復活節假期 之舅父生日lunch buffet

四月廿九日, 妹妮仲放緊假, 是日我地約左舅父德佢地食lunch buffet, 因為舅父德聽日生日呀! 妹妮早一日已經自動自覺畫左張生日卡比舅父. 舊年9月去朋友仔JJ生日會時, 見到另一個大過妹妮十個月既朋友仔Sana識畫生日卡比JJ, 卡上面又模仿媽咪先寫定既字, 當時已經覺得好amazing, 咁細個識畫卡同寫字! 點解妹妮唔識既? 當時妹妮未識畫畫架, 頂盡係畫圓圈咋.

大半年後今日, 妹妮都識畫畫了, 好似Sana咁畫張卡比舅父做生日禮物. 仲話要寫埋I LOVE YOU潻! 封面係火車, 我估佢係諗住THOMAS火車畫既, 有晒眼耳口鼻架. 上面個D係佈置party 既balloon同皺紙等.

一去到見到舅父已經第一時間要係個袋攞張卡出黎, 仲識講生日快樂!

見到公公又話掛住公公, 真係識撈!

舅父都比佢冧到!

EE同妹妮去揀野食, 不過無咩啱妹妮食

反而佢肯食tempura 炸蝦

再出去睇下有咩食先

都係食雪糕好!

個哥哥比左成三大球雪糕我地

最後梗係食唔晒啦!

其實lunch buffet真係食唔到好多野, 我都係樣樣食小小就算, 有好多款式都無食到. 妹妮無咩食熱盤, 反而食左好多生果

大合照後, 又各自去返工返學了.

復活節假期 之飲飲食食

話明復活節, 都買隻復活蛋應下節啦. 其實今次係第一次買復活蛋比妹妮架. 呢隻唔係kinda, 不過入面都有公主玩具架

仲有chu 姑 lik 潻! 真係有得玩有得食架. 唔知第時會唔會成日買kinda出奇蛋呢?

最近除左食腸粉仲鐘意食叉燒餐包同錦鹵雲吞, 可以食到成個架!

仲有鐘意食生果, 咩生果都咁鐘意食!

星期四, 我地去同公公飲茶, 妹妮又即席畫公公個樣

未去到茶樓時, 妹妮落車就問係咪同公公飲茶? 凡我話係呀, 佢居然話好掛住公公, 我叫佢一陣話比公公知啦. 佢去到茶樓就同公公講 : 公公我好掛住你呀! 真係冧到暈啦.

飲完茶仲有時間我地一齊去馬鞍山公園放電

仲帶埋上次去錦田買既飛天玩具(唔知叫咩名), 妹妮自己都識玩!

臨走時見到石春路, 即時除鞋要行下先安樂, 不過一踩上去即刻叫痛要走

好似好耐無練過小提琴了, 上過一堂之後因為復活節假期又停了一星期. 如果唔練下真係驚佢唔記得晒.

好彩佢無唔記得, 仲拉得似模似樣潻!

復活節假期 之摘完士多啤梨後

去完士多啤梨園已經攰到爆了, 但係又未夠鐘去同朋友們食飯, 於是我地去行下商場先. 妹妮梗係咋晒嬌要爸b抱抱啦.

不過去到franc franc, 又生猛番晒, 周圍走!

第一次入錢坐車呀, 以前都係做下樣坐上去咋. 你睇佢坐得幾開心! 姨丈聽到第一次入錢呢幾個字直情笑到肚luen. 估唔到爸b孤寒到5蚊都唔肯入!

爸b同畢叔叔撞衫噃! 其實兩件衫唔同架, 不過好似呀, 男版twins!!

大家坐晒係位時妹妮好悶呀, 托晒腮咁,

妹妮好鐘意照顧小朋友架, 見Ellie食飯仔即時醒晒, 仲唔客氣飛埋去幫手餵Ellie食呀

不過又餵得似模似樣既, Ellie又好合作肯啖啖食, 而且食得好快潻!

妹妮又好鐘意同康然玩啫, 次次見到康然都拉住佢玩

三個 do - re - mi, 3.5歲, 2歲, 1歲, 不過妹妮好似巨人一樣!

妹開心呢, 等康然同Ellie再大個d, 三個可能做到3劍俠呀!

復活節假期之strawberry hunt

4月24日, 今日節目好豐富呀, 一早去飲茶, 下晏約埋EE去士多啤梨園, 夜晚仲約埋朋友仔去食晚飯. 唔知係咪興奮得滯唔肯瞓晏覺, 點知一出門口上到車就瞓著, 搞到本來想去食個lunch先要焗住去買外賣上車食!

第一次去士多啤梨園, 不過知道已然係收成季尾, 應該無咩士多啤梨摘了. 一去到見到好大片草地, 好多人玩紙鳶, 踩單車, 吹波波, 不過我地目的係摘士多啤梨, 所以落田先

原來仲有分法國同日本品種, 我地第一時間去左日本品種個邊

其實今日天氣都幾熱, 又幾晒, 好彩今次黎左, 唔係夏天黎真係熱到溶左都似!

塊田得番唔係好多士多啤梨咋, 而且好細粒, 教妹妮慢慢搵d紅d同大粒d既

摘摘下開始熟手了, 同EE一齊摘, 仲識揀d靚既先剪!

呢粒叫做大d喇!

我地摘左小小就算了, 其實都志在試下玩下啫

當然仲有博命影相啦! 好彩姨丈帶部大機, 有人幫我地影下靚相

唔知點解妹妮識做個V字手勢影相, 但次次個頭都望地下, 加兩隻豎起既手指仔都拗埋一邊咁, 真騎呢!!

除左士多啤梨仲有番茄田呀, 不過都係過晒季, 無收成, 唯一幾粒都青BB既, 我地淨係摘到一粒咋!

去完農田, 食個雪糕涼快一下先

我地即時洗埋D士多啤梨黎食, 原來真係幾甜架, 一D都唔酸架! 唔怪得妹妮食左咁多粒啦

呢度仲有山羊同兔仔潻呀

我地買左包菜餵下羊, 原來餵免仔都係同一包菜架

不過只係$5一包抵到爛呀

跟住妹妮又話要畫畫, 於是幫襯D攤位玩填色, 揀鐘意既圖案, 唧D顏面料上去就得. 啱晒妹妮玩啦! 不過佢都係唔識唧顏料, 要EE同我幫下手

睇佢兩隻手指! 又V又屈埋,想點呀?

油好了, 然後拎去counter度焗3分鐘, 就會變成一塊膠貼, 可以貼係磁磚上面架

畫完畫妹妮見到有彈床跳又點會放過?

於是梗係去放電啦,  不停咁一仆一碌咁跳!

跳完彈床仲玩埋吹波波潻!

玩完吹波波, 妹妮仲未玩夠又話要玩紙鳶, 點知都係爸b有創意, 提議妹妮扮玩紙鳶...橫掂妹妮最近係學校學左樣野叫 '炸家E', 佢成日都話不如我地炸家e玩熟野食吖. 今次爸b又係話炸家e, 佢又順攤一齊扮玩!

玩到5點幾我地走人了, 呢度仲有得bbq架, 不過我地又晏出門, 初初諗住唔夠時間玩潻. 下次天氣涼d我地再黎過!

跟住去埋附近既紅磚屋, 之前睇過d網頁話好似跳蚤市場咁, 門口第一檔就係紅菜頭有機疏菜

 

但係行入去多數都係賣傢具既

入面有個地方食下d小食, 掃下街咁

呢碟潮式炸豆腐, 外面好似臭豆腐咁, 但係唔嗅, 入面又好嫩滑, 正!!

仲有燉蛋都好有蛋味同質感架!

玩左一個下晝, 因為天氣都小小熱, 所以都好攰了, 不過仲有下一場, 同朋友仔食飯呀!