熱爆 長隆佛誕遊 day 2 動物園

仲諗住妹妮尋晚夜瞓今日係酒店拉晒窗簾可以瞓得晏D潻。點知個妹妮準時7：15自己瞓醒！！約好大隊8：45分食早餐，所以我地係房攤下抖下慢慢落餐廳。今日去動物園，未去已經畫定晒想見既動物。

點知8：45分落到餐廳，門口已經排左長長人龍了！好彩朋友一早霸左位，我地可以直接入坐咋！呢餐早餐話有白老虎陪食早餐架，未入坐已經有白老虎陪影相

悅悅住我地隔離房，所以同妹妮特別friend，見到妹妮黎食早餐已經密密斟！

呢日坐個位唔近白老虎呀，聽日再睇過啦！

是日去動物園，大人走去買飛先。因為酒店包每晚兩張入場卷，我地尋日又睇馬戲又去歡樂世界已經用晒。好彩妹妮同其他朋友仔都唔駛買飛！力恆哥哥本來夠高要買飛，點知又有個promotion呢日免費入場，正！

幾個女仔圍住就係貼耳環貼紙呀！

出發去動物園，要搭架shuttle架

一出室外已感受到呢日太陽既熱力，真係又晒又熱，好似比香港更熱！

妹妮其實熱到連帽都唔想戴，係因為影相先戴住一陣咋！

一齊跳下吖！

不少得的團體照

影多兩張妹妮都已伸晒脷， 成隻hot dog咁

可能太熱了，妹妮無晒mood，叫佢再影相都唔制，要去推BB車。其實思行細過妹妮大半年，下個月就5歲，但係好似相差好多，細好多咁

沿路行一邊行一邊都有小動物架，但妹妮拒絕影相。

呢，左邊樹就有隻小馬騮了

一路行又有另一種猴類

又有河馬，見到佢地浸落水咁舒服我都好想落水呀！



妹妮已經溶左，笑唔出樣了



我地已經拖慢腳步，又買下凍飲，因為除左細路，我地都滴晒汗呀！

好彩有帶遮擋下晒咋！！

經過間餐廳門口有冷氣吹出黎，忍唔住要涼番一陣呀！！

成班細路企晒係餐廳門口抖暑呀！仲有熊貓同你影相

行落去有大象睇，呢度有好多大象架！但騎大象要成100蚊人仔！

騎小馬都係30蚊啫！

妹妮以前去大棠荔枝園都騎過大馬，呢隻細好多！

入動物園都唔小得要花＄餵下動物了，好彩D草＄10啫

想餵大象都得架，有蕉賣，但我地無餵了

反而走去睇大象show，d 大象其實真係好聰明架！咁難既動作都做到，但係背後一定受左好多苦先練到咁叻！除左倒立，佢地仲識踢波，甚至寫字！

因為室外關係，我地一邊睇show一邊溶左

之後返去餐廳食晏，呢度一係食自助餐一係食set lunch，因為我地太多人所以自助餐有排等位，於是食set lunch算了。呢度set lunch比尋晚食馬戲飯堂好小小，不過都唔係太好食，求其醫左肚算了。

玩埋旋轉木馬又去睇白老虎show

估唔到動物園入面都有兒童樂園呀咧！

白老虎show有成十幾隻白老虎表演，見到佢地一隻隻大貓一樣真係好得意。其中有幾隻表演完想打交，爭開晒口其實真係幾兇惡架！

睇完show出到黎見到黑熊仔，尋晚馬戲時見到D黑熊好似人咁行路真係好搞笑架。可能就你細細個已經好似呢幾隻咁日日練習雙腳企起

呢幾隻可能係BB，好cute呀

行行下見到長頸鹿，又要破費買樹枝喇，點知妹妮一下就被長頸鹿擔走左支樹枝！！人地拎住唔放，隻長頸鹿就慢慢食晒D葉架！

再餵時可能長頸鹿食飽晒，我地fing左好耐先引到一隻走埋黎食呀

行左好耐終於到目的地，safari ride喇！！！有車坐唔駛行

沿途有好多區域見到好多動物架！有獅子，老虎，不同種類既鹿，河馬，犀牛等等。。。

導遊話呢隻BB鹿得幾日大架咋！

睇完safari ride已經成5點，我地頂唔順了，返左酒店沖涼休息準備出去食飯。妹妮今日夠時間沖泡泡浴，不知幾開心！

呢晚我地出外面食海鮮，於是叫左兩架街車接送，其實我地有廿人分兩架車但係唔知點解佢地13人塞晒上一架度！我地另一架得7個人，見佢地咁迫，好搞笑呀！

就係呢度喇，朋友話呢度係酒家＋酒店，好似好大規模呀

入到去成條街一樣，想食咩就叫咩

連鱷魚肉都有得賣架！

呢晚我地包左房坐兩圍，淨係細路都食左一圍了！

佢地食飽飯自成一角玩，我地大人慢慢食。本來呢晚大人想去揼骨架，點知酒店spa居然無位！！！我地唯有去lobby 酒廊飲野啦，好掃興呀！