上星期日（7月13日），每逢星期日朝妹妮都要上游泳班，我地通常上完游水就去飲茶，呢日就約左EE去大澳。本來EE同朋友一早入左大嶼山camping，但係妹妮星期六有幾堂興趣班上所以我地只join一日。不過妹妮已經好開心！
去到東涌，已經11:15，仲要轉旅遊巴先去到大澳，呢日又星期日好多人呀！好彩不停有巴士開，我地等左一陣就上到車了。
沿途風影都好靚架，妹妮數住話經過兩個沙灘，兩個郊野公園，一個監獄
呢度d 海灘聽講水清沙幻，但平時又真係無咁有雅興走到入黎遊水了
其實妹妮上完游水班通常都要中午nap 一nap，但係呢日太興奮諗住去玩，咩眼瞓都無晒
坐左45分鐘車，終於到了！！
離遠見到EE同朋友們，尢其上次去美國識既朋友仔Audrey都係美國返左黎，所以妹妮特別興𡚒！其實之前妹妮一直倒數住Audrey 幾時返黎，果日仲叫我去湊放學等去可以即刻同Audrey玩添
嘩，呢日仲有好多朋友仔呀，妹妮同小朋友好快就混熟，都唔得自己細個時係咪咁易同人混熟架呢？
無見Audrey半年了，我想妹妮都好掛住個朋友仔，平時間中都聽到佢提起Audrey, 又話好想快d 見到佢咁
已經成點了，d船家猛話就黎潮退就睇唔到海豚，我地一行成16日，差唔多包船咁滯！
未食晏又未有耐有得食，等船之際去買左串大魚蛋，但係咁大粒始終都無細細粒一人拮一粒咁正。妹妮自己食晒成串，但聽聞同長洲果d 有得揮一樣咁好味
呢幅相影得妹妮靚女左呀
終於上船了
首先兜一轉大澳最出名既棚屋，全部都係水中建成架，所以有東方威尼斯之稱 。但係一上船就開始落雨了，都算好彩叫有瓦遮頭咋
其實d棚屋真係幾有特色架，有d就比較似普通漁村屋企，但有d就較有風格
呢條橋就係主要過河既通道了。對上一次黎大澳大概三年前了，還記得當時有朋友從美國來港，我地一家同EE，舅父一齊做嚮導。當時妹妮得3歲幾，仲去埋大佛寺添
d 雨開始大，但呢排都係過雲雨，灑一陣就停
出到海無見到海豚蹤影，但係就見到好多魚仔成群跳上黎，相既左下就見到喇。有好多堆魚仔從不同方向跳來跳去，可惜唔係海豚呢
無海豚唯有影下自己啦
難得上船一刻停雨兼有太陽，我地即刻行上去大澳酒店
之前都見過朋友facebook pose 過呢間酒店，都好靚架，終於有機會黎見識下
趁好天嗱嗱聲行上酒店了
聽聞酒店係由前警局改建而成，我好喜歡呢d 新舊mix既建築。好似上海好多地方都保留舊殻，入面重新裝修，好似新天地咁，令個地方多一點地道特色
一上了酒店又開始落雨，我地入左呢間係遊客都入得既訪客室，入面仲有個以前既拘留室比訪客參觀
成班細路入晒拘留室扮被拘留
好彩有呢個地方比我地避下雨咋！場雨落左成半個鐘都有
終於等到停雨，嗱嗱聲行返去市入面食晏呀
除左Audrey同妹妮，Lia差唔多年紀（大妹妮兩年）所以都玩埋一堆。其實同行仲有幾個大d既哥哥姐姐，但係呢三位就最投契，可能身型都差唔多呢
沿途經過紅樹林，好多小生物係呢度生活架
Audrey做咩？個表情咁古怪既？
經過紅樹林之後開始入到城了，雖然落完雨但係天氣好熱呀！
係路邊買左益力多冰，其實係將支益力多雪到冰咁，不過咁熱既天氣又真係幾正！終於坐低食晏了！！
啱啱先食完晏，見到牛肉乾有人又心思思想食
妹妮平時對陌生人仍然好怕醜，但係一講到試食佢就一d都唔驚，會好大膽走去問人可唔可以試下呀？去到一田超市有好多試食，佢真係檔檔都試勻架！呢日又好大膽向叔叔攞試食，其實我都鼓勵佢去問人攞希望可以練大個膽，通常都會遠觀，等d叔叔同姨姨唔好見細路仔就reject，不過暫時都見好多叔叔姨姨都好慷慨比sample既
成功！！
對上一次黎大澳都有成3, 4年前了，今次行既地方雖然同上次差唔多，但係都有d新景點
見個背景幾靚，叫佢地擺甫士影相，即時士王上身
呢間士多都算夠騎呢了
但係引左唔小人圍觀呢
行行下到另一條橋，係跨過兩岸既橋
好有漁村風味呀！
下午水退，河道淺左好多
呢個係個影相勝地呀，好多遊客都係呢度影相
突然間又好大雨，我地要走避到詹蓬下避左一陣雨至再行得
又熱又濕，不過細路們都無投訢，仲好開心！！
於是我地多去食豆腐花解下熱
食完豆腐花又黎試食 －＿＿－"
再食埋大澳出名既炭燒雞蛋仔，呢個旅程係食食食之下完結
同妹妮搭番巴士出東涌，一上車就瞓著了！！
返到市區，爸b來接我地又去晚餐，一日之內都食左好多野呀！簡直係食之旅
No comments:
Post a Comment