大年初一 恭喜發財！！

眨下眼又一年，轉眼又送龍迎蛇了！！大年初一跟大家拜個年，祝各位蛇年事事如意，心想事成，萬事亨通，身體健康！！

初一我地通常都係來回公公家同嫲嫲家，呢日先去公公家食午飯同拜年先！EE整左新年曲奇，d花花好靚呀！！



我地經過零食物語，入去行下買下禮物，點知妹妮一手已經擸左幾包零食話想買！

上到公公屋企，𢭃今年第一堆利是，叫妹妮同人講恭賀說話，佢平時可以嘴gel gel，但係今日就嘴嘟嘟，諗極都諗唔到

媽me細個時，我地習俗係新年著新衫新鞋，咩都新架，新年係最好既藉口買野！而家大左當然無話要由頭新到腳，但有時買買埋埋未著既衫褲鞋襪就呢日攞出黎著喇。妹妮今日就有新衫近鞋著嘞！

公公呢個美腿魔師第二代好正呀！！連妹妮都話舒服，呢個真係可以按埋小腿架，上一代只可以按到下小腿咋。不過爸B就鐘意按腳底多過小腿，但係得閒按下真係爽呀！！

食飯喇，今日有髮菜食，妹妮一聽到媽me話食髮菜d頭髮會長即刻話好鐘意食髮菜，仲真係食左好多潻。我地初二去澳門玩，之前呃妹妮話唔帶佢去，等佢去EE度過夜，其實之前妹妮都應承架，仲話會執自己個黑色行李喼去。點知尋晚媽me話有套親子裝本來想今日著，但係都係留番去澳門著啦，妹妮就問點解呀？我答澳門影多D相吖嘛！妹妮居然轉數好快咁問：你帶埋我去澳門咩？？ 媽me即時扮無野：唔記得係唔去潻。妹妮就開始𠼱住話Daddy話過佢乖就可以一齊去喎。

今日又整蠱佢，如果食晒碗飯就有的去啦！妹妮好努力想食晒架

離開公公家，落樓下影下相，個傻妹無喱正經，永遠都係扮鬼扮怪！

仲要EE陪佢扮埋一份！

行行下話想‘飛飛’， 睇下爸B同姨丈個樣幾吃力！！差D稱唔起佢了


去到商場d裝飾咁靚，影下相先啦！爸B話妹妮著起件泡泡褸成個花仙子一樣，因為好似朵花一樣咁靚，妹妮不知幾受落！

同姨丈影相都識叉下腰架

停不了的古靈精怪

妹妮係車上瞓左一個鐘，下一站到嫲嫲家。一去到見到新表弟，妹妮急不及待發揮媽me本色。平時係屋企妹妮好鐘意同媽me玩role play架，不過佢扮媽me我扮囡囡。

而家見到真BB，仲唔‘玩’番夠本！但係又幾好手勢噃，好似餵得表弟好舒服咁呀

仲幫手掃埋風架，不過掃唔出之嘛！

大合照，爸B屋企係大家庭，人多勢衆呀！

今晚寫住咁多先，再祝大家 家肥屋潤 橫財就手 吉星高照! 日日笑口常開!

‘找傷姣’ ＋ 繪畫比賽 ＋ 家長日

一月中時，妹妮學校有個event，每人輪流做普通話大使，都為期成個月架！妹妮一連兩個星期二都要做大使，要早D返到學校無得搭校車架，要媽me一早車佢返學。返到學校，校門都未開我地已經見到自己班的幾個同學仔，大家都係一齊做大使呀



影番張大合照先啦！ 我比同事睇D相，個個都問點解妹妮高咁多既？我都想知呀，佢係‘細女’，但係好似大過人成級咁！

妹妮好鐘意返學，入到學校好開心架

做大使要攬番條彩帶，未做先興𡚒！

其實普通話大使就係企係門口歡迎步入校園既同學仔。。。要揮手大聲講‘找傷姣’（早上好）

雖然淨係不斷重覆講‘找傷姣’，但係你知D細路好有使命感，所以好落力架。

某個星期六下午，我地參加左聯合國兒童基金會既繪畫比賽。自從上次5月玩過一次成身發臭，都有D卻步，不過今次係冬天應該會舒服一D，所以報名去玩下囉。

點知去到比妹妮見到有畫面，佢真係畫上癮，見親都話要畫，呢日仲有3個姐姐同一時間幫佢3人6手畫面，如果換轉係3人6手按摩就正囉！！！

畫成！

經上次試過戶外畫畫，今次精喇，我地帶左地蓆去鋪黎坐，起碼坐得舒服D吖！再搵左幾個紙盒比妹妮墊住畫，有好多人都好有準備，帶晒枱櫈潻。

今次個主題係：my dream hometown。其實妹妮係屋企已經起左個稿，而且我覺得幾靚架。

現場都有好多小朋友參加，不過有見到D家長幫個細路畫埋，都唔係真正既兒童繪畫。當然都有d一睇就知係細路畫既，因為有d好細個既真係畫到鬼畫符一樣，但係佢地真係尊重個比賽噃！

呢，呢張就係妹妮自己起既稿喇，雖然9成人都畫d咁上下既野，因為聽到dream hometown我想好多人都會畫下有花花草草既城市。

現場呢張唔知點解妹妮要用淺藍色做outline，好似無咁分明，而我地無帶深色水筆，所以好似唔係好靚。不過呢日妹妮無瞓晏覺，其實都好攰無咩心機再畫，所以就交畫了

睇佢個樣已經無晒電，無法子唔交啦，再畫都唔會好好多了

將自己幅畫貼上壁布板，交畫完畢！

係附近影下相，行下先去食晚飯

任務完成妹妮興鬆晒，見到公園又去玩下先，佢而家仲可以頭掂腳架！

1月26日學校家長日呀，妹妮著得靚靚返學校

入到班房除左同老師傾下偈，就係睇下佢地平日係學校既生活。呢排做緊個以番薯為題既project，做左好多圍繞番薯既資料搜集。唔係妹妮講都唔知番薯個‘番’字係無草花頭架！妹妮仲叫我查下字典就知喇。原來佢地係學校入面都做左好多野，加深左對番薯既認識架

除左切下番薯，其中有一日仲有老師即場煮番薯天婦羅比小朋友食，而家妹妮都成日提住要食番薯天婦羅架。學校入面仲有小花園種左番薯比小朋友學下掘番薯。

又有平時做既小手工。



close up 見到妹妮果份，原來佢覺得自己係tall, nice, clever, beautiful, funny, happy, good and silly!! 又幾貼切噃！妹妮話個個同學仔都自己揀自己既形容詞架。

媽me等見老師時，妹妮就同爸B出去攤位度電，又係畫下紋身！

呢日都撞到幾個同學仔呀，一齊去左番薯田度又掘過

掘到喇！不忙大叫驚死你唔知

老師對妹妮進度好滿意，老師覺得佢好醒目易教，佢係學校都好乖，好開心，聽到都安落晒！

胃食妹見到有爆谷，幾大都換埋先走啦！

之後我地去食晏，妹妮手上既紋身係爸B畫架，又幾靚噃

以前爸B帶過妹妮黎呢間餐廳食意粉，妹妮而家仲記得！仲識帶我黎潻

大胃皇食完媽me個茄汁意粉，lam lam 脷

再食龍脷柳意粉，又白又紅兩樣食晒！