4月5日清明節假期, 早幾個星期前我地已經去拜山了, 今日得閒就join埋EE同舅父佢地一齊去大嶼山交遊. 咁有癮去大嶼山其中一個原因係有朋自遠方來, 舅父個老外朋友Chava從三藩市來, 我地以前去親SF都有一齊出黎食飯, 今次佢遠道而來, 就掹車邊一盡地主之宜去下郊外, 體驗一下休閒既香港
第一站係昂平360, 我地大約十一點幾到車站, 雖然好多人, 但係條龍去得好快. 妹妮見有popcorn又話要食, 都好既, 等佢排隊時可以消磨下時間嘛
我地無帶b車呀, 所以都預左佢扭抱抱, 不過揹好似慳力d
而家妹妮已經成40磅, 連咁大隻既舅父都嫌佢重呀
一路排隊時妹妮都間中要抱抱, 後來我地見到有個告示牌寫住No Climbing, 而個圖案係一個人攬起單腳爬過欄杆, 我地就呃妹妮個sign係 No Carrying! 唔準抱抱!! 最搞笑係妹妮一直半信半疑, 成日望住個告示牌, 好似唔信咁, 但係又就範唔駛抱!
條隊一路行, 好快就上到纜車了, 但係妹妮對海洋公園個纜車印象深刻, 成日以為我地係去海洋公園!
我地6大一小都霸唔晒一架車呀, 有一pair男女搭枱. 記唔記得妹妮細細個時yayaGigi教過妹妮用spanish數1至10呀? 太耐無練習了, Chava想同妹妮用數下妹妮都唔記得晒了.
妹妮有得坐纜車都幾興奮, 佢又唔怕高, 周圍望
睇到機場同好多飛機呀
雖然都唔係第一次搭, 不過個個都好似遊客一樣博命影相
成程車大約廿分鐘, 就見到大佛同昂平市集了
落車喇!
又係呢d呃遊客相呀, 不過又影得幾靚, 於是EE買左一張比Chava留念
我地對上一次黎呢度係4,5年前生日, 我同爸b兩個黎, 都未有妹妮呀, 而家已經咁大個!
呢個市集其實都係遊客區無咩睇, 主要都係通去大佛啫
不過景色唔錯, 又有許願樹
除左鐘意人抱抱外, 每逢有兩個人拖住佢就要玩飛飛 -__-" 就算你唔同佢飛, 佢都成個人墜晒落地, 雙腳凌空咁
玩完再玩!
妹妮表情多多, 連姨丈幫佢影相都申晒脷
妹妮咁大個女第一次入寺院呀, 見到d大香同Chava一樣覺得咁新鮮
原來最大呢d香要成$680三枝架, 真係唔平架!
入到廟入面有四大天王, 妹妮見到d神像問點解佢地咁angry? 因為d神像d眼都係瞪大望住你咁!
當舅父德同Chava不斷影相同參觀既同時, 我地就蛇去餐廳開餐, 食番個山水豆腐花, 同斎點心
妹妮開頭唔肯食豆腐花, 點知試左一啖之後知好食就食晒半碗!
朋友同舅父繼續牚上大佛, 我地幾個懶人就留守花園, 順便比妹妮瞓餐飽. 可能妹妮真係好攰, 奶都未飲完就瞓著左. 今日無帶b車, 如果而家唔瞓, 真係唔知點瞓呀, 好彩咁都眠到成個鐘!
覺豬完連頭髮都亂晒, 我地再同舅父會合, 佢地都應該參觀完大佛了.
Chava : did you have good sleep?
妹妮 : yes
下一站係大澳! 我已經N年無來過了, 記得留學時, 每次返香港都會跟媽咪同佢一班好友去一趟大澳食下斎架. 不過都已成往事了, 今次再同妹妮同爸b黎, 有d桃花依舊, 人面全非既感覺, 地方一樣, 人物已經唔同晒了.
以前都無心機睇呢d海味, 而家就要買黎食
懶豬又要抱抱, 爸b索性比佢騎膊馬
今日假期好多人, 好迫, 好彩跟於迫過橋啫
以前呢度無橋就用艇仔橫渡過河架
過橋後, 雖然已經3點幾4點, 其實我地仲未食晏架, 我地搵要晏食, 路邊好多小食攤檔, 好野味呀
仲有而家好小見到既炸蘿蔔絲同炸蕃薯呀
不過要去餐廳開大餐, 所以忍口唔食街邊零食囉
飽飽後搭快艇出海睇中華白海豚, 今次第一次, 但姨丈話之前搭過真係見到有白海豚遊過架. 而且呢d快艇都係$20/位, 當遊下船河囉
今日有纜車搭又有船搭, 最開心應該係妹妮了
出發了, 好興奮呀, 雖然船程大概20-25分鐘, 不過同船有個哥哥話啱啱行山時望出個海真係有好多白海豚架. 一開船首先係附近兜一轉參觀下大澳出名既棚屋, 全部都係用石同木搭高. 兜一轉就出海睇海豚了, 我地兜了十分鐘, 一隻都唔見呀!
無耐就返上岸了, 再去行下市集, 原來大澳都有咁多鷄泡魚
再行入村觀光下, 難得妹妮行咁多路呀, 其實佢間中就話要抱抱架喇, 不過我地又指住d牌話no carrying, 佢又奈唔何咋!
真係攰了, 我係指爸b呀, 抱到攰了, 妹妮為左有人抱, 姨丈抱抱都肯!!
又到EE轉流分擔妹妮重量, 行行下又買個茶粿食下.
行前D係紅樹林, 開始有D矮樹, 仲有隻龍舟潻!
木棉樹一樣咁靚! 原來之前係日本影左一棵光禿禿的樹就係木棉樹了
不經不覺玩到黃昏了, 買埋海味就走人, 經過呢D小食檔終於忍唔住要買了. 今日由朝玩到晚都算盡興而歸了. 相信妹妮同Chava今次都玩得好開心啦. 如果今次無搞手, 相信我地三口都唔會咁有心黎大澳行呀, 所以都多得Chava訪港呀
No comments:
Post a Comment