二月十三日 晴
星期日朝咁好天, 真係天公做美呀!! 黎左幾日都係正我地離開先落雨, 我地返黎又好天, 多謝老天爺呀!
今日爸b話去築地食壽司噃, 我地雖然差不多每年都黎一次, 不過對上一次黎築地都有成5, 6 年前了, 今次再黎我地已經多左個妹妮了.
哎呀, 諗唔起星期日漁市場休市潻!! 黎到見場內市場今日休日呀, 我地以前食個間係場內市場入面架.
場外市場就仍然開業, 因為比較似遊客區嘛, 唯有係場外市場逛下睇下食邊間啦
呢度都有好多新鮮海鮮賣喎
有一百円一串的燒鰻魚呀
曖笠笠, 連妹妮都食埋一份
行晒成個市場, 見到呢間零舍多人圍住, 仲有d人影相, 我地以為拍緊戲潻
原來係劏緊金槍魚呀! d toro一定新鮮啦! 我地即刻衝入去食喇. 爸b努力點菜, 妹妮玩尋日係麵包超人館買的印仔. 細路真係好鐘意吸印仔架, 我地專登買比佢等佢去餐廳時有d細藝, 唔駛成日淨係畫野咁悶嘛.
d印仔好精緻架, 大人見到都鐘意
開餐了, 魚生就我同爸b食, 妹妮就主攻蛋壽司同三文魚子, 佢成日叫三文魚子做bubble, 因為入口爆開口感得意, 妹妮好鐘意食, 可以撈埋飯食成碗架.
食得幾開心!
嘩, 原來叫左好多碟呀
仲有toro精選呀, 正!
妹妮話要食尋晚既泡飯喎, 呢度無泡飯我地叫蒸蛋啦.
食飽飽趁妹妮肯行唔坐車我地再行多一陣先走,
跟住去渉谷行下, 今次真係漫無目的咁行, 又無話要入貨, 主要係食下行下咁. 順便經過藥房想睇下有無保心安油可以比妹妮搽下肚仔, 點知日本無呢d藥油, 反而買到桶屋奇應丸, 不過成1800円一樽, 勁貴呀!
日本有好多呢d好似兒童書入面既樹, 個外形都幾得意. 雖然話今次唔係黎shopping, 但係我地都有幾間鋪每次會去潮聖既, 當然今次都唔例外, 不過無收穫啫. 於是走左去食tea, 不過掛住食居然無影相!!
行行下有人叫停我地, 原來係快將情人節, 所以搞左個booth叫人寫d心意咭. 奇在明知我地係遊客都叫我地去寫, 當比妹妮玩下囉
妹妮就晝左個笑臉
咁求其都得, 爸b係後頁撩番幾隻字, 個姐姐仲幫我地影相
將張咭交返去
仲有得搞珠抽獎!!
都係d '輕ken'紀念品, 係彩色膠紙, 不過妹妮已經好開心了
跟住繼續行下, 睇下呢d路邊檔有無斬獲啦, 不過都係無收穫
遇著今個星期麥樂鷄大減價, 100円咋, 我地又再encore! 其實去旅行成日一邊行一邊食真係好得鬼開心架, 如果成日都可以旅行就好喇.
以前我地多數由原宿行去涉谷, 今次就由涉谷行番轉頭. 好快去到涉谷步行街了, 鋪頭都好多改頭換面了
行呢條街好舒服, 仲有座城堡潻
經過 kiddyland, 見到elmo x hello kitty, 可惜妹妮唔願落車, 我地無入去呀. 真係有d後悔, 早知自己入去昅昅先啦
而家妹妮一見呢d石壆就自動當平衡木咁行上去. 不過唔知點解條石壆咁闊佢都行唔穩成日跌落黎
見到有鋪頭射d燈落地下, 爸b話有好多蟻呀! 妹妮即刻走去捉蟻 -__- 傻豬, 呢d係燈光黎架, 又點會捉到吖!
今日都行左好多路喇, 我地返新宿食拉麵. 呢間又係我地次次都幫趁既天神拉麵, 真係好好味架.
d豬骨湯好好飲架, 仲有得自己加蒜蓉
妹妮都好鐘意食呀, 自己食到成碗麵呀! 仲每啖都鬼咁大啖呀
食完又幫手埋單
你睇佢個樣幾神氣?!
已經飽飽地, 不過爸b話今晚係日本最後一夜, 聽日就走了, 所以幾大食埋今晚, 於是打包魚生飯同今次未食過既松屋當宵夜. 講真東京咁多野食, 又有好多食過番尋味, 要每次食得番晒真係好難呀!
不過雖然唔係貴野, 但係又真係好鬼好食啫