上海秋遊之大閘蟹first call

因工作關係, 間中都要去下上海, 平時多數去郊區但今次去市區, 而且仲有幾個同事一齊去~!

同事S一早諗定呢個係大閘蟹開鑼季節, 無理由唔食吖! 今年可能唔駛再去了, 把握機會食一次先! 咁啱問過晒大陸同事, 介紹王寶和酒店入面既餐廳, 咁蹺今次我地住呢間酒店!! 方便過方便! 同事一早BOOK晒位, 點知去到餐廳先知原來王寶和都有幾間, 我地大陸同事介紹係另一間呀! 但已經唔願再周車勞頓了, 索性係呢度食算了.

睇個牌楄呢間都好似好掂咁噃!

用晒Ipad menu好hi tech呀! 個menu頁數多到你唔想睇!

準備開餐!

大合照

首先食個蟹粉豆腐煲, d豆腐似豆卜多d, 但靭靭地幾好食

就係呢幾隻了, 每人一公一乸, 好似三百幾蚊一斤 (大約兩隻)

仲點左波菜但食落似豆苗, 好味! 乳鴿有味, 但個look麻麻地.

d蟹出場喇!!!

一公一乸就係咁様, 唔算好大隻, 但會唔會咁先正宗呢?

d羔真係好好味呀! 其實我鐘意食公多d, 但待應話11月d公先最好食, 而家食乸先. 不過乸既硬羔我麻麻地, 幸好都有好多軟羔呀, 好正!!

公司對我地都幾好, d酒店都唔會太差, 以前好驚自己一個去酒店過夜, 而家練到好大膽了.

多得呢d咁 cozy既酒店, 好舒服又好安心

第朝一早既上海市, 今次比上次8月時涼好多了, 上次熱到成40度, 係條街好似入左焗爐一樣呀.

市中心既office view真係幾靚架!!

仲可以望到明珠塔呢！



上海遊學團

話說父親節當晚媽me就起飛去上海training， 好彩呢次有成6個同事一齊去，好似旅行團一樣！！父親節同妹妮爸B食完lunch收到航空公司sms話班機由原定4：50 delay到6：35， 我地本來係elements行行下街都即時返屋企瞓個晏覺先！點知去到機場又話再delay一個鐘，上機後坐定定又再delay多個半鐘！！第一晚返到酒店已經深夜12：15了！！因為我地上training既地方唔係上海市中心，係上海邊皮既昆山安亭市呀，機場坐的士都要成個鐘先到架。

第二朝上training，個老師好好呀，比我地準時4：30放學！本來一早諗住出上海市玩，但有同事提議去周庄，聽聞係拍攝mission impossible 3既外景場地，係一個古都水鄉，大家都未去過就試下啦！但搭的士都成45分鐘車程。

周庄係中國江南一個有九百幾年歷史既水鄉古鎮，而家已定為4A級風景區了。坐左成大半個鐘頭車終於見到了，真係有D古色古鄉感覺



呢度大門就係入去水鄉既入口，但係原來要比＄入場架！一百蚊位，一D都唔平呀！但係咁遠黎到又無理由唔入架。

入左去第一間大鋪居然係紙箱王！呢間明明係台灣名店黎架？

我未去過台灣間紙箱王，但係呢度應該好似，入面D食品都係台灣貨呀！

D紙箱又幾堅噃！咁大隻猛男坐上去都頂得住！

沿途都見到有好多小河

同埋小橋

D牆身都仲係好古老架

D𥦬花用石屎做架

其實呢度已經係遊客區，要比＄先入場，所以環境都好似古裝街一樣，保留古老氣色

入面都有好多店鋪，但又唔係呃遊客果D，因為D貨品價錢都好平架。髮飾，絲巾都係十幾蚊就有交易。呢日好熱，愈行愈出得多汗！見到有coffee shop走入去歎下冷氣過下冷河先。

呢度都有台色coffee shop, 入面仲話有貓潻

原來無貓既，不過有好多貓既文具，同埋有書睇。。。其實感覺去左台灣多D

呢個收銀櫃用書砌成，又幾特別噃！

除左現代coffee shop，仲有D買舊野既鋪頭架

呢間賣鐵架，所有都係用鐵做

另外呢間賣BB鞋，全部由後面粉紅色衫位婆婆人手做架，可惜D size太細，妹妮已經著唔到，都以無買呀

仲有呢間就賣竹器

除左有竹做既湯匙，竹筒，仲有真正竹蜻蝏賣潻呀！

同事買左呢D ＄6/12塊既燒餅，又幾好味噃！

呢度有好多元蹄，不過睇個面D蜜糖好似揸左層腊咁呀

天氣好熱，我地又行過另一條拱橋，開始滴汗了，要搵地方坐低食飯至得！

呢度都有好多小艇， 真係幾有水鄉feel 架

我地見到酒樓就入去了，因為好熱，唔揀得咁多了

呢張就係周庄地圖，但係天氣太焗太熱，我地行左好小咋！食左飯先算

周庄都有自己既啤酒架！不過呢度D人鐘意飲常溫，連冰都要問人借先有！

我地叫左好多餸呀，全部都好好味，而且好有家鄉風味，唔似平時係市入面食果D咁，好有鄉下餸既味度

呢碟係青椒肚尖，但我唔食內臟所以無試呀

肉粉絲煲

元蹄

呢碟唔知咩雞，其實幾好味，但又好似平時隔夜翻炒既餸咁，不過又幾好味

白飯魚炒蛋

呢D河蝦真係細隻到好似半隻手指尾咁細！！但係食落又好野味既

呢碟係D涼菜＋肉絲，食落小小甜小小酸好涼快呀！

總括呢餐都幾好食，因為好有鄉下味，食食下仲有個呀婆走入黎話要唱歌比我地聽（當然要比＄），但我地話唔聽喇，比左小小tips佢算了。不過埋單都唔平，餐飯駛左成四佰幾蚊呀！直得一讚係D白飯，好似形珠米咁圓圓地又大粒，好食呀！！

離開時已經天黑了，我地無再行，就行番出大門離開了

其實呢度入面已經有好多新式店鋪，有連鎖咖啡店，所以係得個殼舊。

等車期間附近餐廳D人講原來過左8點就免費入場，唔駛＄架！！不過慳＄100就無得影日景了

第三日放學，呢日唔出市了，我地去酒店附近個商場食下tea，行一陣先。聽人講上海昆山又叫上海後花園，而家都開發左好多，仲有好多台灣人係度住，所以呢度都有D台式甜品

昆山一樣咁熱，行到出街好似入左焗爐一樣！！就算入到商場都唔似香港咁開行晒冷氣，感覺就好似開左25度冷氣一樣，一D都唔涼。所以要叫碗涼粉cool down一下，入面有涼粉味沙冰，綠豆，蓮子，涼粉絲，真係透心涼！

我地又去行下超市，呢度真係咩都有得賣！！田雞，龜，仲有D超幼既鱔都有

荔枝都超大粒！！

仲有烤全兎，真係包羅萬有架！

呢D十 足十cup cake一樣既糕點，又幾靚，不過估佢似飽多D

 我地見到呢D東北大米呀，懷疑同係周庄食個D一樣，因為又係大大粒又圓，於是買D返香港試下。

平過香港好多呀！如果好味下次上黎要 deck 米了！

真係去到邊都買到野架！！

當然唔小得每次都幫襯既gymboree啦！我已經成為vip, 有extra discount了！！



之後去左老街晚飯，條老街係未有商場前我地酒店附近唯一既食市黎架

呢間飯店食過幾次，又平又好食！叫到成枱都係都係三百幾蚊咋！

食完飯，碌埋鈴，上多一日堂我地就即刻返香港了，呢度我地隔個月就黎，都有D似第二個家。好快又再來過！！