放暑假了

7月9日，返埋呢日放暑假了！這天也是妹妮在這學校最後一天了，因為明年我們便會轉往新學校。對這間學校媽me是有點唔捨得的，雖然學校細細，但就因此好像一個小家庭。媽me對學校活動參與不算多，亦只能間中去接放學而見到老師短談幾句。但係呢度同學，家長之間就好齊心、團結，亦感受到修女都好有愛心。

上星期因妹妮今年獲得班中傑出表現獎，我們有幸可以出席畢業禮。(睇下佢幾大隻！我初初仲見佢唔到以為係隔離細粒果個，仲心諗咩有人咁大隻架，真係唔知果個係佢，但都博命影相，佢落左台我睇相先見到原來最大隻就係妹妮呀 ～＿～）

去到畢業禮，見六年級同學只有一班，但亦因為人小，相對關係更親密。佢地對母校感情濃厚，依依不捨，學生同學校就好似一家人一樣。在觀看成長片段同獻唱時好多台下家長都有落淚，場面感人，我都被感動了，當刻已在想，阿女係度讀書都係一種福氣。縱使學校細又舊又無咩設施，但係果種人情味係難以形容。

其實都無好desperate話要轉校，係爸B話幫妹妮溫習考試越來越勞氣，試下搵d無咁傳統學校啦。於是去報左間一條龍學校諗住試下，點知經過筆試同面試後居然咁好彩收左妹妮！！我地其實打定輸數一心諗住係本校讀到畢業，但係有一條龍學校收就唔駛擔心升中了，掙扎左一日。。。決定轉校了。妹妮好像比舊年願意轉校（舊年連去考插班試都唔想，佢太鐘意自己學校了！）今年卻又好似無所謂，可能佢自己都明白傳統學校模式就係要苦讀，自己都有d擔心吧！

可能係個天安排，就順住行吧！最後一日妹妮帶左相機返學校同同學，老師影相。接放學見到d相時我都感受到佢地一班同學真係好開心呀！雖然有唔捨得，難免有離愁別緒，但係老師仲為妹妮高興，又話明白家長既擔憂，令我舒服好多。

去相--->>

試下機先，因相機有flip mon可以自拍，睇佢地又好得心應手噃！

平時無機會見到佢地係學校小息，上堂既情況，原來玩得咁開心！！

自從小一做過派飯家長，都無機會再上班房了！好彩妹妮影左好多相

英文老師Miss Lee，妹妮話Miss Lee好錫佢，因為妹妮英文科成績好喎。可能Miss Lee本身係Native speaker，加上每星期兩堂鬼婆教英文，妹妮今年既speaking好似真係進步左！

見到呢幾張班相，佢地真係好開心呀！！呢幾相仲要係老師手機影架，真係好有心！！

 另一位老師

唔知佢較左咩mode d相有Lomo效果既？

呢日放半晝，媽me專程來接放學，最後一次係呢度接放學了。。。

平時妹妮就係呢度排隊等校車了

見到同學仔都捉住佢影下相先 

一年班班主任，多得金老師開解，令媽me唔捨得既心情減輕不小，我地會多d返黎探你地架！！

再上埋妹妮班房影相留個紀念

地下既海報都有妹妮份出現架！

 

我地買左書櫼送比同學仔同老師留念

妹妮好比心機逐一張寫，希望朋友仔會喜歡

不如回帶睇下妹妮小一開學個樣吖！而家睇返都覺得好得意呀。當時係新仔要帶名牌返學，好BB呀

妹妮自暑假已經為開學興奮，佢好鐘意自己學校架（雖然連學都未返）

做派飯家長時見到壁報有好多相都有妹妮份，忍唔住要拍低，見到佢咁融入新學校生活，我地既高興又安慰呀

一年零十個月後，妹妮長大好多了。多謝母校豐富了妹妮智識也給了妹妮快樂的初小時代，妹妮每日都好enjoy返學從未話過唔想返，每次經過學校都會大叫"我學校呀！"。還記得當日告知妹妮被學校取錄了，妹妮當時興奮得大叫，好想快d返學！這些一點一滴都會成為珍貴的回憶！

再見了！祝在學各同學仔在這裏繼續努力，有個愉快既小學階段，個個升到好中學，前程錦繡！！