11個月大喇！

妹妮今日１１個月大喇！所以安排咗一個好有意義嘅活動...就係同公公嫲嫲去飲茶嘞！！其實公公一早就提議約嫲嫲飲茶，因為同爸Ｂ結婚後佢哋都未再見過面了。不過我想等埋爸Ｂ先，但爸Ｂ又要返工走唔開。於是媽me決定如期進行，就趁妹妮１１個月生日呢個特別日子等兩老可以同妹妮慶祝吓...係咪好有heart呢？

yayaGigi又幫妹妮創作新髪型，加咗夾仔。其實我覺得幾...怪鷄，因為得嗰幾條毛仔，不過今次已經無以前咁核突，就由佢啦。妹妮而家已可以坐bb櫈，唔駛人抱，仲會自己餵自己食飽飽，好醒嫁！仲要認一陣人先肯比公公摸手仔嫁。

公公、嫲嫲同yayaGigi，今日叫好多點心，妹妮都有食齊腸粉，馬拉糕...

仲霸住籠叉燒飽潻！

呢兩個星期，妹妮都學到新嘢呀，就係聽指令嘞！

Massage!! 聽到massage就會跁喺度，等你同佢按摩嗎。

仲有behave潻！只要叫佢'behave yourself'佢雙手就會搭埋放喺胸前，yayaGigi話教咗成個月嫁！