雜硼lung日記

上星期同事突然話食麥記, 原來又有嘢換. 5隻熊仔都好得意, 但總不能換晒, 以前d Hello kitty仲喺度. 今次決定只換心儀嘅Joey同阿Jan, 但Joey可能係5隻中最靚, 麥記員工話第一日就換晒, 不過佢哋好熱心, 知我哋想換就幫我哋打去第間鋪問. 最後由同事踩行油去另一間分店換到靚靚祖兒返黎. 一程車滿足晒4,5個人嘅願望, 抵!!

第二日聽到yayaGigi 問妹妮'where are Spencer and Maggie?' 細問下原來佢幫兩隻熊仔改咗名...阿Jan變咗Spencer, 祖兒變咗Maggie. 其實個名無咩原因, 只因為有本書入面隻熊個叫呢個名咁啫.

前日收到喺Candice度領養隻兔仔, 當然唔係真兔仔啦, 係佢手做嘅兔仔頸鍊, 實物同相一樣, 好可愛呢..

今日返到屋企, yayaGigi話啱啱帶咗妹妮落會所個遊戲室玩. 前兩日都已經落過去, 妹妮仲識咗兩個新朋友仔. 其中一個仲幾靚女潻. 妹妮對兩個姐姐都好熱情, 隔日無見都會上前hug hug, 睇吓,妹妮隻手仔拖住靚姐姐架.

兩個姐姐都係兩歲大,已經返緊學了. 所以都識同其他小朋友相處. 我睇書話一歲嘅小朋友只會同其他小朋友坐埋一齊但只會獨自玩,因為暫時佢哋只可以顧到自己顧唔到其他人. 要大d先可以同其他人有interaction. 所以妹妮都係自己同自己玩, 行來行去, 不過都唔擔心佢第時返學會驚或怕醜了.

而家已經行得好好,唔駛再舉高雙手平衡了.

由於d相由yayagigi影, 所以質數係無咁好架喇, 睇住先啦.