東京復活遊 Day 1 新宿御苑，磯丸水產

4月3日係L.A.上機，經過16個鐘 （唔知點解遲左成個鐘）我地係4月4 日4pm 著陸！呢程機坐左好耐咁呀，最重要係原定我地3點半到香港，我仲要趕6:30機再飛東京！遲左成個鐘至到，好彩行李算出得早，因為呢日香港天氣唔好，5點鐘時行李輸送帶個營幕顯示話地面有雷步要暫停行李輸送！！好彩我個行李到左，暫時要同爸B妹妮度別，因為媽me跟公公，EE去東京了。話說今次呢個東京之旅舊年年尾已經買定飛，我地居然買到香港快運$22去程平機票呀！不過回程就5,6佰蚊，加埋行李／附加費等等好似一千多d。

同妹妮爸B分道楊鏢我就跑去Terminal 2 check in，時間啱啱好check 完in 仲可以去食晚飯。爸B同妹妮攞完行李就去左何洪記食野，早知搵返佢地一齊食啦。因天雨關係，delay左一個鐘至起飛！我地架機叫蝦餃，又幾得意噃！！



去到東京羽田機場已經零晨十二點了，去過咁多次東京都係第一次飛羽田，原來真係近過成田好多好多！！！我地過埋關出到大堂見仲有巴士出新宿，但係就要等20分鐘至有車加車程預計要3點至到酒店！我地3個人都要6千幾yen，梗係搭的士好過！最後只需9千幾yen，半個鐘就出到新宿了。我地仲即刻食返個松屋做宵夜添



4月5日，一早起身睇到新聞就係話d中國人去到又掹又摘d櫻花，真係羞愧。



尋晚有雨，呢日天氣都凍凍地，比L.A.凍小小不過好彩無雨。我地住最方便既新宿歌舞伎町！一落樓下咩野都有，我最鐘意食呢間天神拉麵，但係公公又話唔食咁鹹，怕豬骨湯太濃太鹹



於是去左食讚岐烏冬

其實整個trip都無特定行程，EE上年同公公去過大阪，發現公公只想行藥房，其他觀光景點佢只係睇下就算。所以呢日都係諗住趁仲有櫻花去睇睇，經過新宿西口仍然見到呢個木村燈箱無換人。令我諗起《來自星星的你》入面千頌伊都話每日要望住自己個billboard，有日佢唔紅就即刻換左畫，咁木村係度咁耐係咪仲係好紅好紅？

另一潮聖地點



我地決定去新宿御苑，其實來東京都有十幾次了，但都無去過新宿御苑。去之前買d野飲，蛋糕當去野餐！

由西口行過來大概十分鐘左右，呢日好多人黎賞櫻呀

成片櫻海咁又真係幾靚既

有咁靚景當然係博命影相啦



好彩EE醒目帶定張蓆，我地可以扮下野餐

早前有週刊介紹過櫻花每塊花瓣都有切割位（缺角），梅花就係圓，桃花就係尖既。呢d都有缺角而且係一串串咁生既，一定係櫻花了。下次去睇櫻花就要留意下喇

坐係度飲杯熱飲，食下蛋糕咁真係幾捨意架！



但係我地坐唔耐，都係行下影下相，見到有d 人係度寫生，真係可以spend到成日時間架



可能太多人影相，連d護衛都幫我地影相






我地不經不覺都搞到成一點幾，行返出去求其食左個午餐。。。同公公去日本，唔食生野，唔食炸野，又唔食蟹，又怕拉麵太鹹，其實已小左好多選擇。呢餐蛋包飯不過不失，但係好想食吉列豬扒，好想食迴轉壽司，好想食蟹道樂，好想食魚生飯囉。




食飽我地行左不同既藥房，係街上有人跑過來叫我地上樓上既藥房，上到去當然有斬獲，唔通我地額頭'作'住水魚兩個字？？？ 四點零鐘返4到酒店，公公午睡休息，我同EE就出去血拼！！日本d野零捨靚過人架！



呢晚食左磯丸水產

最大特色就係自己燒海鮮又唔貴

仲有其他熟食可以叫添

第一日節目完，我地租左間3人房，雖然唔係好大，但係3人一齊有照應開心d呢

L.A.復活節休悠遊 Day 9，10 - CalTech，龍蝦E面，返香港了！

最近無線有個節目叫《星星探親團》，講一衆明星返去細個長大或讀書時既地方懷緬一番。我自己覺得好好睇，因為好有共嗚！雖然唔係由好細個就住係外國，但係每次返到去都好有親切感，好似返鄉下一樣！返到黎都有好多野想食，好多地方想去，所以我每集星星探親團都有追住睇。

最後一日full day了，明天一早就要上機！今日把握最後機會食埋未食既野，下次都唔知幾時再來。一早我地去左屋企附近個Santa Anita Mall，呢個mall以前都成日去，因為又係覺得多野行！今次住係附近好鬼方便，劈個彎就到！！如果住係度真係可以日日去行mall！：D 

第一餐食Johny Rocket，話說同爸B拍拖時都有返過L.A.幾次，當時我做導遊帶佢週圍去。果陣時覺得Johnny Rocket d 漢堡超好食，點解香港無呢d咁好食既漢堡呢？！

我地唔敢叫太多，因為想留肚食下其他野，於是叫左個Route 66磨菇漢堡同classic 既bacon cheese漢堡，加薯條，番薯條，正！！

ummmm....真係無黎錯，好好味呀！！兩個漢堡都有肉汁，其實有時去d美式餐廳都會叫下漢堡，但係好小煮得好食。

食飽飽，行下mall最後衝刺！呢期鐘意free people，其實香港都有但係香港我從未去睇過，但係呢度d鋪都靚過人所以入去買唔到野都想hea一陣。妹妮就去商場入面個遊樂場玩，呢邊d mall有playground真係好，唔會悶親細路！

臨走前我地去左cheesecake factory 外賣件cheesecake留番晏d食。妹妮一早話口渴，我地話一陣買完cheesecake再去買野飲。叫妹妮去落單外賣，佢話：can I have a piece of cheese cake? 

waitress : anything else you want?

妹妮 （自然反應地 ）： I want something to drink

waitress ： we have orange juice, coke ...

就係咁無啦啦買多左杯橙汁，仲要貴過出面買！！！佢真係無諗過我地去另一度買係想平d，人地問就直接反應回答 （啤一聲！）

其實呢日無咩行程，我地想去pottery barn kids，路經Cal Tech爸B話去參觀下！Cal Tech係有名大學，爸B話如果妹妮將來入到呢度讀書，真係會開心到喊！！

呢日係星期六加上係spring break，學校入面無咩人，但係有人係度結婚，相信佢地都係呢度既舊生。

我地搵個地方坐低食埋年cheesecake，呢件Oreo cheesecake真係好漏！

呢日大學入面可能係有d fair，有好多不同中學都有擺帳幕係度，好似做d science fair咁，見到每個booth入面都有不同的模型。

所以呢日特別多細路係校園入面

池塘入面有好多龜呀！妹妮竟然想去摸下d龜

去完Cal Tech我地去左附近shopping就返屋企了

因為呢晚約左大學同學Bernie一家食晚飯！！今個trip除左同表姐飲過茶之外我地居然無食過中國野，妹妮上次黎呢度食過龍蝦E面之後一試難忘，於是今晚我提議去食龍蝦。係Yelp 搜尋過有間叫Boston Lobster既餐廳係最多人推介，於是就去呢間。原來好近我地住果度！但係Bernie就辛苦d，佢地由Irvine揸車上黎要成個鐘呀！！！

我地第一次兩家人雙聚，因為平時佢返香港都係我地大人出來，上次來L.A.又無時間見到。Bernie細女Cassey同妹妮咁大，佢地兩個初頭都有d怕醜。其實晏晝妹妮已不繼問Bernie叔叔d小朋友幾大個？係中國人定外國人？之類問題，但係見到面就怕醜縮沙！好彩佢地有個手機遊戲幫d細路破冰

記得上次食龍蝦E面係US＄9.9一碟，但係呢度係US＄17一磅，待應話一碟細order大概要4磅，即係呢碟龍蝦要成＄70！！！ 我問以前成日有買一磅送一磅，又有d ＄9.9一碟而家去晒邊？早知去上次間餐廳食啦！呢間好似好出名，我地早到都要等位，碟龍蝦係唔錯，但係無問我地點煮，出到來係辣的，變左細路食得唔多。

呢晚我地傾左好多計，雖然Bernie太太都係第一次見面，但係我地都好多話題。希望下次返香港再見，d小朋友多d時間一齊玩！

呢日食左Johnny Rocket，Cheesecake Factory，龍蝦E面，最後我地去埋伴伴堂買埋珍珠奶茶做宵夜！

最後一早，我地9點機，7點就出發去機場了！眨下眼呢個假期又完，每次離開都諗唔知幾時會再來呢？

機場d鋪頭8點已經開晒門，真係好勤力呀！再見L.A. 希望好快又會再來！