團年飯

一年容易又過了，每年年尾都覺得時間真係過得好快！

好番晒的妹妮又變返之前般百厭

＋古靈精怪

胃口都返晒黎。weekend去飲茶，未行到茶樓妹妮已認得，問佢我地去邊呀？佢識答‘飲茶’。仲一坐低就話i want to eat something, i want to eat congee。成個叉燒包食得晒。

呢排成日整埋呢Ｄ怪樣

上星期yayaGigi又幫妹妮理髪，我自己覺得呢Ｄ齊蔭椰殼頭好得意。

成日落大雨，去完飲茶返屋企覺豬豬，下晝三點三無野做又無野玩，問妹妮食唔食tea，即時話yes。除左手指餅仔，仲沖左杯熱朱古力飲，又係比佢掃清！

星期日已經食第一輪團年飯，去到嫲嫲屋企樓下見有超市順便買埋拜年手信，行過曲奇餅，我見排得咁宏偉便攞相機，點知比promotor阿姐叫佢扮官恩娜嗱住鑵餅影相。

一次過買晒新年要買的，唔駛煩。

去到嫲嫲屋企食飯，今餐妹妮好好胃口，當魚翅係noodle食，當海參係啫喱，食左成大半碗。

咪跳呀！！食完飯走去跳跳跳，捉都捉唔住

第日要返學所以要早Ｄ走，同表弟bye bye時居然拍拍人地個頭，扮大家姐！

雖然已經９點起行返歸，不過上到床都近十點，第朝妹妮居然懶床唔願起身！平時妹妮好準時７點鐘就自己醒，你想佢再瞓都難，今朝yayaGigi叫妹妮起身時居然話I want to sleep I want to sleep就令轉面再瞓，搞到校車到我地先怱怱忙忙跑落街。

今日下晝返art mania班，yayaGigi話妹妮好興奮，見到班房就話要入去玩。而家妹妮已經可以講番比我地知佢做過Ｄ咩，好似今日問佢上art class，佢話i use yellow，painting。問佢yayaGigi有無一齊去呀？佢答no，yaya stay outside。

夜晚去第二輪團年飯，今年公公book左去酒樓食。今日妹妮返art班時已經唔肯除帽，到夜晚食飯都仲戴住-__-"

去親酒樓一定要睇魚魚

仲成日要摵咪me或yayaGigi手踭，而且摵得好肉緊，但爸Ｂ手踭就一Ｄ都唔賞臉。呢個怪辟連學校老師都知，仲笑佢如果返全日班要喺學校瞓晏覺就無yaya's elbow摵喇。但妹妮卻話‘all the kids no elbow，Aerin have elbow’，真係吹漲！

ＥＥ揤揤

食到半路又要睇魚魚

同公公影相，唔知點解又突個大肚dum出黎，經過呢個weekend加兩餐團年飯吹谷，妹妮好似已經漲番晒喇。