放假前

4月19日, 學校有個活動要家長參與, 每位家長要擇日輪流到學校講故事比小朋友聽. 今次輪到我了, 十一時入到學校, 見到妹妮同同學仔正係花園放電, 玩下滑梯咁...應該係小息時候了. 去校務處登記後去課室門口等, 離遠見到群鴨仔跟住老師行過黎, 後面fing緊手個個就係妹妮了

成班鴨仔好乖咁跟住老師, 一路唱歌一路行返課室

行到課室門口, 妹妮見到我喇, 佢好大聲叫'媽me!!' 又見到我拎住本書, 即刻大聲叫'臭屁呀', 因為本書叫賣香屁呀.

入到課室見到同學仔好自律咁自己去拎膠墊放係地面墊住坐, 大家都知係story time, 真係有d驚訝原來呢班小人仔都幾叻噃. 我入課室時, 老師叫同學們拍手歡迎我, 大家就好乖咁拍手. 睇見個個都好開心咁呀, 可能小朋友好鐘意聽故仔? 又可能好開心有客人探訪? 一路講故仔時大家都好留心, 又有笑容, 到講完後問佢地鐘唔鐘意個故仔, 大家都齊聲話鐘意呀! 見到佢地咁開心, 都想下次再黎講故仔架. 之後我離開班房等妹妮, 佢仲老積咁同我講 : 你係度等我一陣啦, ok?  

平時妹妮坐校車, 一放學就要排隊走人, 今日湊放學, 見妹妮話想同同學仔再玩下滑梯, 當然比佢玩一陣啦

同同學仔幾friend! 一齊拖住手sir滑梯架

妹妮都話佢特別鐘意同幾個同學仔玩架, 見佢地都有溝通, 互相講野架!

 一路坐車返屋企途中, 妹妮猛話今日個故仔好好聽呀, 我諗因為自己媽咪講, 佢特別開心啦

星期四, 又係復活節假前最後一日返學了, 學校有生日會. 其實每兩個月一次, 不過妹妮班係細仔班, 所以都無人生日, 只係當復活節party算了. 而每次party都係每人自備食物, 及著自己衫. 於是摷番呢件公主裙比妹妮著

佢著起好開心呀, 當正真係公主咁呀!! 仲摷番以前買落d紗裙, 其他而家都仲啱著架!

但係yayaGigi一早幫妹妮換好衫時已經將d紗裙當頭箍戴黎影相

難得妹妮不知幾enjoy, 仲擺晒甫士任影唔嬲

校車到了, 妹妮一上車攬實袋食物呀, 同學仔d腸仔同棉花糖就靠你帶返去喇! 放學時, yaya同爸b問今日有無人讚佢靚呀, 佢話有呀!!