lunch @ school

開學首一星期都係適應週，返半晝就放學。9月9日，第二週開始返全日了！呢日妹妮成世人第一次自己出外食飯呀！呢個月因為得三個星期，所以我地試下帶飯食。妹妮未開學時已知道升上小學會係學校食飯，已經好期待了。開頭都有問佢想唔想order學校飯餐，但佢話想食yaya煮既，見到自己個飯盒佢好興𡚒呀！唔知佢食唔食得晒呢？又唔知個飯盒夠唔夠暖呢？

下午4點放學揭盅，嘩！！！勁呀，真係一啖不留呀！！其實個飯盒有成碗半飯既份量架！加埋有兩盒仔餸，妹妮食得晒真係好叻呀！😘 最緊要係佢話d飯仲暖! 不過妹妮係豆腐口, 熱小小都唔得, 所以我估都係微暖. 最緊要係佢話唔凍就得嘞. 接住落黎幾個星期，佢都日日清得9成飯，有時只係食淨幾啖，總括黎講都好滿意呀。中秋前個星期5 我去左學校做派飯義工，雖然守另一班，但都見到妹妮。去到學校見到同學仔個個都好乖咁食飯，當佢地食完時要舉手問老師食淨既份量係咪OK，如果老師見食淨太多會要求再食多D先準停手。裝到妹妮食飯真係慢吞吞，好多同學仔食完佢都仲食緊！不過見其他人食完都仲肯繼續食都算係咁喇。

下個月我地打算試下訂餐，同妹妮一齊揀餐時佢話唔好訂意粉呀，D同學話辣辣地呀！另外有一日見有燒賣，我問佢想唔想食？妹妮又話：D同學話燒賣唔係幾好食架。真係好搞笑，一早收晒風知道邊D好食邊D唔好食。就試一個月，如果唔好食就自己帶返囉！

去畫展

 8月 23日，呢日聽朋友講妹妮畫班之前參加左畫畫比賽呢幾日有展覽，每組只得一日展出。於是放工後嗱嗱聲帶妹妮去睇下自己幅畫

妹妮知道自己幅畫有份展出好開心呀！

呢D書法都係細路寫架，好勁呢！

呢度展出左好多幅畫呀！應該都有接近二百幅，妹妮除左搵自己果幅之外，一路都有睇下其他作品，有好多都畫得好靚架。

吖，終於搵到自己幅畫了！！

其實我都唔知呢個比賽既主題係咩呀，只係畫班話報名就報名囉。

最後仲有得比小畫家們親筆簽名留個紀念潻

妹妮搵左個窿仔簽名，仲畫左個笑臉。。。有長頭髮架！

出到海旁，見個景咁靚不如影下相啦！點知妹妮又model上身，自動波擺晒甫士咁

真係好救命呀

不過見佢擺得咁有癮唔通唔影咩！:P 真係好搞笑架！

呢個就係平時真正既妹妮！古靈精怪，扮鬼扮馬

叫佢望住笑下啦，妹妮話：唔笑喇，model影相唔笑架嘛！

吓，哦。。。心諗邊個話你知model唔笑架？懶cool咁

妹妮的鋼琴﹠小提琴

8月24日，呢日都可以話係妹妮既大日子呀，因為妹妮學左琴年幾了，呢日佢考二級試呀！我地一向無催谷妹妮要做D咩咩，平時報興趣班都係為左比佢kill time。老師話係時候考下琴，等佢知考琴係點，免得第時一考就考4，5級時咩都唔知仲緊張。都啱既，等佢試下啦。之前都有參加下鋼琴比賽，所以要表演彈琴都應該難唔到佢既。為左呢次考試妹妮都練左成4，5個月架！媽me細個都學過下琴，但未去到考試階段就無學，所以都唔知考試係點架。

考試前去飲個茶食個飽飽先！妹妮最鐘意飲茶，因為多野食喎

去到考試場地了，妹妮秘笈係要深呼吸，專心，細細聲跟住首歌黎唱

知道考官係英國黎，我地之前一個星期book左呢間琴房實地考察過。妹妮呢日見到個考官行左出黎，睇到佢肥肥地，又四眼既，覺得佢個樣好搞笑，當堂relax晒！ 妹妮話入到房佢叫左good afternoon Mr Burton，個考官即時縮晒膊硬左太一樣。不過妹妮話自己彈得好好喎，老師就話好難唔pass既，不過攞到merit 或distinction 就無咁易。但係之前我地同妹妮講過，如果佢攞A就帶佢去食自助餐，妹妮好想攞“A”囉！6﹣8個星期就有result了，但係我地都寄望唔大，因為其中一part要即時比個譜係彈出黎，係妹妮弱項，我地係望其他有得準備果part可以拉番高呢part既分咋。

某個weekend又去飲茶，基本上我地差不多每星期都飲一次。自從妹妮戴左眼鏡我覺得佢個樣老積左呀，都係扎起D頭髮cute番D！

佢最鐘意係蝦餃！

為左駛佢大膽D，叫妹妮幫手埋單潻

有足球小將呀，妹妮未睇過，不過都知道有小志強同戴志偉！

每次行過琴行都會手痕都搞人地個琴，唔係搞琴都要打下鼓！

本來暑假時同朋友一齊報溜冰堂，但係冰場居然星期六無暑假班，無得上堂唯有望梅止渴啦！

去書局買文具，而家可以慢慢行，因為掉低妹妮係度睇書就得了！！如果同學一齊行，比佢搞搞震真係想買D野都難呀

考完鋼琴，了要分心去小提琴了。不過小提琴年資尚淺，轉左老師只有一年，未有咁快考試既！但係妹妮自己都鐘意鋼琴多D，因為容易彈到首歌多過拉到首歌嘛。而且企足一堂佢唔攰我睇住佢都覺得攰，我地覺得小提琴可以練到佢對事要有恒心，因為學揸弓，keep住揸得好真係好辛苦架，希望佢唔好咁快放棄啦！

好多blog友已經陸續搬家了，其實我都搵左地方搬。新家係 http://littleaerin.blogspot.com  但遲遲都唔想係yahoo blog 呢邊拑個“備份”制，所以一直都搬唔到D舊文過去新家。因為一按左“備份”個制，呢個blog就會進入唯讀模式。。。就以後都唔可以再係呢度打野了，真係莫明奇妙有萬分咁唔捨得！

不經不覺都係度踎左5年幾，由妹妮出世到而家就黎6歲了，係度update下妹妮D趣事，生活點滴已經成為習慣。雖然搬家後一樣可以照打照寫，但係呢度就好似住左好多年既舊屋咁，去到新屋咩都唔同晒要重新適應過晒！聽好多blog友都話blogspot好用，但老實講，而家仲未摸熟新blog個版面點排架。而且見到搬blog 既方法都好似好複習咁，我已經睇左好多教學但都好似唔係好掌握到。。。我見好多format又MT又XML好複習，個腦自動shut down左。

所以暫時都唔想咁快將呢邊變成唯讀，可能等out到10月30日。不過同時間新文就會係新blog果邊post, 等慢慢figure out到點搞先將舊文搬過去。其實之前果次upgrade已經搞左好耐先將D野back up晒。。。而家又黎過。如果有D簡單D既方法，可以分享下嗎？ 仲有係blogspot subscribe 其他blog？ 對我黎講BLOGSPOT暫時都唔係好好用呀

榮升小學生！

話咁快又過左暑假了！！ 今年暑假無去旅行，淨係去左一次澳門咋，咁就開學了。今年妹妮升呢做小學生，佢一早就叫我快D買校服比佢，又話好心急想快d返學。暑假尾聲，買好晒開學用品了。妹妮急不及待要試穿校服，仲話要揹埋書包試埋一套！

揹左書包仲要扮行緊路咁 

8月尾有迎新日，呢日淨係P1學生要返去，編班，家長買書等等。。。之前一晚漏夜整多兩個扎辮用既蝴蝶橡根比妹妮，扎起又幾靚噃

第一日返學，妹妮超興奮呀！梗係啦，又新校服，新書包，新鞋，仲有新學校同新朋友仔呀！妹妮一直都好期待返小學，但前幾日佢話有D驚，因為唔知坐校車會係邊個坐隔離喎！

第一日返3個鐘就放學了，放學時我地一齊搭校車，可以試下校車路線知佢點行。好彩我地係第二站落車，唔駛係車度傲成個鐘至返到屋企。但係返學都要7：15上車呀！妹妮要6：15就起身。。。即係我地都要6點幾就要起身



頭一個星期係適應週，返半日學就放學，第二個星期就變番正常全日制了。

呢日返到屋企叫妹妮幫手包書，呢D咁好玩既佢又點會托手踭呢！

睇佢幾認真，希望佢開學後都可以keep住呢個精神就好了。。。遲D大把默書，測驗，考試，真係要好好enjoy開頭呢一兩個星期呀！

正式開學日（9月2日），我地比左封利是妹妮帶返學，希望妹妮聽教聽話，努力做個好學生！！