Rapuzel @ halloween & birthday party

妹妮學校每兩個月一次生日會，一次過為兩個月生日既同學仔慶祝，而且呢日唔駛著校服架。而每次呢d bi-monthly既party都撞啱有節日慶祝，除左係生日會之外仲可以著埋節慶衫，最好就係十月份呢個，因為撞埋halloween一齊，大家可以扮鬼扮馬一番！！往年都無特別為halloween打點架，我地會所每年都有trick or treat 同鬼屋比小朋友玩，但係妹妮平時8：30就上床所以一直都無參加過。今年5歲了，間中夜D上床都OK既，加上有朝妹妮一早就拉我同佢去clubhouse, 話媽me，我地去book 個party吖！我知佢意思係去sign up 個party囉。買左呢個南瓜比佢trick or treat 用，點知佢連入面d 朱古力都唔比掂，話留番halloween用喎！其實halloween淨係帶個藍出去就有糖攞架喇！



不過今年都無特別為妹妮張羅搵衫，初初諗住生日去埋迪士尼睇下有無衫買先，但都睇唔啱， 諗住著番白雪公主算了。點知突然諗起朋友仔Sana有齊咁多套公主衫，不如用白雪公主同佢交換一套啦，Sana同意換左套長髮公主返黎了！！ 但係假髮就由媽me去toysrus 買了。當晚拎個假髮返屋企時，妹妮興奮得大叫 : I‘m so excited!!! I'm so excited for tomorrow!! 

弊喇，真係興奮到瞓唔著！好似我地細個第朝有得去旅行一樣，前一晚已經興奮又期待到碌來碌去都瞓唔到。只係無諗過5歲咁細個已經會咁，今次係第一次見妹妮咁excited呀！！

第朝一早著好衫，妹妮已經擺好晒甫士比你影相！

仲擺埋呢D令人毛管戙既甫士

今日媽me車返學，不過都想同樓下一齊等校車既朋友仔一齊影下相！

大家都係同一學校讀K3， 但係妹妮高人一截

唔小得要同媽me影下相啦

返到學校見到Mr Stan直情爆笑呀！真係好認真好搞笑呀！

入到班房個個小朋友都有扮野架！

幾個女仔即時擁埋一堆比媽咪們影相

妹妮見到佢個名係黑板好開心呀，原來今次生日得妹妮同kit kit兩個小朋友咋，好彩我地買左兩磅蛋糕，如果唔係可能無生日蛋糕切呀。

Kayla換左南瓜衫，套衫都好得意呀

今年見妹妮同D同學仔明顯比舊年friend好多，可能呢班多女仔朋友。舊年去佢班房，見妹妮都無特別同其他同學仔特別friend，只係跟住人一齊玩，但係有D女仔直情糖痴豆咁幾個痴埋一齊架。

今年好似開心左

party day就會早一個鐘放學，係門口等時連巴士阿叔都認唔住要同龍珠老師影相！

我諗住妹妮應該一早就將個假髮掹走，點知去接放學都仲見佢戴住噃！

可惜影唔到全班大合照啦，因為接放學時有半班搭校車既同學已經上晒車了 

只有由家長接送既同學仔留底影相，同班主任影下相先。

外藉老師都影，但係妹妮嗌極都係望左去電視度。個男同學套衫好正呀，做武士好傳神呀

呢日放學個個都留低唔走，因為個個都係度博命影相呀。咦，有勇敢傳說個miranda呀。舊年妹妮話班上有四個snow white呀，但今年都唔係見到好多個snow white,但Rapuzel居然無人撞衫

成班小朋友好似扮野大會咁真係幾得意

好耐無見到Dathan，一見到人居然猛望住人隻熊仔手！

大家影相影到學校打鐘叫我地散先肯走呀！

妹妮呢日滿載而歸呀，佢個南瓜籃裝到爆滿呀！！佢話自己超級開心。出年升上小學了，到時應該都無呢D halloween party了，真係無後悔今年玩得盡D呀。

今年生日幾個cake!

今年生日都食左好多個生日蛋糕呀，真係多謝各位呀。 我發覺身邊都有唔小十月生日既朋友潻！！


十月十日， 呢日係大肥十三歲生日呀 ！ 同埋EE都係雙十節生日 。呢晚媽me班朋友搞左個十月之星生日會，去左BBQ.  話明生日會，當然唔小得靚靚蛋糕啦！最難得平時無幾何可以訂到大蛋糕， 起碼要廿零卅人先食得晒，呢晚我地有成廿幾人捧場呀！ 生日之星之一Candy訂左個大蛋糕， 仲有4個公仔代表4個十月之星架。 主角出場！！呢個車形蛋糕，外形都整得唔錯架

我地對上一次黎BBQ都有成年之前了！



有人燒埋最方便，唔駛自己燒。不過有時最原始既BBQ先至有風味，但係對於要返工既人，放工都晏又好難去郊野公園既，假日大家都留番比家人又好難出黎聚，所以我地唯有去人地燒比我地食囉

野食都唔錯架，除左基本BBQ必有既之外， 仲有牛扒，羊扒，菇，魚，大蝦，都好多野食架。唔駛顧住燒野食就多左時間大家聯宜下傾下偈

最後來張大合照！

某晚一班同事搞左個十月之星生日會，我地3個十月之星又有蛋糕食！

十月十三日星期六，又約左其他朋友食大閘蟹，因為星期六可以夜D瞓，就帶埋妹妮去Vikki姐姐屋企玩。加上有隻得意狗仔follie陪玩，妹妮都幾開心架

follie都好似幾鐘意妹妮咁噃， 妹妮返左屋企都仲記得follie，有日仲無啦啦提起follie，話佢好細隻好得意噃。

大閘蟹出場喇！！前年食過到而家了，舊年都無食過，今年第一次食。呢幾隻全部六兩重，朋友話其中有部份叫蟹皇喎

動手前大合照，妹妮就一D都唔食。

打開入真係好多黃呀，雖然好多膽固醇，但係真係好好味呀！！

d蟹黃好似奶黃飽咁流出黎架

妹妮好彩有follie陪佢玩，同埋有得畫畫自娛。

原來食大閘蟹真係要食足成晚，呢晚搞到好夜呀，過晒妹妮上床既鐘數，平時佢8：30就上床架喇，呢晚搞到成11點幾呀

難得佢無扭計，仲自己將附近任何野都擸埋黎砌佢既cubby house!!

最搞笑係搵唔到野搭個上蓋，佢搵到條毛巾仔鋪係頭上當係個縫頂， 當自己呢左係間屋入面  不過唔知仲以為佢扮電髮！！

另一個公司的event

同事為我同另一同事送上生日蛋糕，今年都算食左好多cake了！