Summer fun

真係有d懶，呢個暑假話咁快就過左！ 其實都有好多節目架，不過真係無時間逐樣寫了，就咁概括下啦！

7月中，香港開左個3D博物館，呢日我地約埋幾個K3朋友仔一齊去探索下

其實地方好細，我地去果日可能因為新開所以好多人都幾迫架！影相出黎效果都幾好，但係因為太多人好難企到最佳位置影相。

 

雖然人迫影唔到好靚既相，但係班細路都係志在聚下開心下，呢日真係玩得好開心，妹妮成頭都濕晒呀！

六月尾，妹妮係美國既朋友仔返左香港呀！我地除左約埋去大澳，仲去playhouse玩！

妹妮仲因為我地要去tea break嬲爆爆，點知我一笑佢：睇下佢古埋泡腮幾嬲！佢即時忍唔住嬲到喊，原來想繼續玩，正傻豬！

係佢地臨走時仲出左黎飯聚。姨姨幫我地買左支自拍神棍，於是兩個妹子睇住個茫當照鏡咁影相

佢地個咀咁紅，咪因為攞左媽me支唇膏黎玩囉！

自拍神棍真係好方便，可以拍晒自己友。

呢晚妹妮送別Audrey, 仲即時用Yesterday once more唱左首自己填詞既歌比Audrey 添，出年見喇！

8月頭 我地約埋Sana一齊去左吹氣嘉年華

入到場可以任跳充氣彈床，仲有得玩水上單車添！但係呢日星期日，雖然唔係迫爆，不過都多人到排成個鐘至有得玩，我地跳左3,4樣已經玩到4點了！

於是轉戰迪士尼食tea! 其實黎過咁多次都未食過tea，呢次係第一次咋

有frozen特飲添呀

排左成日隊，腳都攰晒，都係影下相，食下tea舒服好多

暑假話咁快就過了，眨下眼已經開學，妹妮升上二年班了！希望佢來年讀得開開心心，努力做個好學生啦

小提琴 student recital 2014

除左鋼琴，妹妮其實一直都有學小提琴，而且學左好耐添。妹妮K2已經參加集體小提琴班，不過一班4,5個小朋友一齊學，其實唔係好focus咁學。於是學左半年開始搵私人教師，點知因為老師年經，而且來我地屋企教，係自己地頭妹妮就唔正經咁學，又學左一年。於是又另找老師，K3 開始終於找到個嚴肅既老師，妹妮會聽話正經學了。開頭轉老師妹妮要重新學過揸弓，頭個兩個月都係學揸弓手勢，手指要爬樹咁由弓底爬到弓尖，每堂企足一個鐘，我睇住佢上堂都戥佢攰。好彩捱過左兩個月開始有得拉下歌，開始有留d心機。

不經不覺都學左兩年了，今年都考二級試了。我地都無話要求妹妮一味考到好高級，反而真係拉到基本功好d。相對鋼琴，妹妮無點參加過比賽，只參加過一次校際音樂節，呢次student recital，係一個好機會比佢見識下其他同學仔既琴技。yaya專程趕製呢條裙比妹妮表演著，但係上次鋼琴recital d 同學仔都係著到好隆重，於是今次都帶定上次套裙，睇下換唔換。

呢日晏晝就要去彩排了，因為無拎外套妹妮又話凍，點知我地攞衫時妹妮就上左台彩排了。。。影唔到相添。

呢日既場刊

原來多同門既，多數都係大個d既師兄師姐 

以下d相都係老師搵攝影師影既，幾有mood！

我地同爸B集合食完晚飯，7點就返會場了

其他同學都好著得好formal架

更有合奏 

到妹妮出場了，雖然無咩表演經驗，但係妹妮好似好淡定咁呀！

但係佢話其實好緊張喎

不過我地都已經好滿意了

臨尾仲有四人合奏

老師夫婦二人出來合奏

原來妹妮都係其中一個最年經既師妹，當佢同另外個較細粒既男仔出場時，後面d觀衆居然覺得佢地細細個好得意，一出場就"哎吔，咁細個好得意呀"

妹妮出場序跟住隔離個姐姐，所以佢地坐埋一齊，唔知點解兩人仲好好傾，原來姐姐升中一了，唔知佢地有咩話題呢？雖然為左呢個演奏會都花左不小時間練歌，但係其實老師有呢d recital 可以比小朋友有機會表演不失為好事呀，希望出年再來過！

掛住影video 又影唔到相，我覺得呢首二級考試歌好似比校際音樂節果首仲易咁，不過妹妮表演算淡定，見佢可以好緊張但不表露出來，可嘉可嘉！

閒遊沖繩 Day 5 國際通

話咁快就最後一日了！呢日無咩特別節目，因為3點機，一點左右就要到機場。好彩last day呢間酒店有早餐包埋，一早落去食早餐先。妹妮好鐵意呢頂係水族館買既帽，於是讚佢成個小model一樣噃，佢即時model上身擺晒甫士任影唔嬲！

咁蹺等𨋢lobby成幅牆幾靓就影多幾張

酒店早餐雖然唔係好豐富但都幾好味架 

妹妮食到笑騎騎

得一個朝早，我地又去多次國際通，再買下手信咁

入到呢間御果子園，入面好大呀

仲有好多不同試食，啱晒胃食妹

呢度仲睇到工場既輸送帶，點樣做蕃薯tart，雖然呢樣係沖繩明物，但係我地無買呀

呢間叫 Splash 既鋪頭係國際通有幾間分店，入面d野幾靚架！妹妮去水族館條淺藍色裙就係呢度買，呢日再睇下有無野買下。其實成個沖繩都好似無咩野買，除左手信好似無野買咁！

Splash 既下牆一樣睇得

呢個小結他好得意，妹妮而家有拉小提琴，拎起就話呢條係G弦，A弦，我就聽唔明邊條打邊條了

前幾晚都有黎呢間蛋糕店試食過，好耐好耐以前新世界中心都有呢部機做呢種蛋糕架！！呢日試完買左幾盒返屋企

我地最鐘意係右邊隻原味

呢日終於去到呢頭唯一既shopping Mall 呀！！終於有小小似返去左日本了，不過本土牌子都唔係全部齊，只有一兩個品牌有counter咋！見到Ne-net新背襄，問個妹妮後買左個比佢做書包。其實妹妮真係幾乖，問佢買個新書包好唔好？佢話用返jewel pet(舊書包）就得，無話扭計買，可能佢真係好鐘意個jewel pet，叫佢試下呢個熊仔袋，佢試孭後見幾得意先同意買咋。。。其實佢萬一唔鐘意都可以比媽me或爸B用既  hehe！

行左個零鐘又集合食lunch，因為一陣就要去機場了，我地去左Afternoon Tea, 係本土都成日見到呢間餐廳，但係就未試過。

其實都類似Pokka cafe食日式西餐

但係呢個芒果咖喱甜甜地又幾好食噃！

妹妮又係食意粉，今個trip食西餐多過食日本餐呀！

要離開沖繩了，呢d就係那霸市既單軌列車了，那霸市離機場好近，半個鐘就到！

去到機場至知delay一個鐘，早d通知我地就唔咁早去啦！

國際航機呢邊只有兩間鋪，點kill time? 好彩上網搵到只要行番去local flight果邊就有大商場，即刻去行下，呢邊真係好大好多野賣，而且價錢同國際通差唔多架！！我地都買左d 手信呀

我地見呢度有花生豆腐，食過又覺得ok 仲買多盒帶返香港，點知入閘先話唔帶得！要入喼先可以唔可以hand carry，唯有即場每人兩盒啃晒佢，好彩細細盒好似食豆腐花咁咋！

入閘後再通知delay 3個鐘，原來香港紅色暴雨令到d飛機無得起飛呀

好彩唔駛困係機入面咋，起碼都可以行來行去吖！呢度仲播Sophia the first，即時變左兒童劇場，細路圍住晒

緊接Sophia the first仲有Disney Clubhouse

Cheryl 又教下妹妮打機

又做下體操

航空公司比左每人500円coupon我地買野食，可惜機場入面本身得一間食店，基本上無野可揀 :( 

6點幾終於上機了！！！ 妹妮上機無耐就一覺瞓到落機

返到屋企yaya同妹妮已經雙擁入懷！

妹妮都好掛住yaya架，呢張字條係第一日寫架，幾多心心！

呢間廟都係佢有感而發畫架，又幾靚噃。呢次去旅行覺得去左唔係好耐咁，好似仲有好多地方未去咁，期待不久將來會再去呀！