第三日了，呢日我地一早去食完早餐就去水上樂園！今年水上樂園啱啱好係呢個假期開幕，d水最'新鮮'同'乾淨'
舊年黎妹妮都未夠120cm，今年已經過晒了！而家大概124cm左右，想呃免費入場都唔得。雖然康然細年半，但係因為XS碼，有排都未駛比＄。有時好矛盾，又想佢快高長大又想佢唔好大得咁快。
不忘一個大合照
因為用水底相機影，所以d 相無咁清
媽me係美國買左件frozen泳衣比妹妮，佢恨左好耐想著架喇！可惜呢度要著救生衣所以只可以比佢show off幾分鐘
呢日天氣好好，唔係太熱，不過d水可能有d凍呀
我地擺低d野第一時間去玩左小喇叭
妹妮要連續玩幾次至夠喉！
康然同Ellie第一次黎比較細膽，不過Ellie爸爸陪住一齊玩時，都有d驚驚地。其實大人第一次玩都覺得幾刺激，不過玩多幾次就覺得無咩野，反而想去玩大人版大喇叭！
妹妮而家係大膽妹，小喇叭已經係小兒科了
幾位壯男好耐無咁暴露合照了
因為朝早水溫有d凍，我地改去溫水區暖下身，好彩都有滑梯可以sir，妹妮未見人先聽到聲！
Ellie 又係有d驚，本來谷住有眼淚，但係係我地大讚佢叻同大膽之下，吞番d眼淚話自己今次無喊，仲要玩多次潻！可想而知群衆壓力真係幾有影響力！
跟住去玩'眼鏡蛇，其實係一大一小坐住水泡sir 落黎再衝上頂（U型大滑梯）再倒後sir番落地，離心力都幾勁架！原來有限大人同細路體重，爸B過重，康然同Ellie又未夠秤上磅無得玩。
後來我地都忍唔住要去玩下！康然媽咪看住do-re-mi, 睇住我地係大滑梯sir落黎，呢個係4個大人坐水泡，經過打圈再sir落黎，初初見行到成4,5層樓咁高仲以為好恐佈，點知又唔算好驚，其實妹妮都唔會驚不過未夠高度唔玩得，過多一，兩年我地一定要一齊玩過！
又帶幾個豆丁去溫水池
好彩佢地又無嫌悶，有水玩已經開心！我地幾個大人又走左去玩另一d水泡滑梯，估唔到咁好玩，其中一個我地5個坐一個水泡，係隧道入面拋到上天花，真係垂直離地，但係坐住水泡又無咁驚而且離心力無玩機動遊戲咁強。可惜玩時影唔到相或video，真係好刺激好好玩呀！！舊年太多小朋友要顧住佢地我地大人都無玩過，反而今年人小小我地可以幾個鼠去玩，好玩過當年水上樂園好多呀！！
返房沖涼check out後去飲茶醫肚，我地發覺酒店呢間茶樓係最好食！
趁離上船仲有兩，三個鐘我地居然去左揼骨！
我地人多比我地霸左間大房！
成間房有成7個按腳位！細路又可以係度跑來跑去
玩埋氹氹轉都得
不過最後我地按腳之際，3個豆丁都分別去爸爸媽媽懷裏抱住瞓著晒！
醒番又玩過！
返到大堂準備離開，見到有卡通人物，大家包圍住影相
一聲"pose!"，大家都立即擺晒pose，真係有𡃁模潛質呀，哈哈！
問妹妮下次旅行想去樂園定係嘆世界（布吉果種hea下食下spa下），佢即時話要嘆世界！但係聽到只有一次揼骨，佢就話：咁你地去長隆又揼左幾次！咁去樂園算喇！（係呀，我地晚上輪流去左揼骨架！）
返到屋企，yaya車左套睡衣睡裙比妹妮呀！！仲係twinstar布，好靚呀！yaya自從妹妮上左小學後得閒左好多，而家大肥上埋天堂，之前大肥住間工人房比yaya霸左做車衣間（佢自備衣車），每晚妹妮瞓著後yaya就去自己既工作間車衣作樂
仲買左妹妮恨左好耐既frozen故事書！我行左幾間書局都賣晒呀，妹妮超開心！
呢晚特別瞓得甜 ：D
