星期六又去面試，今次係暫時最後一次，因為都未再報名了。出發前妹妮著上我前日買的裙仔，成個乖乖女一樣。
而家妹妮好鐘意度高，仲會要‘mami take ruler’！因為想我攞把尺來幫她度高囉。
著埋鞋仔有成97cm!
今日爸Ｂ返大陸training，得我單挑同妹妮去。其實舊年都有來過見Ｎ１的，不過當時妹妮成舊飯一樣除了老師問她熊仔係咩時識答bear之外就無其他表現，所以自然在‘waiting list’啦。今年都係抱住再接再勵心態再來一次。
登記好後就到大廳玩等夠鐘，因為之前來過知道這學校有位比同學及家長等候，不用好似之前兩間早到要在學校門口等，所以早了成廿分鐘到。妹妮一見ＢＢ就識拎起奶樽餵ＢＢ。原來妹妮都會鐘意玩餵ＢＢ的！
又去枕頭堆碌碌
好了玩了十多分鐘後都係返課室等面試。
好了入房了，今次只有三個小朋友一齊見，但課室內卻有４個老師，除了一對一外另一個老師就負責在旁比分寫評語。奇怪係３個老師一個講英文一個講國語一個講廣東話，幸好我們被英文年輕老師mark 住，妹妮英文叻Ｄ嘛！
每人搵個位坐好後開始玩玩具，一邊玩老師一邊問妹妮個名，可惜妹妮唔肯答。之後warm up一陣就開始撬得開把口了，先叫妹妮將不同顏色動物從一個兜夾去另一兜。點知妹妮夾完一隻後就突然起身走，原來去對面枱攞個樽，於是索性叫妹妮將動物按顏色入樽。紅色，黃色，藍色，綠色，妹妮當然一一過關，點知有隻卡住樽口，妹妮居然將個樽遞向老師說‘auntie help’ ＯＭＧ！！ auntie?! 連老師都大叫第一次比人叫auntie呀。好彩老師好似不太介意，仲搞到其他老師都一齊笑。
跟住開始問下各動物名稱及扮每種動物叫聲，都難不到妹妮。反而老師好驚訝妹妮叫隻公鷄做daddy chicken，識分公鷄母鷄。跟住有隻恐龍，妹妮第一時間好細聲講dinosaur，老師聽到便再問，但妹妮卻死唔肯講。之後老師再攞多幾隻恐龍妹妮都夾硬話係crocodile。激死人！！
又係時間轉移陣地，３個細路走去playmat聽英文老師講故仔。個故仔大約係３隻貓頭鷹同媽咪失散了，首先同３隻貓頭鷹ＢＢsay hi，今次只有妹妮績一講hello sarah, hello bill等。其實３個細路好似都不太專心的，好似老師問貓頭鷹媽咪去邊呢？無人答！好了，最後要say bye bye，妹妮終於開口say bye bye，其餘二人仍未有反應。
故事完了又轉陣去唱歌跳舞，是國語版when you happy and you know clap you hands。需要拍手，踏地等，此時妹妮開始發台瘟企住不動，仲要加個Ｏ咀！平時都有上國語班的，點解會突然呆著呢？就算我在旁叫clap you hands, step your feets都無反應一直到首歌完！！真係激死人啦！!
最後老師比小禮物，又叫極都無講thank you，不過就有big hug老師。我覺得妹妮今日表現比起上兩次差好多，可能係上兩次（由其第一次）太好吧！不過老實講起碼有一半人都應該做到老師要求，但位就得幾十個，都唔知老師點揀，唯有隨緣啦。暫時K1面試告一段落, 希望十二月會收到好消息啦.
No comments:
Post a Comment