開心迎聖誕

彌左成兩個星期先得閒同妹妮整埋D波波，終於叫畫左5個，妹妮話左3個！下排果個女仔係佢自畫象，不過眼，口，鼻就由我加，其餘都係妹妮畫架！



每個波都有兩面可以畫，其實係成個波都可以畫。右下果個我畫左大肥（我地隻貓）上去。妹妮就鐘意畫下心心，禮物呢D簡單野



真係好比心機畫架！

close up下個妹妮個自畫象先，佢一定要長髮既。個公仔仲畫到好大，一個正面睇唔晒要睇埋底先得。佢設計埋條裙同著靴架。閃粉就由媽me幫手加既



諗唔到畫咩就寫下名囉

另一個我都係畫妹妮架，佢話想揸住本書，我見佢一邊畫一邊哼歌就畫佢唱緊歌啦！總算完成了，出年再攞番出黎睇，可能妹妮都覺得自己D畫好搞笑！



妹妮學校返埋18號就放聖誕假了，又係時候開party，我見妹妮呢排返學都有好多goodies攞番黎，於是又買左D零食趁開party分比同學仔啦

因為已臨近聖誕，好多靚既聖誕膠袋都買晒，得番呢D簿既hello kitty袋，不過唔緊要啦，最緊要有得食啫。



仲印左Aerin個嘜頭上去架！前排妹妮寫聖誕咭比同學仔，佢話D同學見到D聖誕咭一定好開心定嘞！



無特登去買聖誕衫比妹妮著去party，不過有個聖誕頭篐都幾有聖誕氣紛吖！

每次學校開party我地都要自備食物架，今次整左雞尾腸仔。但係妹妮返黎話有4個同學帶腸仔呀，有幾個同學帶雞翼，有人帶生果。仲有同學帶串燒，拮住棉花糖，腸仔，菠蘿，妹妮話佢食左4串呀！！﹣＿＿﹣



聖誕前夕，仲收到好友從美國寄來的聖誕咭，妹妮硬要幫我影相呀



佢仲要讀晒幾個名出黎，又問點解BB同媽咪唔似外國人既？？