兩歲三個月大喇！

上星期日妹妮兩歲３個月大（２７個月呀）了！！我地一早去海運飲早茶，見仍然裝飾緊都快快趣趣影返張相，唔係遲Ｄ整好就會好墟冚，迫都迫唔到去影相了。一睇就知係糖果，不過近睇，由其對妹妮黎講咁大粒，要我講先知係糖

見到獅頭，即刻識‘roar’扮獅敲

見到船第一時間撲去攔杆睇船

跟住去反斗城，爸Ｂ話要買單車比妹妮，叫妹妮試下車，但架架都係踩兩下，問佢鐘意邊架，都無答案。

由於選擇唔多，雖然有好多款，但都係一係藍色一係就粉紅色，無一架係中性顔色的，唯有焗住揀粉紅色！

因為一早出動，下晝仲去埋醫院車公公返屋企（公公做左個小小手術），再去埋playtown玩！妹妮坐左成個多鐘車，面珠都紅晒。

今日playtown勁多人！

不過上次黎都係半年前了，今次妹妮身手好明顯進步了好多，無上次咁倫盡，自己可以趴來趴去，唔駛爸Ｂ咪me扶。

哈哈，玩吊起時雙腳自動縮起，好似平時一比人抱起，雙腳會自動縮起一樣。

不過手仔仍未夠力負上自己卅幾磅的重量

上次玩彈床時仲未識跳，只係成日想跳，不過都只係上半身‘跳起’，雙腳仍然‘痴’住地下，玩過彈床後好似啟發了妹妮學跳一樣，玩完後無耐妹妮就可以真正雙腳離地跳起。

再去玩波波池同去３歲以下ＢＢ區玩

你睇妹妮玩到成頭濕晒，面珠紅卜卜！

呢日認真節目豐富呀！

＊＊＊＊＊

講下返學

自從一月開始要學獨立自己返學了。頭呢兩個星期暫時都仲有yayaGigi陪返學，不過今個星期yayaGigi已經開始續步退出班房。陪坐埋今個星期校車，下星期開始無得陪坐，前兩日開始yayaGigi中途自己返屋企，等妹妮由保姆帶返黎。

朝早仍然飲奶奶，但上星期開始胃口都麻麻，飲唔晒。

所以yayaGigi話面珠都尖晒，於是試下比麵包，不過都係咬幾啖就算。

妹妮自己坐校車返屋企，請常到站時已經瞓到kur kur聲。

前日我問妹妮how is school today？你知佢點答？佢話：crying。一個字，當時覺得佢既可愛又可憐，好陰功呀！一定在學校又大喊了

尋日接放學再問how is school today? 今次答 Cry。再問did you have fun in school? 好彩都識話i have fun in school。。。咁即係ＯＫ啦！下星期一開始再挑戰自己上校巴，希望一切順利

聖誕節

之前聖誕節同妹妮去街街影左Ｄ相，不過跟住忙住去旅行而家補番

聖誕日無節目於是又去海運行街，妹妮一見反斗城就扯住話要入去。

入到去居然走上ＢＢ椅堆度踩單車

坐下郵差車

又去連加罰睇下有咩大喊價

之後終於有機會同妹妮一齊去１８８１了。

雖然棵樹唔靚，不過一場黎到都影番張相啦。

咁繞有合唱團唱歌

本來都想去入面Ｄ餐廳食飯，不過聖誕日總要劏人，食埋Ｄ貴夾唔飽既set dinner，仲要等位

於是去舊式飯店太平館食，點知最愛的瑞士汁牛河同梳扶梨都因假日暫停！？

因為最近妹妮鐘意玩醫生，成日拎爸Ｂ個headphone擋醫生聽筒幫我地聽心跳，所以爸Ｂ買了套醫生架生比妹妮扮doctor

星期日boxing day後我們又去飲茶

而家妹妮著親jacket都要拉好拉鍊或扭好鈕，總之要close。

下晝去嫲嫲屋企參加生日會，妹妮有份聖誕禮物，不過係公主妝，見到都毛管動架，不過人地送反而ＯＫ，因為自己唔會買。

表弟生日

妹妮都有食蛋糕

戴上公主配飾係咪好嚇人呢？

低Ｂ班 開學了

去完旅行返黎第二日就係妹妮升Nursery的日子了，第一日（１月４日）因為我都係第一日返工，初來報到所以無機會同妹妮返學校的orientation，由yayaGigi代勞。

去到平台遊樂場妹妮又熟悉地走去屋仔坐，因為呢間係之前讀playgroup同一學校，都係到返左半年學，環境熟習無問題。

今個學期，妹妮同之前的同學仔分開了，會入低Ｂ班做新仔。行行都報埋同一間學校呀，不過被篇入另一班08 B班，全班都係新仔。

yayaGigi話今日妹妮同行行分別都好怕醜，無點交流。

第二朝就正式開學了，今個學期我們搭校車，第一日返學當然爸Ｂ咪me一齊送妹妮啦！

去到會所邊等校車邊影下相。

頭兩個星期可以比大人陪堂，所以由yayaGigi一齊搭校車去返學。

點知第一日就等了半個鐘都未到，終於忍唔住自己搭的士返學先。

星期三（第三日），大個女要著校服了！你睇妹妮而家成個３歲細路一樣，再唔係以前日日留係屋企玩的ＢＢ了，從此展開了漫長（可能成廿年）的讀書生漄。我都係好懷念妹妮日日係屋企，無無聊聊玩下的ＢＢ時候呀。

上車喇，bye bye mami

＊＊＊＊＊＊＊＊＊

一個星期後，妹妮返學不但無改善，反而更要大人在身邊。一向返開學時yayaGigi都間中會行開行埋，妹妮都OK的，反而而家上堂yayaGigi一走開就喊住要yaya。前幾日仲惡到邊揼地邊呼叫I want my yaya NOW!!!連老師都無佢乎。於是星期四見朝早有時間就代yayaGigi帶妹妮去返學。

去到學校見到妹妮有份的聖誕concert相都貼出來了

仲有幾張都有妹妮份呢

返到課室妹妮就拖我埋去玩煮飯仔，又餵ＢＢ飲奶，好似帶我參觀課室一樣。又拍拍地下示意我坐低，本來我應該好似平時一樣同妹妮講mommy stay outside，you don't cry，ok?　不過我見她玩得投入就攝下攝下走出班房了。都係我錯，無耐就見妹妮坐在老師膝上喊住話‘I want mami, I want wee wee’，但老師又無嗌我返入班房又好似係妹妮仍然可以under control，另一方面又驚如果佢一喊我就出現就會令佢習慣喊就有人，所以一直都在reception等。只係間中會聽到那位大聲老師的聲音話‘Aerin! no mami and yaya, they're working, will come back later’...我諗妹妮一定又喊了。

之後我見妹妮好安靜的同同學仔一齊由國語房行番入自己班房，於是我便去麥記坐下，順便買了熱朱古力比妹妮。

返到學校妹妮們已經出大廳玩了，不過由reception的閉路電視見到妹妮全程都無玩過三輪車，滑梯，而係揸住張紙巾不時印印下雙眼，不斷在佢鐘意的黑衫老師腳下走來走去，最多都係偶爾先走去牆邊執下波，見到覺得妹妮好可憐啊。

無耐老師就亨一首歌，小朋友們就自動自覺會走返入班房。跟住家長都陸續到達接放學，妹妮一見到我就大喊MAMI !!! 眼涙鼻涕一齊流，真係心都痛埋。好彩買了熱朱古力，於是我話因為咪me去了買熱朱古力，所以咪行開左囉。點知返到屋企瞓晏覺時yayaGigi話妹妮發惡夢扎醒要搵mami，仲識話mami buy chocolate。我諗今日一定係妹妮既惡夢了。