甩牙仔

4月21日, 簡直係一個紀念日，因為妹妮甩第一隻牙了！！！ 上個月老友Sana先甩左隻牙，當時Sana係因為有牙出頂甩舊果隻。無耐妹妮有朝就好興奮咁話自己隻牙開始郁喇，佢真你好興奮架！ 其實真係無諗過佢咁快會甩牙架，仲諗住係上了小學6，7歲先開始甩，點知5歲幾就想甩牙！

4月21日 星期日，我地如常去食花花腸仔早餐，食食下妹妮話隻牙好鬆呀。爸B睇過仲話其實已經甩架喇，不過仲"叮"住左，返屋企幫佢mok出黎。仲講返細個用線綁住隻牙然後嘭埋門隻牙就甩左，真係聽到都好驚，更驚佢會咁樣幫妹妮mok 牙! 點知食多兩啖米線，妹妮隻牙已經甩左出黎！好開心可以見證到呢一刻呀，因為如果係返左工，就見唔到佢甩第一隻牙既呢個情景了。但係仲未有新牙仔想出架，真係無啦啦點解咁早就甩呢？？



我地猛讚佢好勇敢，又唔驚又無喊！！妹妮自己其實好似好興奮，佢話都有幾個同學仔甩左牙了，可能係咁所以有晒心理準備，一D都唔驚啦！反而我拎住隻牙仔有D心驚膽顫，隻牙仔好細隻呀！估唔到細隻得咁緊要

泊埋個一蚊就知有幾細，我地將隻牙keep住左呀，唔知keep得幾耐之後會唔會無啦啦就唔見左呢？



爸B買左奶咀糖比妹妮，睇下佢嗒住奶咀似唔似大BB？

前排學校有個小project，同學轉流帶呢隻Barnaby Bear返屋企兩日，然後記得同佢一齊做左D咩。有D同學係weekday帶返屋企，妹妮好彩係星期5，所以有成個weekend 可以帶住Barnaby Bear。第一日yaya帶妹妮去上興趣班已經開始影左D相了，星期六出街當然再帶埋bear bear去啦！妹妮扣安全帶都要綁埋佢一齊

份project已有半班同學做左，前面有D參考係點做，大至上係影下相，寫下呢幾日一齊做左D咩咁。妹妮去到邊都帶住隻bear bear 

我地仲影左好多相架，Burnaby bear除左陪妹妮去街，仲一齊彈琴，沖涼同食飯潻

睇下佢碌來碌去，以為我唔會貼呢D相

初初話唔準用呢張，驚比同學仔笑佢，我話大家一定覺得佢funny就真啦！先準我貼

錫錫Bear Bear

星期六去公公家晚飯仲介紹埋比公公識潻，bear bear呢幾日真係節目豐富呀！！

妹妮自己作左呢編日記，全部都係妹妮自己想寫既野，媽me見唔啱先修改下, good work! 其實妹妮仲有好多野想寫, 不過只限一版紙加上大量相片 (我地見之前十幾個同學果d無咁多相), 所以都無位寫.  突然諗起妹妮呢個星期甩牙, 點解都唔寫埋落去, 當做個紀念吖!