早前，去Anna Sui買了對絲襪，送了塊超大波板糖，妹妮第朝起身硬係無執輸一手擸左去啦！
咁大塊真係唔會食得晒架，都係比佢玩一陣過下癮就算啦。
星期六又係我地去街街食早餐既時候，妹妮已經慣左星期六朝早外出了。
今日都係去食下茶啦，茶餐廳食得太多了，不過早餐既選擇又真係唔多，唔係去茶餐廳就係飲茶。不過飲茶通常張枱大D，又可以坐耐D，妹妮可以畫下公仔。
同爸B玩，爸B扮見佢唔到，佢就大嗌I’m here!!!!
商場開始有聖誕裝飾了，叫妹妮埋去影相佢連人地D禮物都拎埋！-__-"
跟住我地直踩去朗豪坊同Hello Kitty影相。
不過今次可能D Kitty唔係人扮唔識郁，佢無之前見到Kitty時咁興奮噃
嘩有大郵筒呀，妹妮直程想掹左封信出黎呀
我地逐隻Kitty影相，不過妹妮比隻狗仔吸引多D。
叫左好耐先行埋隻Kitty度，星期六你知有幾多人啦，好多人排隊等影相嘛，但係妹妮就阿崩叫狗愈叫愈走，好似聾耳陳一樣聽唔到你講野！
終於無吊滯樣有D笑容了
啱啱比妹妮睇左龍貓套電影，睇完之後佢勁鐘意呀！！見到架hello kitty巴士佢直頭當係貓巴士潻呀，又上又落上左十幾次！！
No comments:
Post a Comment