有個好好笑既video, 有日同妹妮玩play doh, 佢叫我整條蛇出黎, 點知整左佢又驚到叫, 仲大嗌mami KILL it!!!! 估唔到佢咁殘忍呀. 不過最搞笑係佢驚到 woo woo聲, 真係好好笑. 而家話 don make snake, make caterpillar. snake is scary, caterpillar not scary. 咁 spider呢? spider a little bit scary.
繼之前rock & roll star形象深入民心, 今次趁啱啱學識唱世界真細小, 就日日不停咁唱, 雖然係聽我地唱而學識, (連我都唔記得d歌詞, 有時都係lur過) 佢居然砌到成首歌出黎仲好proud咁唔怕醜唱比好多朋友聽! 今次仲彈埋結他solo, 問你死未? 睇下佢彈結他個手勢都好過癮架.
時光倒流返生日前的一個星期, 我地一星期內去了兩次迪士尼, 可以話最後衝刺. 因為過往兩年我地都係生日日入去迪士尼買酒店連樂園package，再續annual pass，所以生日就係annual pass既到期日喇。
星期一(10。11日)
爸b當日去迪士尼開會, 我同妹妮就黃昏先入去樂園諗住趁仲用得個annual pass就去埋最後今次啦. 順便接埋爸b放工.
入到樂園都差不多5點了. 今次第一次單挑湊妹妮, 真係有d驚自己一個唔掂架. 因為以往妹妮成日扭爸b抱抱, 你知佢成36磅幾, 要我抱3分鐘都唔掂啦. 今日話明無得抱抱, 唔行就要坐車.
一去到即刻搵halloween mickey同minnie影相先, 今日算人少, 排一陣隊就有得影相, 不過妹妮見到米奇同米尼就好心急!
到我地喇, 咁啱今日著左紫色tee, 襯晒mickey同minnie呀
之後見無咩人排隊又排埋高飛同pluto
妹妮未食飯噃, 我去買個包先, 原來哈佬喂都有特別版麵包. 近排鐘意食奶皇, 呢隻蜘蛛就係奶皇喇, 成$24一隻!
諗住last一次, 去下d未去過既地方, 今次去睇golden mickey show.
原來有好多人物架.
妹妮睇到丫晒口, 拍晒手架. 見人拍手就拍埋一份. 不過有d情節好大聲同好黑, 妹妮就驚到要我攬住.
個show就幾耐, 成廿分鐘都有呀.
有齊晒迪士尼人物, 我諗d細路一定睇得好開心, 因為妹妮都猛話好睇呀.
跟住去玩下小小世界, 上次玩都成年前喇, 仲驚到喊咁滯, 今次問佢去small small world好唔好, 即時話yes! 點知一坐低見d燈光暗暗地又驚到要爬上黎.
不過聽落首歌都好輕鬆吖
唔駛驚啦, 於是咪開雙眼裝下
da da, 唔驚喇, 仲好proud咁話 i open my eyes潻!
玩完小小世界出黎, 咦! 見到爸b既
妹妮見到嗲d 好開心呀
就係咁我地只係玩左兩樣野就去樂園間美心食晚飯後就返屋企了.
*********
10。15 星期五
last call 之再 encore
今日本來約左公公high tea預祝我地生日, 不過我醒起今日係個annual pass最後一日限期了, 如果今日唔入去, 就唔知幾時先會再去了, 因為今年開始妹妮都要買飛了!
於是臨時甩公公底轉軚去多一次迪士尼, 都等唔到爸b了, 就我單挑帶妹妮去啦! 妹妮成日都話想睇parade, 但係次次入親樂園都成4-5點, 都過晒parade時間. 今日趁早, 我地趕3點半入到黎
仲有十分鐘就到, 又係得我同妹妮, 大人同小人兒, 大腳同小腳一邊等一邊影下相, 妹妮應承我唔駛抱架.
因為係星期五, 又有黑色迪士尼, 所以又有女巫mask, 妹妮成日要我同佢一齊'呢係個mask後面
是日天氣不錯, 又唔熱, 等多一陣都唔辛苦
終於等到了.
妹妮睇得好開心呀, 見到隻 flamingo仲指住話 : look!!! we have this at home!! (我地真係有隻咁既公仔擺係屋企電視機頂架, 妹妮真係好觀察力!)
去玩佢既飛佛木馬
影左幾張相就開始驚自己一個坐, 猛話 i don want big horse. 不過坐埋上去先知大馬真係坐得我個pat pat舒服好多呀.
跟住小飛象, 仲比我地霸到想要的黃色!!
d姐姐好好人,主動幫我地揸機影相! "V"
妹妮自己識亂咁控制潻
最近呢兩次經過winny the pooh都話唔坐, 上次坐完小小世界, 回程聽我同爸b唱世界真細小聽上癮, 而家自己都識唱埋一份!! 聽見有小小世界即刻要坐.
入到去都有d驚, 想爬上我度, 不過叫佢自己坐好, 再攬住就好似無咁驚. 又有人主動幫我地揸機影相呀, 唔該晒!
出到黎妹妮又話 have so much fun today, 我問佢今日玩左咩, 佢好認真咁recall番晒出黎! 仲記得上次爸b伙係門口等我地, 今日經過上次張長槣唔見爸b, 仲問爸b去邊?
好耐無見巴斯喇! 有成年咁滯了, 今次見到硬係影相啦. 妹妮離遠都叫住巴斯架, 不過一到我地行埋去就開始驚了, 連握手都唔敢. 要我抱住隔個身位先唔驚咋. 估唔到愈大愈細膽呀.
影完相我地去就近food court食了碗牛腩麵. 雖然成四十幾蚊碗, 不過幾好味, 妹妮食左一大碗麵, 唔駛好似上次咁捱麵包. 仲有一段小插曲, 食食下妹妮突然話要wee wee, 但係碗麵食左幾啖咋, 於是我叫妹妮坐係度等我, 我去攞個外賣盒打包先. 點知d阿姐又慢, 離遠見到有幾個姐姐圍住妹妮, 原來佢大喊! -_- 後來有個專人姐姐搵個蓋幫我地粒住碗麵, 仲企係隔離看實等我地返黎潻.
食飽飽我地去揸車, 呢樣都係好耐無玩過了. 個姐姐又好好人幫我地影相.
妹妮揸車揸得好過癮!! 真係成個男仔頭咁!
之後再玩咖啡杯
一路轉一路集中精神影相真係好暈呀.
再睇多次3d mickey show
今日都算盡興了, 要玩的都玩晒, 本來都想走了, 妹妮話要睇埋阿jack (佢居然記得阿jack!!) 仲記得阿jack坐係南瓜度
佢記得骷髏頭叫 skull, 但係唔記得排骨係skeleton, 記錯左叫 scale.
我地都等左成十五分鐘架, 街上開始有鬼怪出現, 行都埋黎妹妮好驚呀.
今次玩左成大半日, 妹妮好乖呀, 無扭抱抱, 又肯自己行, 又肯坐車仔.
單挑湊佢都好輕鬆, 我地睇埋巡遊就返屋企
臨走前, 諗起想買條白雪公主裙比妹妮, 因為睇過呢度d質素靚過反斗城個d好多! 問妹妮想唔想再去shopping, 佢話 yes, but i'm yawning...咁攰唯有返歸啦, bye bye 迪士尼, 希望好快會有機會再黎過啦!
兩位大帝生日了!!! 
(應該叫天后先啱! 我地係爸b心目中仲唔係皇后咁巴閉?!)
妹妮3歲了!!! 我就年年都廿五歲啦, 哈哈! 今日係天后誕呀, 哈哈!!!
過去兩年妹妮一歲同兩歲生日我地都大事慶祝, 入去迪士尼過夜加連玩兩日(係呀, 對我地來講咁樣已經係大事慶祝架喇) 今年本來都想再去, 又或然者去下澳門, 點知收到公司柯打要weekend加班, 灰!! 唯有睇下星期日有咩節目啦.
不過, 一早我地都去左飲荼, 妹妮一坐低就同茶樓阿姐講 : 我3歲喇! 驚死你唔知咁! 之後仲去公園玩一陣, 為今日既節目warm up下.
其實都係無咩節目架咋, 不過今日去了小白鷺玩. N年無去過負白鷺了, 淨係知道有間餐廳同有bbq, 今次再去, 多了羊咩咩. 仲可以餵草架.
嗱嗱聲買一包比妹妮餵下先, 我地叫妹妮摸下d羊咩咩, 點知佢話d羊dirty, 不過餵草就ok
仲餵得好開心潻, 一包都嫌唔夠
d羊都有大有細架, 有幾隻bb羊好細隻咋.
小朋友大部份都好鐘意動物, 可惜香港又真係咁小地方有得睇. 搞到我地去親旅行都要預最小去一次動物園.
跟住我地去到湖邊, 妹妮識豎起3隻手指仔
做咩呢?
咪就係去牚艇囉! 幾浪漫
點知爸b係癈柴同盟主席, 居然牚唔郁! 真係後悔拍拖時無好似我媽咪後生時同公公拍拖去牚艇仔, 無考驗下爸b, 唔知原來咁鬼渣!
都出到湖咯, 可以點呢?
咪由我牚囉! 其實我覺得好簡單, 幾易牚, 但係爸b就get唔到點樣去牚 -__-
連妹妮都話要牚埋一份
好啦, 就兩個壽星一齊牚艇啦
hello 爹D
今日招牌手勢係 3
牚了卅分鐘就上岸, 好彩今日天氣涼爽, 又唔算晒!
我地再係草地走下
點知愈叫愈走.
呢度仲有個好細的室內彈床同有d DIY小手工呀, 妹妮跳足廿分鐘先走人.
影埋全家幅先
玩夠後我地出番尖沙咀食晚餐, 今晚都無book位, 是但入一間餐廳, 去了Quarter Deck. 之前同朋友食過生蠔同意粉都覺得幾好食. 今晚仲有頭盤+甜品buffet, 任食生蠔, 正!!!
不過傻妹唔識食生蠔就食檸檬
壽星女sssss
main course有牛扒, 不過就無明火grill個d咁好食.
爸b食羊膝, 妹妮就成晚hyper咁又嘈又郁, 想食餐好既都難.
既然食得buffet, 又點會再有birthday cake吖, 所以食個香蕉蛋糕算了. 最蠢係原來公司送左一張一磅蛋糕coupon, 都唔記得換黎食! 搞到正日無蛋糕食潻!
