為食小廚神

趁妹妮仲放緊復活節假，一早陪佢睇左太Rio 2。 見到呢隻香港仔咁搞野影番張相先！

妹妮次次睇戲都好嘈，笑又大聲，一d驚嚇場面又會話：媽me好驚呀，把聲又響，成間戲院都聽到！但係見陌生日又可以收埋把響聲，得把雞仔聲，吹漲！

睇完戲去食壽司，食食下妹妮話個壽司師傅似"安培進三"。。。吓？？我自問唔留意時事，平時都係聽新聞多d，安培進三咩樣真係無咩印象，比佢咁講真係有d滴汗！

都唔記得點解會話整蛋糕，好似係有次妹妮提起千層蛋糕，我話自己試下整都得架！於是，走去買埋材料返屋企整千層蛋糕了

網上download receipe，好似好易整之嘛，妹妮就梗係要幫手啦！

小心翼翼加材料做粉漿，材料加加埋埋好大杯呀！我地個兜都唔夠大

• 蛋4個
• 鹽1/2小匙(2.5g)
• 糖3大匙(37.5g)
• 牛奶2杯(480g)
• 液態油2大匙(28g)
• 低筋麵粉2杯(240g)
  
  

妹妮負責搞搞震

已經搞到好滿，其實搞好後就咁煎已經係crepe 了

但點解妹妮好似搞唔掂咁既樣？我都唔記得了，可能係滿得滯，搞到流晒出黎呱？

終於搞掂可以落鑊了！！最期待玩呢一刻，平時係街見人地整crepe好容易，可惜工具有限，我地只可用隻平底鑊煎

而隻平底鑊又唔係好平，最初都試左幾塊先開始上到手，但係鑊中央有d 下陷，所以塊餅中間最厚了

我地第一次試做懶打cream，用左即唧既whip cream，所以唔夠厚。如果自己打cream應該會好食好多。不過整好後雪左一晚，效果都好似樣架！！係食時要加多d whip cream囉。自己打cream就更正喇

不過妹妮食自己既製作，都食得津津有味架！

隔左無耐又手痕，呢次整湯丸！

糯米粉 110 克

水 100克

黑芝麻 25克

白糖 25克

牛油（奶油butter）1 1/2湯匙

本來好地地架，但係加極水都唔夠咁，於是一加又太多。。。唯有加粉溝番均啦，點知加左成半包粉先加得均呀

呢次其實又係第一次整湯丸，整芝麻餡好似好麻煩於是整左朱古力餡，買左包明治朱古力。

粉團開始成形，對妹妮黎講搓湯丸真係piece of cake 啦！！同玩play doh一樣之嘛

摵開d朱古力鑲入粉皮入面。。。而家先發覺太小朱古力了

包好佢搓圓就得喇！

妹妮成個工廠女工咁不停手搓

好似包餃子咁，用手指公壓下粉團比朱古力瞓入去，好熟手呀

搓下搓下，本來一早預算整十粒八粒玩下，搞搞下整左好多呀！

煮完食既份量仲有得打包潻！

煮好了！！

食落個皮都幾煙靭架！係d餡唔夠多，下次要試整芝麻餡先得！

妹妮每次都好enjoy食自己整既野食，不過佢本身好為食。。。其實係唔係自己煮都無關係 :P