We love October 我們的生日禮物 Burger～King！

10月19日 呢日我地約左EE食晏，順便去探下貓。EE買左隻新貓成兩個幾月我地都未有去玩過，呢日妹妮第一次見！係捲耳貓黎架，而家半歲大

暑假時妹妮同朋友仔去EE屋企玩，嘈到嚇親隻大貓，搞到成日呢埋。妹彩呢日得妹妮一個，細貓都無咁驚！

成個月前我地去左整陶瓷，妹妮畫左隻碟，我就畫左隻杯

呢隻就係上次比幾個女仔嚇到縮埋既大貓'金水'了，妹妮改佢個名做'Kitty'。呢日出奇地肯比爸B抱抱

平時好cool架，呢日變左乖乖。EE話佢同BB新貓成日玩打架，可能唔鐘意有新朋友加入屋企呀

所以妹妮主要同小貓玩多，而且小貓效爛玩

4點鐘，到我地去迎接新家庭成員了！！！好興奮又期待呀！！話說自從大肥都走埋後，其實都有諗過再買貓，但係妹妮話怕會傷心。佢好唔捨得大肥，瞓覺時傾心事都有話過以後唔再養貓了，因為怕佢地會死，會好傷心。其間不時都有show d 貓仔相比妹妮睇，佢猛話好得意呀！！但到我問佢不如買返黎養吖，妹妮就話： 如果佢唔會死我就養佢啦！可想而知大肥既死對佢心靈都有d影響。小肥死果陣佢仲細，淨係知道佢去左天堂，但對死無咩認識。

話說回來，因為有客人買左隻小貓但係唔可以養，於是就讓左比我，當然知道我係貓癡又想買返隻貓啦，本來佢介紹我買同一胎另一隻貓貓，但係我地諗左好耐都唔下決定。點知有呢個offer，諗左一陣就要了。其實因為只有一個quota，初初想要隻大肥一樣既異國短毛，仲想要雙色。但係呢隻係長毛而且係黑色，但係既然係有人送既，就當我地有緣，係天腸的禮物！

因為仲未夠3個月大，我地去breeder度湊佢。見到好多靚貓呀！！

相信妹妮未試過被咁多隻貓圍住佢，而家抱住呢隻就係我地既喇！

好似已經完全忘記傷痛，當妹妮知道有新貓咪時，問我佢幾歲架？我話3個月大咋！妹妮即時計數話：咁養到我二十歲都仲得！好野！！大學畢業都仲養到呀。

妹妮好鐘意小貓呀，佢叫做Burger！因為breeder係美國貓會登記個名叫做Prince Bulgari，所以簡稱佢Burger, 我地又覺得同大肥（bigmac）個名好襯，於是決定keep呢個名。妹妮開頭話想叫佢做honey sweet, 又話：吓？男仔黎？我想要女仔噃 -_-

Burger 呢一胎有4隻小貓，呢幅就係佢同爸媽既全家幅，Burger排尾3, 大家姐係三色，紅白仔係第二，Burger係老三，黑白係細妹。當初我就係睇中左紅白二哥架，不過已經比人訂左了。

妹妮同其他貓B影相

呢隻紅白仔都好得意架

返屋企時，我地叮囑妹妮要好好對待Burger呀，因為Burger離開爸爸媽媽同兄弟姊妹黎我地屋企，以後都見唔返家人喇！妹妮聽到眼濕濕，真係好鬼眼淺架唧！

Burger二個月廿八日大，重3磅12安。因為仲係BB所以好貪玩

玩到喘氣呀！！

妹妮就多左個玩伴，成日要抱住佢當B urger係公仔咁

我們的生日禮物呀！！

其實Burger唔係咁大隻，但係影相就好大舊咁，size同EE仔半歲捲耳貓差不多

可能黎到新環境又玩左咁耐，攰到瞓著左呀

再買左新玩具比佢，貪玩仔真係玩極唔厭，以前都有買過呢個玩具比大，小肥，但係佢地都唔玩，反而Burger勁鐘意玩！ 

爸B都好鐘意Burger架，其實Yaya初初知道再有貓好似有d擔心咁，驚好多功夫做呱？

但係Burger同yaya 相處一日，yaya就鐘意左佢，因為Burger成日跟出跟入，又阻住佢做家務，yaya話好似妹妮細個時咁。相信Burger比佢重拾妹妮細個得意既時光，所以好快yaya就成日問住我Burger呢？想搵佢玩

貓扒一塊

佢都幾鐘意自己個新竇架

yaya好快就做左個枕頭比Burger, 可見yaya有幾錫Burger！

Burger每晚都同妹妮say goodnight架，妹妮當左Burger係細佬呀

一日就夾住佢唔放

已經兩個星期，Burger好似大隻左了，而家大概17"長

妹妮超鐘意Burger哄住佢

而家Burger係我家寵兒，yaya仲話佢係King，正一 Burger King咁話！