迷你Ｂ聚

話咁快就踏入十一月了，即係我家喜慶月十月已經完結了，一切又回恢‘正常’。天氣開始涼，又係換季時候了嘻嘻！

等咗幾個星期，因為上個月自家每個週未都occupy晒，今個星期終於有時間／機會去探新生BB~JJ了！今早schedule如常，一早同爸Ｂ去茶餐廳嘆早餐，之後返屋企幫妹妮洗白白，食粥仔，瞓覺豬。瞓完覺豬就起程去！

而家妹妮識行，去到auntie Wendy屋企已經可以自己行來行去。首次見面，見ＪＪ飲緊奶奶，妹妮唔陌生，仲好friendly咁走埋去摸吓ＪＪ。ＪＪ已經５個星期大喇，而家睇慣妹妮嘅晒士，就發覺ＪＪ好細粒，不過好得意呀！一年前妹妮都係咁細粒咋，我都係覺細細粒嘅ＢＢ得意Ｄ。而家妹妮隻肉手已經係大隻晒，ＪＪ嗰隻好迷你好cute架。

今次探ＪＪ居然係妹妮滿載而歸，Eldora 同Wendy姨姨都有生日禮物比妹妮呀！好嘢！！連媽咪都有禮物呀，多謝晒

輪到Jose叔叔抱ＪＪ覺豬，Eldora姐姐旁住妹妮去睇吓覺豬緊嘅ＢＢ

妹妮好小去人哋屋企，不過今日就好淡定，無喊之餘仲當正自己屋企一樣週圍行參觀。Jose叔叔要幫ＪＪ掃風，Wendy就幫手陪妹妮walk walk。你知啦，唔睇住佢妹妮分分鐘會將‘paul’樹搣清光架！

又係時候報告一吓妹妮嘅近況，星期四妹妮做咗一歲check up，除咗磅重度高，仲評估活動能力等，情況令人滿意。而家妹妮已經２３.２磅，高７７CM，護士填返落紀錄簿先發覺個磅數係９７%，高大約係９５﹪...即係話佢喺一百個一歲小朋友入面係第３個最重，第５個最高嘅。其實出世時只係7.2磅，屬於中大碼Ｂ（約７５﹪）高就一直都係９７﹪。但原來不經不覺間已經大得好快，變咗大碼Ｂ。妹妮睇落去一Ｄ都唔肥，唔大舊...唔知係咪應該叫yayaGigi唔好比咁多嘢佢食呢？

去到健康院都不忘撩吓其他小朋友！