関西復活遊 ＠雄琴溫泉篇

其實係溫泉旅館我地都影左好多相，如果就咁攝埋入遊記好似嘥左D，所以專登分開一篇，可以pose多D相吖嘛！！今次來関西本來打算去有馬果邊d溫泉，但係考慮到我地行程想去京都，而且日子又唔係多，後來搵到京都呢頭都有溫泉區架，就係雄琴溫泉，呢區都有幾間溫泉酒店架，而且個JR站直程叫做おごと温泉駅。應該唔只得兩, 三間溫泉酒店咁簡單呱。我地住呢間叫雄山莊。

從JR京都站我地要搭湖西線去雄琴溫泉站，呢日著完和服行左成日清水去都行到腳仔軟，希望浸下溫泉可以消除一下疲勞啦。大概廿分鐘JR就到溫泉站，但係原來去到雄山莊係行唔到既，我地搭的士算了。。。呢日係我地去日本咁多次以黎第二次搭的士，而家640円起錶，其實同十幾年前差唔多。跳左兩，三次錶已經到達雄出莊了。入到大堂都覺得呢間溫泉旅館幾大規模

嘩！間房好大好舒服呀！！我地住呢間房叫「星のしずく（露天風呂付）」
有私人風呂架，趁而家妹妮仲細個，我地仲可以成家人一齊浸下，再大個D就唔得喇，到時唔駛book有私家風呂了。

除左覺得間房好靚好舒服外，仲遠晀市景，又有露台行出去，爸B話應該住兩晚潻！

呢個就係琵琶湖了，但下面可能係個鎮仔，我地無車所以都無出去呀。

個私家風呂就細d, 但係有景睇感覺都幾正架！不過個缸再大D就好了

浸完又唞完，7：00 我地落去食晚飯。我以為係飯堂大廳食飯，原來每間房有自己既房食飯架，又幾好噃！

入到黎已經擺好晒頭盤了，我地不忘影相啦

印象中溫泉晚餐都有好多野食，呢晚我地個餐就有魚生，火煱，燒牛扒

另外仲幫妹妮點左個兒童餐，過往住溫泉酒店，我地通常都無點兒童餐比妹妮架，佢食我地D餸咋，因為白飯任裝嘛。妹妮個餐有佢最鐘意既香腸，仲有漢堡扒，栗米湯，薯蓉，沙律，布甸，食得晒都幾飽架

我地既主菜係呢幾舊近江牛，真係好正！燒得熟，燒得香D反而仲香仲好食，D雪花溶晒，但係一D都唔靭，仲好有牛味架。

食飽飽我地返房了

返到上房已經鋪好晒床了,  休息一陣我地再去大浴場浸埋先，妹妮直頭當果度係泳池想游水，我地浸完室外又浸室內, 好爽呀！

個露天溫泉都幾正架，旁邊D綠葉變晒櫻花，可惜唔影得相啦！妹妮好鐘意浸溫泉架，我地浸完又沖埋涼洗埋頭先上房

雖然無咩彈力，但妹妮都當跳水咁由地板跳上被褥

第一晚又完結了，係時候覺覺豬了。

************************

雖然瞓地下，但係妹妮都瞓到大天光先醒。住溫泉酒店最唔好就係早check out，十點就要走人，所以早餐都係7，8點就要食。我地就book左7：30



晨早起身望出去，其實都幾怡神

落樓食早餐喇，呢間就係我地間房了

睇下妹妮啱啱瞓醒雙眼幾腫！

去番尋晚間包廂食飯

早飯有燒魚，蒸點其實係疏菜黎架, 個阿姐仲話d飯係用瓦煲煮, 好有特色喎, 其實係有飯焦既飯, 又幾有農村特色既。唔記得影下妹妮份餐潻！

食飽飽番房休息下，妹妮見到個茶掃想玩好耐，就沖茶飲下啦！

最後浸多次，嘆下世界先

我地都算半露天溫泉，不過天氣唔算好凍，只係涼涼地，都幾舒服架！

又係時候要收拾行裝走了

呢D就係我地尋晚食既近江牛，未聽過但真係好好味！

今次識叫酒店送我地去車站了

再向京都出發！