潮聖＠Hello Kitty中菜軒

6月17，見妹妮考完試又唔駛日日返學，就約埋老友Vikki一齊去試Hello Kitty中菜軒。呢間餐廳都開左一排，我地當然等d人龍無新開時咁強勁至黎啦！餐廳無得預訂，要walkin 等位，開11點我地10:40分到。人龍唔算好長，大約三十多人，我地排最後但又出奇地無人再係我地後面。約10:50分有人派籌，排籌後我地後面先開始有人排

好彩呢日唔太熱，妹妮套衫係Yaya幫佢車架，佢好鐘意但我就覺得好馬來feel

入場喇！！嘩好彩，原來餐廳入面好細咋，我地係最後一張枱！！本來係二人枱，如果我地唔坐就要等第一輪埋單，見一面係梳化就梗係入坐啦。

睇餐牌d相好似做得幾靚呀，但係點心一d都唔平

枱面同餐具都有晒Kitty嘜頭

相信都唔會短時間內再來，所以呢日叫多幾款。個奶黃包做得最靚！

蝦餃只有一隻係有Kitty樣，其他得隻Bow咋

餐廳內所有人都係相機食先，多數人都好似我地黎潮聖影相多d

其實點心都不錯，呢個蝦球飯d綠色汁原來係蒸蛋黎架！

朋友推介的咕嚕肉都幾好味，聽聞係呢度招牌菜，但係就無Kitty Logo

 當日見如果排隊等位，最早埋單果枱約半個鐘就走了，我地其實都係食左一個鐘多d都埋單了。跟住同妹妮二人去左睇Jurassic World，妹妮初初好驚d音效太勁會好驚，但係套戲好好睇呀！居然過左廿年，用番同一條橋都可以拍得咁精彩！

同場加影父親節，呢日去左食吉豬，問妹妮想食咩？佢話： 如果你問我實係Morton's 啦，不過我無錢比架 -__-" 

吉豬佢咪一樣食得咁滋味！

Aerin ＆Audrey

妹妮同好友Audrey係2013年聖誕我地去L.A.玩時認識，但係一見如故，Audrey每年暑假都返HK可以一聚。今年我地去歐洲咁啱佢地又去而時間又剛好會見到，於是仲約埋係巴塞一齊玩！Audrey媽咪同我決定比Surprise佢地，去到先知會相見，兩個女仔超開心！！距離兩個月佢地又返來放暑假了，不過妹妮6月份仲有考試同要返學未能一聚，考完試即刻出來玩，呢日去溜冰！

佢地每次見面小不了相擁，真係好friend!! 

妹妮個甫士好似好pro咁呀！！

其實大家都只係識向前行下咁，妹妮以前都要推住企鵝溜，但係上過一次單對單溜冰堂就已經可以自己行，可惜無時間可以再學多d。Audrey又係學過下所以兩個自己搞掂！

妹妹Zoe就要媽咪拖住了

我地溜溜下冰撞見同學仔添下，但係佢地仲早過我地所以已經走左去食野

我地都玩左兩個幾鐘，其實都攰攰地，冰場都要清場，我地去書店hea下等食飯

因為呢晚約埋EE，姨丈同舅父食飯

呢晚食左好多野呀！！

不經不覺Audrey佢地要返美國了，因為佢地又去左幾次旅行所以今次暑假只見到兩次咋！仲要最後呢日佢地上機前先就到一齊食過早餐。

我地去左士多工房食早餐，無留意過呢度d奶茶原來係拉茶黎架！

d多士又幾好味噃！！

佢地三個有佢地傾，媽咪有媽咪傾。

好快就渡過左一個愉快既上午，係時候要bye bye了

希望好快有機會再去L.A. ，否則應該要出年暑假至見到了。兩個既友誼雖然相隔半個地球，但係都可以不變！

趁早，呢日同妹妮去睇Minions，妹妮大笑到碌地，呢d戲都係啱細路多d! 

反而Inside Out可能會好睇d 

Mother's Day 快閃Ocean Park

講返母親節，呢日有好友Jessica送左麥當當媽媽會既海洋公園飛，我地一家就有個好節目了！！呢日天陰陰，初初仲諗應唔應該去，但係決定去左先算啦！

正因為陰陰天，呢日好小人呀！好多遊戲都唔駛排隊！！

平時呢個遊戲起碼排半個鐘呢日都唔駛排隊，我地玩左好多遊戲呀！

呢個睇落無咩野但係fing到頭暈呀！

自從中學時代，已經無來玩過滑浪飛船同從來未玩過"新"起既越礦飛車，呢日玩晒之餘仲去連玩3次！！

好難得海洋公園唔駛迫，咁小人架！ 

妹妮而家好鐘意刺激，呢d先覺得好玩喎！

呢個翻天飛鷹都嫌唔夠激！

睇到海洋劇場，仲好前都有位！

玩左咁多遊戲，妹妮大滿足

去到鯊魚館，姐姐叫我地估呢舊下係咩黎？

原來呢個係鯊魚蛋呀！

玩左大半畫，係時候回程了，好彩連纜車都等得唔耐

搭過咁多次纜車，但每次上到去都會猛影相

去埋香港老大街返屋企，呢次真係算盡興而回了！！