAH!!!

見到bubbles就開心, 樂園有不少聖誕裝飾, 妹妮見到所有圓型物體都不停叫波波...連吊燈都不放過! -_-"

之後都係玩小飛象, 旋轉木馬等. 妹妮都好enjoy, 尢其木馬好似好鍾意玩.

今次睇巡遊, 好似無上次的一嚿飯了, 會拍手,又會同表演人員揮手.

巡遊後, 妹妮開始呆滯...不消幾分鐘就覺覺豬, 我趁時候影下飄雪效果. 此時blogger W姐姐同我地相認! 條街咁多人都認得到, 真係勁! 不過妹妮剛覺豬豬, 無得同姐姐say hi.

我地傾一陣後便散去, 一到餐廳坐低諗住休息一下, 妹妮就醒了.

見到巴斯光年, 今次真係可以試驗下妹妮喇! 首先趁我排隊時叫爸b帶妹妮去遠觀巴斯同其他人合照. 咦, 好似ok噃, 妹妮仲同巴斯揮手! 但輪到我們時, 爸b抱住妹妮走埋黎, 妹妮就驚到喊...睇下張相,佢好似想走佬一樣。

想同妹妮玩車車，不過哥哥度高後仲差小小先夠高，唯有下次再玩啦，其實差１cm咋。原來妹妮都有８０cm高了。

途中見有小朋友玩波波，妹妮即衝埋去。係成群小朋友中最細粒最細個...但又不執輸要玩拋波波，到妹妮成功拋出波波，工作人員都好識做拍手鼓勵。妹妮當然賴死要再玩，爸Ｂ只好抱佢離開。

又玩小小世界。

今次終於排到the pooh了，其實幾得意，不過一入到較黑地方加上車子上下擺動，就驚到想喊嘞。

玩完機動遊戲後, 心情好似好好咁,自己走來走去.

之後欣賞皇家舞蹈表演，其實幾精彩，不過超多人又要顧住妹妮，都無專心睇。爸Ｂ抱足妹妮成半個鐘，手都軟晒。

妹妮今日無胃口，只食幾口粥仔...可能太攰了，最後只肯飲奶奶。之後去睇夜間飄雪，夜間飄雪好靚，好似真的較果！幾時至有機會帶妹妮去睇真雪呢？

連煙花都有特別較果，只要戴起入場附送的紙眼鏡便會見到小天使在煙花光點週圍出現，好靚呀！

臨散場前再同Ｗ姐姐合照，個皇冠係Ｗ姐姐送的，妹妮帶起好cute呀！！多謝Ｗ姐姐！！今日多得Ｗ姐姐幫我地影全家幅同幫手推Ｂ車，thank you!! 希望今次見識到妹妮扭計曳曳無嚇怕姐姐啦, 哈哈!