11月底,我地又來週年BBQ,上年都係十月尾都去過一次BBQ。上次去大棠郊野公園,環境正又乾淨,不過係傳統式要自備食物既BBQ。今次我地試下新開業既白石燒烤場,其實白石不嬲都有BBQ,不過好似轉過手,聽聞而家呢個主辦單位係新既。勝在唔駛買食物夠方便,去到都有地方可以放下風箏!
呢日都唔算好大風但係個風箏都飛得好高呀
真係好年都唔放一次風箏,難得仲起飛到,個個都想拎下個線碌
玩完風箏再玩埋吹波波
估唔到又吹得幾大噃! 我地一早book左位所以已經留左個帳幕比我地,於是慢慢玩下先開爐都未遲
康然呢個泡真係好長呀!
Ellie都吹到呀
終於埋位了!!好耐係落手落腳燒野食,其實BBQ都幾好玩架,
呢日已經係11月最尾一日但係都仲好熱呀!!
最好味始終係雞翼同腸仔
雖然有帳幕但係只係檔晒,唔係好通風
好彩呢度除左BBQ仲有彈床比細路跳!
好似$20/20分鐘
跳到唔知去左邊, 好難先見到佢地影到相呀
後來Ellie好似比人整到喊,兩個姐姐即刻護航
原來20分鐘係咁跳都真係幾耐架,跳到成身汗
玩完一輪去換雪條,原來係Facebook 既白石fan page checkin就可以換一支紅豆雪條了!我地遇見隻狗仔,三個女仔即刻瘋擁埋去,嚇到狗都驚!!
食免費雪條一人一支!!
其實燒完野食先兩點幾,但係草地已經開始逼爆人,我地另覓地方想再放風箏
於是去左大埔海濱公園,三個一直玩三姊妹。其實妹妮好恨有細妹架,平時係屋企會同我玩'劉姊妹' 次次都係佢扮家姐我扮妹,但係非一般姊妹。。。因為妹妮會一人分飾兩角做惡家姐蝦完係再扮好家姐呵返你,所以我覺得妹妮有小小變態,將佢既陰暗面表現晒出黎!
不過對住朋友仔當然係個好家姐啦!
點知去到真係有個現成公園比佢地玩,連風箏都劈埋一邊!
附近仲有個小型茶檔有豆腐花賣,正呀!
我地仲玩埋麻鷹捉雞仔至走,呢日都算盡興了!!