9.17 仲有一個月就三歲喇!!今日興祝下最後一次屬於兩歲既生日, 我地又偷時間鼠入迪士尼!! 最開心莫過於妹妮了, 因為而家屋企有disney channel 睇mickey mouse club house, 開始迷上mickey mouse! 不過elmo, barney一樣咁愛既.
差唔多去到時, 望下妹妮, 嘩! 你做咩呀? 佢話 'don"t look at me, i'm mad' ...
可能佢以為好型, 全程都繞住手+八字眉, 不過其實係好開心有得見mickey mouse就真, 叫佢扮mickey mouse, 即時打開雙手做個人型V字, 不過扮完又繞番埋手
今日剛剛開始黑色迪士尼, 有女巫傳單, 妹妮當面具戴!
上次無同donald, daisy影相，今日一見到人就擺晒甫士，繞晒腳
見到chip & dale就要繞住人隻手
而且好sweet，臨走要去hug 下人先bye bye
真係太熱，我地影完相入去鋪頭過下冷河，妹妮而家行街會見到野就擸住話I want this one！好彩佢都係want一陣，轉頭就忘記走開
呢個巫婆帽佢好似好鐘意咁噃。。。其實係鐘意照鏡見到自己就真
妹妮自從返左K1後，講多左好多廣東話，其實都係返左兩個幾星期咋！有時問佢做咩呀？佢會答番 ： Mo 爺呀 （無野呀）
笑死人！好似呀差廣東話一樣，D音歪晒既！
講得最多就係‘呢個呀， 呢度呀’
今年我地算黎得多左喇，7月，8月都有入場，計埋呢次有3次，無蝕呀。因為上兩次去去fantasy land個邊，今次去下adventure land呢邊玩下啦，上次過黎呢邊係兩歲生日個次喇。
我地玩下坐船，今次大個左識多左野，應該覺得好玩啦
睇下動物
點知都驚到要揞眼！！愈大愈細膽呀
玩完差唔多6點，我地今次去食個晚飯先。妹妮一路唱歌一路扮嬲，原來又係barney的錯，佢係咁扮嬲原來係barney有首歌，其中句歌詞仲係you can see me angry on my face。唔怪得無啦啦成日扮嬲樣啦，真係吹漲！！食食下飯仲話自己出去行街先（？）佢話want to buy something喎，咁我問你想買咩呀？妹妮就用手遮住一半口好似講秘密咁話 ：mami，wisper。。。I want to buy a mickey mouse hat。
邊頂mickey mouse帽呀？ 爸B話應該係之前個頂女巫頭箍喎。 不過妹妮D對話真係好鬼搞笑呀。
飯後較啱時間出去等parade，因為妹妮成日話要睇parade架。
不過今晚係黑色巡遊，應該無平時個D咁得意同卡嘩而！
今晚好多人，好彩早左15分鐘霸位，兩邊街都迫滿人，我地等緊之際又影下相自娛。加上今次呢部係爸B新買無耐的LX5，試下影夜晚效果嘛。
見到阿Jack了，其實每年都係呢個阿Jack行頭，個巡遊大致都同前幾年一樣，無變過。
我地妹妮一歲開始睇呢個parade，因為我地生日仲係halloween前，今次第3次睇了，反而識驚！！又咪晒眼又揞晒耳仔
見到米奇先開番眼咋，都唔明點解咁鬼細膽
跟住玩埋太空飛船
同佢最鐘意既玩水，今晚較小細路玩水，睇住佢自己一個走來走去好似好悶咁，於是陪佢玩埋一份。妹妮見我去同佢一齊玩水好開心，即時拖住我一齊周圍踩水。
好快又9點了，我地今次無走出去大街睇煙花，我地想去玩木馬，點知封路，於是就停低睇煙花。樂園派左個3D眼鏡，今次都係天使呀，不過影得無上次咁清楚
煙花後等左好耐都未重開木馬，我地玩honey pot先，妹妮每次都話要坐，但係又咪埋晒眼咁！
lee 太！（即妹妮話：你睇）成程就係張個頭呢入我手度！
叫佢都係微微張開條線咋
last就係玩dumbo嘞！本來想玩埋木馬架，但係因為太耐都未重開，加上妹妮已經出現疲態（猛捽眼同打喊路），雖然猛話唔攰，但係一坐落B車說要瞓到最低。唯有拿拿臨走路返屋企啦，生日前應該都唔會再黎了，生日後3歲就要入場卷了，到時可能都唔會再買pass了，迪士尼幾時再見呢？
No comments:
Post a Comment