媽me去上海

8/29日陪妹妮返完學同食完晏，就到媽me去上學了，無飛成大半年，下半年既training又開始，黎緊差不多每個月要飛上海一次。其實公司個training center係上海既最外圍邊皮，已經屬於蘇州範圍了。所以無上海市咁多夜生活，通常都係放學去食餐飯就算。

下午5：00機，落到機去到酒店都成9點了！好彩今次有同事一齊去，無咁悶可以一齊出街食下飯。我地去左宵夜，食呢D小龍蝦都唔係好貴架咋 。



今個trip三日兩夜，尋晚返到酒店上床瞓都已經12點，點知妹妮晨早6：30就tango叫醒我！好眼瞓哦 不過今次training好在係酒店搞，落樓下上堂超方便！！而且有wifi，隨時可以同妹妮傾偈。



8點3先施施然落樓下食早餐，9點去上堂。其實自助早餐雖然有好多野食，但係又唔係樣樣都咁想食



9點開波，其實training 內容都係自己睇書都得，不過D公司梗係要搞D training先至安樂。上到黎基本上係全國既同學都有，所以traininig都係講國語架，媽me只係聽得懂，講就麻麻地，叫做溝通到囉。



好彩每個零鐘有 tea  break，有d snack食下用來止眼瞓！



上埋聽日堂，我地放學就即去機場，所以今晚係唯一可以出去食餐好小小既。我地去左附近新開商場既'豆撈坊‘，聽講差不多全中國都有分店呀，呢入面裝修都幾光鮮乾淨，係食一人一鍋打邊爐既。



一卷卷果D係羊肉，好彩唔’蘇‘， 碟肥牛好靚，但都要成＄170碟，本地人究竟係咪咁多咁有＄呢？ 



不過服務就好體貼了，除左手機有套外，人都每人派條圍裙架

呢個芋頭沙冰好重芋頭味，＄12/杯



手打麵都係十零蚊，埋單我地3個人都成四百幾蚊，真係唔知有幾多本地人會食？



個新商場入面有Gymboree呀！每次EE出trip去美國都會買d Gymboree比妹妮架，呢度有鋪梗係入去逛下啦！D衫件件都好靚呀！！



估唔到去到咁山卡隙都比我買到野！！



商場入面D boutique都唔差架，望落好似Juicy D display咁，唔係同男同事一齊我一早就入去逛喇！不過出左血比妹妮，自己唔買了 



之後我地去左德國啤酒吧飲野，呢度都有菲律賓人唱歌 佢地仲識講國語潻！ 最搞笑係個歌手叫埋廚師上台唱，而個廚師又唱得好enjoy，一D都無扭拎！



德團啤，幾好飲噃！



今朝醒喇，叫妹妮7：30先好打黎，當佢係wake up call!!

大懞媽me居然係最後一早，準備執行李先見到妹妮畫比我既畫呀！真係好sweet呀



last day再重覆食早餐，上堂，食lunch，tea break。四點鐘準時落堂去機場，成功standby 到6：30機，原來上海去香港D飛機好似澳門船一樣咁密，半個鐘一班架！未上機去飲杯野，點了特色奶茶，原來特色奶茶係兩個英早茶＋一個earl grey，飲落成杯好立克味一樣架。