新年雜記

妹妮學校年廿六已經搞新年party，大家著華服返學開party! 佢地開party咁開心，媽me呢日車妹妮返學。呢件唐裝著左成3年了！居然仲啱著， 我見仲啱著而且一年一著所以今年無買新唐裝呀。



返到學校全部同學仔都著晒唐裝衫，幾得意架！一埋位就玩下玩具先

好奇怪，平時見佢地男仔女仔都幾friend, 但呢日d男仔又會自成一角

見到妹妮同同學仔相處得咁開心，都覺得有d安慰

每逢開party都要我地各自準備食物，成班有30人即係有30份食物，真係唔知食唔食得晒呢？妹妮放學時話好似buffet枱咁自己出去任攞，想食咩就攞咩。直情食buffet一樣，因為有意粉，腸仔，生果，雞翼，啫厘，生日蛋糕

去接放學，平時搭校車無得留低係playground玩，有媽me接就可以玩一陣。呢日好多平時搭校車既同學仔都由媽咪接走，可以影下相潻！

星期5 （年廿八），帶埋yaya同妹妮一齊去行下年宵市場，呢日天氣開始轉涼，行行下仲有微微雨潻，於是走去小食亭買d熱la la 魚蛋燒賣食下

妹妮都幾鐘意食燒賣，平時都係食飲茶燒賣多，呢D魚肉燒賣只係間中有機會試

有檔大專學生自家設計立體揮春，仲主動借比妹妮影相潻！D設計同做工都幾靚呀，不過我地無買呀

妹妮想買氣球多D

因為上晝黎，乾貨檔都係開左一半左右咋。不過我地志在買花，去睇濕貨，妹妮都好鐘意花，盤盤都話靚！

呢D串串金佢未見過，猛話好得意，但係見媽me行左咁多個圈咩都無買就開始唔耐煩了。仲話：你淨係睇都唔買既！ （唔駛＄咩？黎呢度就係睇多幾檔，睇啱先買吖嘛！）

最後買左火百合同一盤蝴蝶蘭，妹妮見到買到野開心晒！仲要幫手拎，不過面容好攰，問佢係咪買風車呀？即刻成個精神番晒，一支箭跑去睇風車

本來有一檔風車賣成＄38/個又唔係好靚，叫妹妮再睇多幾檔先啦，點知見到有一檔＄5/個咋！！即買啦，話比妹妮知點解求先睇咁耐？就係睇多幾檔，就知貨品種類，價錢都有唔同架！

去餐廳食晏，妹妮次次都會用墊枱紙畫畫，今次佢設計在自己既boutique, 無啦啦仲將D字卷頭卷尾潻， 佢仲畫在do假人掛衫，估唔到平時原來見見埋埋，佢都幾留意身邊事物噃。最搞笑係6 Dollars dress shop，佢仲話cheap is good。希望佢第時係咁諗啦！

係屋企，幫手貼埋揮春潻！

大吉大利係上畫班時整架，佢自己話要貼係門口

年廿九，幫手封埋利是潻

仲話要封利是比D窮人，幫下人咁話

好有心機架，不過慢吞吞，笨手笨腳囉！