我愛十月 之 十。一 anniversary

話咁快又到十月了，又係我地這一家既喜慶月，因為我地成家都今個月生日架，連yayaGigi，貓貓大肥都係。仲有EE同姑丈都係十月之星。仲有我地結婚週年都係！

十月第一擊就正係爸B媽me既週年紀念。。。又係國慶，梗係順便睇埋煙花啦！

個日條頸梗晒，要叫妹妮幫手揼幾下，佢仲好乖走去攞支安美露幫我擦潻！！雖然無咩力又按唔啱位，不過都係個句，誠意搭夠，已經好冧了。



因為封路關係我地無揸車，而且仲行路去尖沙咀！好彩天氣開始涼，慢慢行行得好舒服。不過驚歎妹妮而家都好似我地咁可以行咁多路，行到成廿分鐘。記得半年前佢都仲未行到咁多路，行一陣頂多5分鐘就話好攰要抱抱，要坐BB車，而家行到咁多路，真係大個女了！



無晒車車呀，佢又整古做怪喇



古靈精怪！



終於話攰想抱抱了，馬騮爬樹一樣，不過行左咁多路都已經好叻了。



好啦，爸B出手啦！



近幾個月開始妹妮見到鏡頭開始會笑同做表情，我記得上年12月同朋友仔gathering時，大妹妮3個月既朋友仔已經識對鏡頭笑同做晒動作，不過妹妮當時仲係阿貓叫狗，好似撞聾一樣叫極都唔應。所以雖然妹妮咁大隻，但係有某方面都係較遲熟既。



呢晚好涼爽，好舒服呀！最鐘意呢種天氣，最愛十月！



臨出門口，佢擸左隻BB公仔，而家又拎出黎話佢抱住BB， 爸B抱住佢。



到喇！每年都係黎呢間餐廳，因為呢度唔會好似其他有煙花影既餐廳因節日加價之餘仲有得睇埋煙花！我地好似自妹妮出細後每年都係黎呢度慶祝架。



影番張全家幅先！自從有妹妮後我地每年慶祝都係3人行，唔知第時妹妮大個左會唔會約d friend去街撇低我地呢？



個包大到好似切蛋糕咁



每次見到呢個洋蔥包都食到停唔到口！但係食得多又食唔落正餐了 




妹妮以前多數陪坐，而家都會食下我地D大人野，食下沙律，飲下龍蝦湯咁



放煙花了！其實都有諗過落街睇，不過聽隔離枱講連落街食煙都唔比（可能係無位企呱？)，都係留番係度好D。



今年有‘中國一一’ 字樣，我地因為坐側邊，只係睇到中國咋！



妹妮一歲時都有張相係咁企左係梳化上面睇煙花架



睇睇下都有人幫我地影相呀



妹妮錫錫媽me，好sweet呀



又冧住爸B, 不過爸B仲冧！



我地叫兩個set，filet mignon加巨型帶子



爸B就叫左porter house steak加 crab cake，再加埋兩碟side dishes。可能食得太多麵包，又睇埋煙花，都飽左一半，美食當前都食唔落了。。。我地只係据左小小扒就食唔落了。加上食到成十點鐘妹妮開始叫返屋企，於是就埋單了。

可能每年都黎，餐廳服務又提升左，其實book位時都無特別講明係週年紀念架，不過佢地都有為我地印個menu，同送個甜品。仲寄左祝賀卡同martini卡比我地換酒飲，雖然咁小意思，不過都覺得好細心，唔知出年仲會唔會黎呢？


同個甜品一齊影番張相先！


返屋企時道路啱啱解封，我地上的士時妹妮爆左句：唉，好彩有的士啫！

返到屋企見到yayaGigi又為我地買左花同做左心意卡呀！



佢每年都有買花比我同做呢張心意卡架！年年都係貼滿妹妮既相架，每年妹妮都有份參與潻！以前妹妮細就填下顏色



而家識寫下字了



餐廳幫我地影既，見証住我地同妹妮一齊長大