年三十，旅程最後一日了，好彩有late check out。本來呢日有幾個目的地想去，淡水啦，中正紀念堂啦，但係兩處都算幾遠。不過最後都係近近地行左去101附近既國父紀念館，本來想去埋文創區，但係因為年三十其實好多商鋪都關門了，連文創區同中正紀念堂都無開。
沿途行去信義區，其實話近唔近都行左成廿分鐘！好彩離遠見到101我地影下相無咁覺得行得耐
妹妮真係好鐘意擺甫士架，幫佢影相真係好好玩，因為佢有無限甫士任你影
再行到了國父紀念館了，仍然係同地標影下相。十一年前我地影婚紗相時都仲未有呢座野
扮下野牚住佢，hehe
呢日無特別要去既行程所以好迆（hea）
爸B都忍唔住要陪我地癲
台灣都有櫻花架，但係紅色偏深，個人認為無日本果d淡淡粉紅咁靚
不過見到櫻花都影一餐啦！
呢次真係到國父紀念館了，可惜呢日年三十無開，連換兵儀式都無得睇
唯有係門外影相叫到此一遊啦
之後去逛下街買下手信算了
去到台灣點可唔去誠品呢，呢座仲要成座都係誠品，一定要去廟聖下
妹妮去左兒童書度睇書，我都買左旅遊書準備遲d巴黎之旅
樓下花店既擺設都插得好靚，心想影低佢返香港都可以參考下點插
就係咁迤下都搞到中午了，想搵晏食都難，因為好多鋪頭都無開，所以成日都聽人講過年去台灣無野玩，因為好多鋪都關門。其實作為本地人既話反而咁先有過年氣紛，因為過年就係留係屋企，或者去人地屋企拜年。細個時週圍都關門，連茶餐廳都關，反而有d街邊檔可以掃下街仲正。而家香港過年已經好似平日一樣，反而覺得無左過年氣紛。
雖然行左好多路但係妹妮似乎都幾enjoy
我地搵到間連鎖店，食牛肉麵同排骨麵，今次都無食過皮蛋豆腐，見到一於要試
簡單既午餐但係都幾好味呀！其實食完先一點鐘，但係我地4點先check out。早知一早去遠d去淡水，可能更可以kill time!
台北的內街
於是我地去左咖啡弄，因為附近已經無咩好行，又可以坐下。香港既咖啡弄係𠾼仔至愛，成日要排上一個鐘頭隊至有得食，係台灣食咖啡弄當然唔駛排隊啦
當食飯後甜品啦
我叫了圓肉紅棗茶同個waffle幾分食。其實個waffle好實，好多粉唔鬆脆，但係食完好飽肚
食飽飽返左酒店休息一陣我地就離開台北了，希望下次唔駛再隔十年才再來啦
No comments:
Post a Comment