東京復活遊 Day 2 上野公園，アメヤ橫丁，合羽橋廚具街

東京第二天，早餐後決定呢日去上野公園！

上野公園遊人比新宿御苑多，櫻花都係多但係無尋日一大遍草地，換來石屎地，休閒感頓時大減！



但係當地人都好有雅興，路兩旁都鋪滿地蓆，有好多人賞櫻食晏架！



睇左一陣櫻花我地去行アメヤ橫丁，大約十年前我地同公公兩個人黎過東京，當時就住係上野既民宿。所以公公都記得呢條橫丁好多野買，當時都留過唔小腳毛！

呢度除左生果，魚生，仲有好多餐廳／食市同手信！成條廟街一樣，要咩有咩！！見到d 拖羅真係好想買黎食呀，但係得我一個食又點食到咁多？但係咁大塊先3000円真係好抵呀！！！



仲有d立食檔攤，可以即叫即燒海鮮

平時香港d士多啤梨都好貴，呢度咁平一定要買啦！我地買左兩盒，真係超甜呀



公公就收穫豐富，雖然無買海鮮，但佢買左好多乾海產，我地就係度買好多零食／手信！行左一陣已經滿載而歸了，每人幾大袋！而家好方便，連呢度d鋪都有得即時退稅



呢架夾野機入面全部係壽司玩具，遠睇好似熟食檔咁

行到攰又係食既時候，我地求其入左若狹家食魚生飯。公公當然食熟既鰻魚飯！我食三色當，但係海膽質數一般，係勝在平又大碗囉

下一站係EE 好想去既廚具街，但係我地拎住咁多野點行？好彩上野駅入面有好多收費locker，我地買左好多袋都係用500円櫃就已經夠位放晒。



放好行李我地搭的士，好快就去到台東區既合羽橋。呢度我都係第一次黎，成條街都係賣廚具，公公話去油麻地咪得囉！但我唔知呢度有幾特別，比油麻地係咪多好多野賣呢？因為平時都好小行油麻地既廚具街

我地唔執輸買左個防菌枮板，又真係用左成個多月都無污漬，好用！

行完合羽橋 我地又打的返上野，其實上野駅已經好多野行了！不過我地去左01CITY ，上去嘆杯茶先。因為公公行左咁耐，趁坐低左我地比佢抖下，我地又快行百貨。行左半個鐘就返到餐廳，但係公公竟然瞓著左，可能對佢黎講行左半日已經好攰了。

返到酒店照舊比佢午睡，我同EE又出去快行，到7點幾接公公一齊去晚飯。



呢晚去左居酒屋，貪佢多款式揀吖嘛！

食完晚飯再食章魚燒，呢日真係食左好多野呀！

東京復活遊 Day 1 新宿御苑，磯丸水產

4月3日係L.A.上機，經過16個鐘 （唔知點解遲左成個鐘）我地係4月4 日4pm 著陸！呢程機坐左好耐咁呀，最重要係原定我地3點半到香港，我仲要趕6:30機再飛東京！遲左成個鐘至到，好彩行李算出得早，因為呢日香港天氣唔好，5點鐘時行李輸送帶個營幕顯示話地面有雷步要暫停行李輸送！！好彩我個行李到左，暫時要同爸B妹妮度別，因為媽me跟公公，EE去東京了。話說今次呢個東京之旅舊年年尾已經買定飛，我地居然買到香港快運$22去程平機票呀！不過回程就5,6佰蚊，加埋行李／附加費等等好似一千多d。

同妹妮爸B分道楊鏢我就跑去Terminal 2 check in，時間啱啱好check 完in 仲可以去食晚飯。爸B同妹妮攞完行李就去左何洪記食野，早知搵返佢地一齊食啦。因天雨關係，delay左一個鐘至起飛！我地架機叫蝦餃，又幾得意噃！！



去到東京羽田機場已經零晨十二點了，去過咁多次東京都係第一次飛羽田，原來真係近過成田好多好多！！！我地過埋關出到大堂見仲有巴士出新宿，但係就要等20分鐘至有車加車程預計要3點至到酒店！我地3個人都要6千幾yen，梗係搭的士好過！最後只需9千幾yen，半個鐘就出到新宿了。我地仲即刻食返個松屋做宵夜添



4月5日，一早起身睇到新聞就係話d中國人去到又掹又摘d櫻花，真係羞愧。



尋晚有雨，呢日天氣都凍凍地，比L.A.凍小小不過好彩無雨。我地住最方便既新宿歌舞伎町！一落樓下咩野都有，我最鐘意食呢間天神拉麵，但係公公又話唔食咁鹹，怕豬骨湯太濃太鹹



於是去左食讚岐烏冬

其實整個trip都無特定行程，EE上年同公公去過大阪，發現公公只想行藥房，其他觀光景點佢只係睇下就算。所以呢日都係諗住趁仲有櫻花去睇睇，經過新宿西口仍然見到呢個木村燈箱無換人。令我諗起《來自星星的你》入面千頌伊都話每日要望住自己個billboard，有日佢唔紅就即刻換左畫，咁木村係度咁耐係咪仲係好紅好紅？

另一潮聖地點



我地決定去新宿御苑，其實來東京都有十幾次了，但都無去過新宿御苑。去之前買d野飲，蛋糕當去野餐！

由西口行過來大概十分鐘左右，呢日好多人黎賞櫻呀

成片櫻海咁又真係幾靚既

有咁靚景當然係博命影相啦



好彩EE醒目帶定張蓆，我地可以扮下野餐

早前有週刊介紹過櫻花每塊花瓣都有切割位（缺角），梅花就係圓，桃花就係尖既。呢d都有缺角而且係一串串咁生既，一定係櫻花了。下次去睇櫻花就要留意下喇

坐係度飲杯熱飲，食下蛋糕咁真係幾捨意架！



但係我地坐唔耐，都係行下影下相，見到有d 人係度寫生，真係可以spend到成日時間架



可能太多人影相，連d護衛都幫我地影相






我地不經不覺都搞到成一點幾，行返出去求其食左個午餐。。。同公公去日本，唔食生野，唔食炸野，又唔食蟹，又怕拉麵太鹹，其實已小左好多選擇。呢餐蛋包飯不過不失，但係好想食吉列豬扒，好想食迴轉壽司，好想食蟹道樂，好想食魚生飯囉。




食飽我地行左不同既藥房，係街上有人跑過來叫我地上樓上既藥房，上到去當然有斬獲，唔通我地額頭'作'住水魚兩個字？？？ 四點零鐘返4到酒店，公公午睡休息，我同EE就出去血拼！！日本d野零捨靚過人架！



呢晚食左磯丸水產

最大特色就係自己燒海鮮又唔貴

仲有其他熟食可以叫添

第一日節目完，我地租左間3人房，雖然唔係好大，但係3人一齊有照應開心d呢