今年情人節有花收！呵呵！！

情人節，我地近年都帶埋妹妮一齊去慶祝，前幾年佢仲細時，都係等妹妮上床覺豬我地先出去食飯。今年情人節係星期五，妹妮放學後上完畫班我地一齊去食飯！

因為一早無咩準備無book位，呢日臨急抱佛腳只有食中菜至會有位，我地去左小南國。其實有得出街叫做慶祝下，感覺唔係同平日一樣放工返屋企食飯就已經滿祝，所以食咩其實係其次了。

呢晚連小南國都full full地！加上放工就黎無帶相機，所以係餐廳無點影相呀，反而食完飯係商場妹妮見到d馬居然叫我地幫佢影相！！

佢話d馬好靚喎

一入到門口見到有扎花呀！ 爸B已經有N年無買花比我喇，拍拖頭5年都年年有花架，仲要除左情人節，生日，仲有間中都有花收下，已經習慣左無花收，居然今年有！ 因為成日返左工都無機會見到。唔怪得係商場時妹妮聽到我地講緊買d 花返屋企插，佢話爸B都買左花啦！我都不以為以，仲以為係買左新年時插果d百合潻，因為都無諗過會買扎花朿。

呢幅日間yaya幫我影低既

唔知點解妹妮好似仲興𡚒咁，去相！多謝爸B，happy Valentine's days!! 

慈善步行

2月11日開學日，呢日其實都未叫開學，雖然係新年假後第一日返學，但係就係慈善步行。今次搵左公司同事捐輸，都籌左成4百幾蚊架。以前幼稚園學校旅行有得比家長去，而家學校旅行家長無得跟。今次步行家長可以同行幾大都跟埋去啦！！其實妹妮同媽me呢日都有d感冒未好，不過當去玩下行下散步無所謂啦

點知呢日得6度咋！！仲要去d郊外行，好彩帶左帽比妹妮戴咋，真係要包到實至得

呢日去左近科學園既白石斛海濱長廊，小一就可以比家長陪同，出年無得跟架喇！佢地一年一度學校旅行都無得比家長跟，只係派返一兩張相比我地睇下咋。

同妹妮自拍合照先，呢日真係好凍呀

觀察所得，妹妮都係被動型，見到同學玩唔會好主動走埋去，只會旁觀笑埋一份，但係有朋友仔叫佢呢，就會埋去一齊玩。點解唔主動d呢？

呢度係科學園入面，對正馬鞍山，真係風涼水冷呀！我地要步行1.5公里，其實就唔係好長既。不過係大風d個個都縮埋一舊咁行

因為無諗過今日凍成咁，所以都無比妹妮係簿羽絨外再著校褸，但係一早驚有雨，反而帶左件雨褸，唯有照著住當擋下風啦

中途又再合照下

d朋友仔一邊行都有一邊玩，有幾個特別friend就手拖手一齊，但係妹妮好似成日都比較無咁埋堆既，都係自己行，但係見佢又好似好enjoy咁。

可能細路仔血液循環得快，行行下妹妮個臉已經紅晒，仲有d出汗潻！但係我就仲係好凍，雙手一直要插袋

中途見到望遠鏡大家都排下隊睇

妹妮話見到對面馬鞍山，但係就見唔到公公住果度，梗係啦，比d樓擋住吖嘛！

之後都有小休，我地將全盒d糖果帶晒黎，等妹妮請下同學仔食，加上屋企都無人黎拜年所以d糖都無人食

行一陣有小休，又停下大合照，其實一d都唔辛苦

雖然妹妮係班入面比較文靜，但係同朋友仔都get along到，平時聽佢講返學都好開心，都已經算係咁。只係擔心佢返到學校無朋友唔開心啫，好彩妹妮又肯講下心事比我地知

途中都有同老師傾下偈，佢話妹妮平時都有特別同幾個同學仔friend d，小息都有朋友仔一齊玩，唔算孤獨。

行完之後我地等爸B黎接我地，有d同學仔唔跟校車可以自行離開，我地同幾個同學仔就去左附近超市一邊行一邊等爸B

妹妮見到咩都話要買黎食，不過爸B好快就到了，我地同同學仔再見了。而家上到小一，其實家長參與比幼稚園小好多，都唔知係學校係點，所以有今次呢d可以比家長去既活動都好想去，希望再搞多d啦！

goodbye my love

今日3月16日，大肥離開我地上天堂了。

大肥係1999年10月10日出世，佢有出世紙架，點知前幾日爸B問都唔問下居然掉晒所有大肥既証書，連以前參加過CFA貓展攞左Champion既cert都掉埋！一d紀念都無了

我地買大肥時佢得9個月大，係由細到大都好嗲，任摸唔嬲，成隻識郁玩具公仔一樣。不經不覺活左14年多了！大肥細個時，我地帶佢參加過貓展架，大肥當年都攞過Champion架，係CFA(美國貓會)有title架！但最令我地愛錫係佢成隻狗一樣咁嗲既性格

除左大肥，我地之前仲有隻'哥哥'小肥架，因為買左大肥，小肥反而失寵因為小肥比較有貓性格，大肥就狗性格。小肥就無咁好彩，前年趁媽me出trip時跳左落街自殺。。。我地都唔知佢有事

妹妮細個時我地都小比佢同貓接觸，但大個左都多左好多同大肥玩架，佢都好鐘意同貓貓玩

妹妮大，小肥第一次接觸

早前yaya都有幫佢兩個影相架

其實農曆新年時，EE黎拜年時發覺大肥個鼻好似有d咯同左，我地先留意到去睇醫生。原來大肥個鼻入面充滿晒膿，可能係鼻痘炎，又可能係有cancer。睇左一個月醫生，但係都無好轉，反而最近呢個零星期佢身體狀轉差好多，醫生都叮囑過我地可能要考慮比佢走。。。但係又點會捨得呢？於是前日再去睇另一個醫生，希望試下中藥西藥雙管齊下，加上驗血報告顯示我幫大肥餵食後指數都好左好多。反到屋企餵藥，餵食都好似易左，心想好樂觀！點知今日同妹妮游完水返屋企，見大肥好似抽筋咁，又扯晒吓咁。當時真係不知所措，唔知自己可以做咩幫佢減輕痛苦，只知留係身邊陪住佢。最後決定帶佢去診所。。。其實去得診所都知道係要送佢走，但係真係唔忍心見佢咁辛苦，同埋就算返到屋企，可能幾日後又會再抽搐，到時我地無人係屋企點呢

最近鼻上面已經自動穿左兩個窿比d膿走出黎，加上星期二覆診，知道原來胸腔入面都有個腫瘤。。。

我地11點半左右送大肥去到診所，要講再見了，雖然呢幾個星期已有心理準備佢好快要離開我地，但係真係十萬個唔捨得。。。妹妮都知大肥好快要上天堂，但從來都無認真覺得會係事實，呢日我地一齊去送別大肥，妹妮都喊了，佢仲比我喊得多。。。臨走前我地同大肥再影多張全家幅，大肥一路好走，去到天堂要同小肥一齊乖乖地呀。

爸B同妹妮離開左診室，我親眼睇住醫生替大肥打針，幾秒間大肥已經唔再辛苦了，好似瞓著一樣，去左天堂了。

大肥永別了，但係你永遠都會係我地心中，我會懷念同係一齊生活既日子，希望與你夢中相見。。。