芝麻街LIVE SHOW

你睇妹妮咁風騷就知有節目啦！我地去睇芝麻街騷呀！兩個幾月前已經買定飛架喇，差Ｄ都唔記得左要去呀。今日撞正學校去旅行，去太空館呀。平時學校去旅行都係朝早去，今次居然下晝去，我地無法參與了。

個騷係灣仔演藝學院上影，但爸Ｂ話今星期五會大塞車所以居然大熱天時都搭地鐵去灣仔！我地行到去演藝都謝晒了。妹妮就好開心，因為有人抱＋有Elmo呀！佢一Ｄ都唔覺得攰架。

入場坐低，妹妮知道下低個stage會有big bird 同Elmo出現，仲聽到講播話個騷三分鐘後會開始，即刻乖乖坐好！

開場喇！！妹妮坐係位都有大聲叫hello Elmo呀！

Ｄ公仔望落去都幾靚呀，好快就好多隻monster都出晒場。今日個主題係‘我的志願’，於是我問妹妮大個想做咩？佢居然大聲叫 : big bird! I want to be a pilot!! 佢諗住big bird會聽到呀，所以嗌得好大聲，連附近Ｄ人都望過黎。

個騷好似歌舞劇一樣，我都懷疑妹妮究竟明幾多，不過佢又真係好似明明地咁噃！

除左會拍手之外，又會加把口

問佢個故仔Ｄ野佢都答得到架，仲追問番點解佢地會瞓晒覺呀？

中場１５分鐘休息，我地出去行下。除左有騷睇仲有counter賣野掠番Ｄ家長一筆！！妹妮左手擸左隻公仔，右手擸把風扇仔。問佢鐘意邊樣佢揀左bert，其實有最後一隻ernie（我覺得靚Ｄ）但係可能佢鐘意黃色所以揀左bert囉。唔只ernie賣晒，原來elmo，big bird上星期已經賣晒了，今日好多野都斷貨潻！做細路仔生意真係易呀。

不過妹妮真係好鐘意隻bert咁，佢一直拎住無放手呀，屎坑三日香嘛！

兩part每場４５分鐘既show就係咁完了，我覺得雖然短一點，不過比細路仔睇就差唔多，否則佢地都唔耐煩。今日有都好多小朋友黎睇架！

散場時妹妮都有Ｄ呆呆地了，不過返到屋企仲可以話番比yayaGigi知佢去左睇Elmo騷，又ＢＢ吧吧講故仔，但係衰爸Ｂ居然話下次等我同妹妮兩個去睇，佢係出面等我地喎！