不經不覺妹妮考了4級鋼琴了，自從4歲(K2)農曆新年去朋友仔屋企篤過鋼琴後，妹妮就話想學。當然個個細路都好鐘意去篤下d鋼琴，我地就比佢試下啦！
開頭都係用朋友借既電子琴
就見到佢第一日見到個琴有幾興奮！自彈自唱！第一次考鋼琴試係5歲半升小一個暑假。自己讀書時都有同學仔考琴，當年同學仔話考琴要講英文又要著長裙以示尊重，好犀利。而家唔同年代，d細路英文仲叻過中文，對話無難度了，而且我估而家無咁嚴謹呱，我地只幫妹妮揀左斯文小小既裙仔咋。第一次考試攞到125分，有Merit我地都覺得好滿意了！！
其實妹妮更早開始學小提琴，不過開錯個頭，一開始去d group班，d細路走來走去咁半玩半學學左大半年。後來搵到個姐姐上門教，但係姐姐太淋，妹妮係自己地頭又企唔定，又嘥左成年。到升K3個暑假先正正式式跟而家個老師正統咁由頭學過，淨係練揸弓開始都練左個多月。最慘係上堂企足成個鐘，以5歲來講我係大人都覺得辛苦！好彩捱過揸弓後有得拉下歌仔，起碼感覺上時間都無過得咁慢。如是者上年剛7歲生日後考第一次小提琴試，最喜出望外係今次攞到140分！！好多人攞Distinction都係13X分，所以140真係好高分呀！收到成績妹妮最開心係可以向老師有交代了！傻妹聽老師講如果評語話佢拉琴時d contrast 唔夠就要罰，點知成績好佢可以鬆一口氣！
好了，今年爸B生日後一日（仲係7歲）考第二次鋼琴試了！其實今次考試預左成績唔好，因為我地10月考試，但老師8－9月放了產假。我地8月尾開始要靠自己練琴，老師坐月期間我地都唔想打搞佢湊BB同休息，於是到10月頭才在短短9日內上了3堂鋼琴執下d錯處同手勢。我去琴行報左3堂補下sight reading 同aural，但係都算臨急抱佛腳。。。
妹妮考完出來都話自己： Distinction就應該攞唔到，不過應該有Merit 既！
爸B問： 彈得好嗎？
妹妮答：彈得幾好吖 ，我比95分！
最後成績收到了，只能說心滿意足了！！希望妹妮可以維持呢對音樂既熱誠，佢無因為係我地叫佢學而學，佢自己都想學既心我地已經覺得好滿足了。加油！！！
