年三十晚至返到香港,呢晚就要封埋利是,其實好多新年野都未準備好架。不過好彩有d糖果可以擺埋全盒!
年初一、二,我地都係來回公公,嫲嫲屋企。
過往幾年我地都係公公屋企樓下食完飯臨走時係商場影下相
我件灰色褸影到好似寒背咁,激死!
下午就去嫲嫲屋企
呢兩日都無節目架,只係食食食
每日朝早都係煎蘿蔔糕,連Burger都想食。Burger本身係超胃食,每見我地拎住野食就會跟住埋黎想討食,好頂佢唔順!
年初二,我地著左妹妮話既 Family shoes出街,一人一對但係唔同色,邊對最靚?
去完公公度仲去食珍珠奶茶
蕃薯雪糕
初三,我地自己三個人過
記得舊年誤打誤撞去左Marriot食左個好正既buffet, 今年再encore
今年都有為新年而設既餸菜,又有龍蝦拑
而最喜出望外居然係年糕,每個都煙煙靭靭,入面仲有芋蓉,好好味呀!!
仲有財神合照添
年初四 就約左兩位美女EE飲茶
JJ似乎自得其樂,無咩興趣同妹妮玩噃
呢日下午係AIA嘉年華最後一日,我地約埋EE同舅父去玩多次。其實一月頭啱啱開時我地已經玩過一次,不過上次仍有好多遊戲未被機電處批核無得玩
舅父就好大膽,我地得個睇字!
企係度睇都覺得好勁,真係唔敢玩了!
其實一月尾果次,妹妮同EE都有玩個小型d既大拋搥,雖然無呢個咁激,但係都幾嚇人架!
其實舊年去美國都同妹妮玩過,果個大型d,fing到半空我自己都好驚。妹妮又無嗌,但落到地佢猛話好玩!今次呢個小型d應該無咁恐怖,點知係地上望上去原來都幾驚,我都有d擔心妹妮會唔會嚇親!見到d close up 相先知妹妮個頭紅晒,但係佢玩完都係話唔驚,反而EE仲識笑!
上次個吹氣城堡無開,今次開左梗係要玩下,我仲跟埋妹妮一齊玩,點知原來要好多體力!係張吹氣床上跑幾轉已經喘晒氣了!我玩左4個round就投降,妹妮仲有力繼續玩。
可惜呢日微微雨,所以玩左一陣就走了。聽講今年年尾會再有嘉年華,希望到時再玩過啦!