台北之旅 Day 1

媽me同爸B自從11年前(沙士果年)去過台北影婚妙相之後就無去過台北了！近年爸B因工作關係返而間中要飛下過去。今次近年尾妹妮開始放假，我地就去過短短既4D3N台北玩下食下啦！爸B話台北過年氣紛濃厚，花市有好多野賣好熱閙架！

今次搭中華航空，因為好後期先決定去，所以好多機票已經漲價了，難得中華比較上經濟小小。最奇係妹妮叫了小童餐，比大人餐更豐富更多野食！除主餐肉餅意粉外，有麵包，果汁一盒，朱古力bar，沙律，生果拼盤。反而大人餐只有炒麵一盒同清水一杯！！連生果，麵包都無，真係奇怪，不過難得個炒麵算幾好食。一個半鐘就到達台北了！！！

我地今次選左搭巴士出城，大約一個鐘左右到了

今次入住台北香格里拉，呢度d人叫佢遠東飯店，一到步爸B話肚餓於是去左樓下food court食左d小食。妹妮特別鐘意個愛玉豆腐花d愛玉，好似jelly喎

平時係香港我地都有食下肉燥飯，黎到更加必食，不過妹妮嫌跟香港果d有唔同味

上到房間了，尚算舒適。雖然搭左一陣機，但係tun 出tun入都好似好攰咁。本來爸B一早安排呢日去淡水行下，但係check 埋in都成3點幾又嫌有d晏，因為我地book左7:30晚飯，於是都係去買下手信就算了。

聽妹妹同爸B都話覺得'佳得'鳳梨酥最好味，仲話要排隊買架！我地呢日就搭的士去買手信，順便入貨拜年用。原來真係要排隊，都有幾十人排，好彩又唔算排得耐，條隊好快向前行

入到去，主打都係鳳梨酥，爸B本來想買老婆餅，點知都賣晒了。真係咁搶手？

平時爸B出差都有間中買下返黎食，呢日新鮮買完當然即刻要食。本來妹妮見到咁多鳳梨酥，仲一手擸住幾個話要買30個比同學仔！

買完手信擺好返酒店就出發行下等食晚飯。原來酒店好近通化夜市，於是我地經通化夜市行去晚飯地方。。。101 附近

呢個時候6點幾，夜市可能剛剛開，所以唔算好多人。爸B話呢檔壽司唔知點解好受歡迎，又真係見到有人排隊買噃

多年無來台灣，呢邊d野食真係比香港平好多，我地逛逛下就去食下臭豆腐，新鮮炸起又幾好味唷！

離遠見到101, 當然要影下相！我地十年前都未有101架！妹妮d恐佈動作又來了！！＠＠

行經一個叫'好丘'既小市集，入面有好多小手工藝賣架

呢度好似個小舊鎮仔一樣

好多小工藝品都幾靚架，但係我地忍手一件都無買

行到101了，其實101全都係名店，反而唔係好啱我地行，去到台北梗係買下地道野好過啦。

逛左一陣就去食晚飯了，呢晚食醐同燒肉。初初以為有咩特別，原來係碳燒，好似有d風味噃

明太子唯山

燒牛舌，另一個特色係餐廳侍應會幫係燒。雖然覺得服務週到，但係無得自己燒反而有d唔自在呀

呢個燒牛肋骨，初初幾為會好靭，點知燒左好耐都唔靭仲好有肉味！

五花肉就好軟熟，因為有人幫我地燒關係，好快就食完呢餐飯。台灣文化係唔介意係食完仲坐係度傾偈，但係我地都係食完就埋單。呢日雖然無做過d咩，但係都好攰咁，於是就返酒店早d休息，準備明日九份之旅！

返到酒店我地落左樓下既三溫暖泡溫泉，玩到成10點幾先上房呀！