再見了。。。幼稚園

7月18日，妹妮最後一日返幼稚園了。我同爸B都覺得呢一日係好有意義，除左係一個階段既終結之外，因為之前妹妮已經成日倒數仲有約多日同同學仔相處，真係幾傷感架，所以呢日我地一齊同佢返學，唔搭校車，去見證妹妮既last day of kindergarten。我地無坐校車，但同校車差唔多時間出門，校車同學仔見到妹妮大家都開心到揮手say hi!



返到學校，急不及待走入校門

呢日好熱閙架，平時每兩個月一次bi monthly既生日會，我地都可以著自己衫返去。而且成日都會撞正halloween，聖誕，農曆年，復活節等等既節日，次次都可以有theme黎著衫，呢日last day party，學校特別要求我地著校服返去。妹妮每次都話party有好多野食，好開心！今次佢要求yaya幫佢整意粉帶返去開party。

呢日好多家長都有親自帶同學返學，仲有帶埋細佬仔，老師見到BB抱住唔放。

其實唔只老師鐘意BB，家長同小朋友都擁住埋去想摸下，抱下，掂下

妹妮同同學仔影相，呢一年佢同全班都好friend呀。記得舊年班上有幾個特別曳，又無禮貌既。妹妮都有話比我地聽某D同學唔侵佢玩，但係今年佢日日都話同呢個，同果個玩，成班同學仔都好融洽，聽到都好開心呀！

特別鐘意呢幾張相，好似D大學生畢業果D相！

班主任之一Ms Skye，妹妮都好鐘意佢架，Ms Skye教左佢地好多野，除左基本英文外，仲有好多課外智識。佢地連太陽系，8大行星都識埋，比媽me更叻呀！

校鐘響了，老師好識做叫晒同學仔出花園排好隊比我地影班相

睇下大家幾開心，就知佢地都無離愁別緒。我記得自己細個時都對離校無咩大感覺，但係一諗到大家各𩣺前程，以後都唔會再返黎上學，就覺得好傷感，可能係我地大人先會咁‘簡性’

影完室外再影室內

影完相排隊去洗手間

家長就係時候要離開了，爸B幫妹妮同佢幾個好朋友影左好多相呀！

11：00放學了，真係要告別校園了。呢日好多家長接放學，條隊比平時長好多，見校巴經過都係得返小貓幾隻坐係校巴入面。

影相不忘玩下搖搖板

走出又走入，又返班房黐下老師

老師突然擁佢入懷，叫妹妮記住多D返去探佢呀，呢一刻，我鼻子一酸。

之後再同舊年一齊同班既同學去搵K2時既班主任影相

“我地幾個一齊大架！”

舊年K2既英文班主任

再返兜再影相，點都唔肯走。呢日個個同學同家長都懶死唔走，不斷影影影

搞笑既Mr Stan

真係到最後一刻要出門了，係門口都仲懶住要再影唔走

再見了母校，從此呢度係妹妮既母校了。妹妮初初入學一刻，就算同佢面試果一幕，都瀝瀝在目，好似無幾耐前發生既事，時間真係過得太快了。一面希望佢快高長大，但又好想好想佢停留係呢個幼稚園，最得意既階段，真係好矛盾呀。

個個家長都好唔捨得呀！但係都有別離既一刻，相信妹妮以後努力讀書，做一個出色既人就係對老師最大既回報了。

本來呢日有家長提議放學後一齊食晏，可惜好多同學都可能有堂上，或家長要返工組唔成隊。不過而家資訊科技發達，我地班已有whatsapp組群，隨時搞活動又再聚頭。我地同妹妮其中一個成日玩既好朋友gigi去食晏，兩個女仔老友鬼鬼好開心呀！！

返到屋企拆禮物了，嘩有好多小禮物呀，希望咁多位小朋友友誼永固，前程錦繡！