8月11日，一早我地又去Deli食早餐，呢度d野食唔算貴，都係900円一個set，有日式
有西式，有兒童餐
仲有沙律, bagel 等可以散買，個早餐都算幾豐富架
今日出發去美之海水族館，車程差不多成個鐘。兩個女仔係車上面玩'黑白'，好彩Cherly無嫌悶仲啱玩
沿住58號公路，一直都係沿海行，我地見到靚小小就停低影幾張相。呢日又係勁曬！
海邊都有好多人玩浮潛架
無耐就去到水族館了！！
門外有呢d消暑既水霧，行埋去又的確幾涼快架！
去到門口一定要影團體相啦！點解諗唔起叫人揸機呢？？自拍時因太曬，都睇唔到個mon自己係邊，所以影完先知影唔到條鯨鯊！
呢幅影到鯨鯊又影唔自己，但係佢地話出面太熱已經唔想再影，只想嗱嗱聲入去水族館
妹妮有張個人照真係好！
一入到去就係摸海星先，唔似海洋公園得一個小範圍可以摸，呢度成個缸任你摸，摸完仲有洗手區
沿路落都有魚缸可以睇魚，妹妮仲專登坐到好似美人魚一樣添 -_-
剛剛有個劇場準備開場，我地入左個theatre 入面，點知原來個銀幕拉開時係大玻璃，見到好大條魔鬼魚游過呀！
突然仲有架巴士咁大既鯨鯊駛過！！鯨鯊就係呢間水族館最出名既魚呀，大家即時狂影相。睇完小劇場介紹呢個水族館，又繼續行
呢度比海洋公園多好多魚，就算唔係睇大缸都有好多小魚缸裝住不同品種既魚
呢條八爪魚標本都夠勁，圖畫顯示，呢條八爪魚足夠能力去纏死條鯨鯊架！
呢幅相係去過沖繩都會影既，就係大銀幕魚缸入面既鯨鯊同超大魔鬼魚！
呢度總共有三條鯨鯊，簡直係水族館既靈魂，因為好大條，游過來一刻真係震撼架！
不忘搵佢做背景影下相！幾條鯨鯊都好識做，成日游向遊客果邊比人影相架
呢條水底通道都可以望到好多魚呀
我地淨係買左水族館門票，出到去一望無際景觀真係好靚，聽聞附近既沙灘都水清沙幼呀
出到黎我地就去食晏，因為下午仲另有節目
去食buffet，但係食物選擇就好小，不過都係千零円一位。但係6人枱等好耐，我地要分4人，2人坐
食飽後係水族館門口有個繩網樂園，兩個女仔又走去放電！
其實碌落黎，又或者當滑梯sir落黎都得架，但係妹妮行落黎，睇佢就跌就跌咁
個公園真係好大架 ，唔只一邊，仲伸延到另一邊添，要追住佢地都好難架
玩到咁上下要上車去另一個目的地了，但係開車無耐開始落雨了，仲愈落愈大！！仲行雷添。。。真係晴天霹歷呀！因為我地book左dolphin school同海豚玩架 >_<
去到時雨好大，雖然有關單位叫我地繼續玩，但係又大雨又行雷，點玩水上活動呀？其他日本人居然仍然唔怕危險繼續玩喎，呢個旅行既最要環節就咁取消了，聽日有時間又好天可能再來過啦
呢頭無咩shopping mall，落咁大雨唔知去邊好，Danny叔叔提議去美國村，因為有瓦遮頭可以行下街
大概40分鐘左右就到了，見到摩天輪就知係美國村了
其實落左一個鐘頭雨就停，如果早一個鐘落雨就好啦！我地去左starbucks 食左小小下午茶。。。其實都唔知點解食左兩次starbucks，平時去日本都唔會食鬼佬野既，今次食左兩次
無得同海豚玩，Cherly同妹妮仲有我都好失望呀！
黎到呢度點都要坐下摩天輪啦，叫做景點嘛！
平時去日本都常見市內有摩天輪，好似大阪又有，札榥，橫濱都有，但係我地都無坐過。不過今日無左玩海豚真係好掃慶，摩天輪都殺啦！
上到頂原來都幾高，可能呢度d建築物都好矮，更顯得一望無際！
除左望到成個美國村，都望到大部份讀谷地區了
上到最高時我地又見到Cheryl一家，於是又互相影下全家幅
妹妮同爸B平時無無聊聊都可以玩到𠵱嘩鬼叫！
一個圈大約坐左廿分鐘，其實都算幾relax，可以睇下風景，唔錯架！
一出摩天輪呢層就係機鋪，好似冒險樂園咁
Danny叔叔介紹佢地玩打鼓機，好似以前跳舞機一樣跟住拍子見到圓圈就打落去！
開頭妹妮都打唔正，但一陣就上手了，打機真係最易訓練到人既！
之前睇過旅遊書介紹美國村都係話買美國野，但係我地就無多睇了，因為已經黃昏了
雖然無逛鋪頭，但係街上都幾靚，慢慢逛下都幾舒服架
我地行向海灘方向，呢度好多美國野，連red lobster都有，但係我係美國都無食過red lobster，無理由係呢度食呱
行出小小就係海灘了
呢兩張相係Janus EE影既，真係好有feel呀
睇左一陣，無玩過沙就去食飯了！
因為開始天黑，又唔想周圍搵，我地食左求先經過間沖繩料理。基本上沖繩去到到都係食呢d 海葡萄，花生豆腐，苦瓜炒蛋等，魚生其實又唔係好靚, 不過都有叫，再加d拉麵，pizza都好飽了！
夜晚既摩天輪另有一個臉貌
回程只花30分鐘就到，我地先發現原來酒店附近有條好多餐廳既街呀！可惜第二日已經離開了。返到酒店試下之前買既花生豆腐，如果好味可以買返香港食，雖然味度都似，但小左陣花生味呀！
呢晚妹妮又可以浸浴，用盡呢個大浴缸！
No comments:
Post a Comment