3Y10M

又一個月了，妹妮46個月大喇！！好快就四歲女，真係唔捨得佢大得咁快，BB時每一刻都好似昨日發生一樣

呢個月最大躍進係戒奶樽，而家都仲有飲兩餐奶，不過就改用杯飲。其實我自己覺得用奶樽飲奶都唔係大問題，妹妮以前每晚都瞓係度飲完餐奶，成個大BB一樣，而家無呢支歌仔唱了。

除左戒奶樽外，妹妮仲開始要被逼戒晏覺呀！因為9月開始妹妮升上K2，但係學校K2只有下午班，所有直升學生都要返下晝。於是要妹妮開始適應無晏覺下午，講真我覺得幾殘忍，人地日日有晏覺休息嘛，而且小朋友晏覺豬係例牌動作嘛！加上小朋友瞓多D有足夠精神好好多，奈何學校係咁都無計。而家每晚比妹妮早一個鐘上床囉。。。因為佢無論幾點上床第朝都係6點半醒架。而家多數7點半要佢入房瞓，通常8點前可以入睡。。。都瞓到10至11個鐘既。

但係一到星期日, 我又忍唔住陪佢晏覺豬，尋日就瞓成兩個幾鐘喇！你睇佢幾攰。最近妹妮晒黑左，佢一直都最鐘意白雪公主，有日佢話Jasmine (阿拉丁個公主）好黑。

我話 ：你而家都好黑喎

咁妹妮就死死地氣話 ： 咁我扮住Jasmine先啦。

我問 ： 咁時扮番白雪公主呀？

妹妮話 : when winter comes (會變番白吖嘛！）

至於食野，而家早餐唔飲奶，改食cereal，有時會食下芝腿治。午餐晚餐都係食飯/麵，飲湯。午睡，同夜覺都會奶240ml奶。最近同食日本野，佢都多左野食，因為除左不嬲最愛既三文魚子加飯外，連tempura，以前唔肯食既燉蛋都肯食。

更何況雪糕，雪條，有日仲食埋榴槤雪糕！！！我聞到陣未都頂唔順，佢試食完都仲話要食，仲食晒成杯！

上星期去修甲，見妹妮又放假於是帶埋佢去啦。對上一次都己經係聖誕節了，妹妮有時見到我D指甲都會話next time I ask 姐姐 to paint XXX color for me。好彩佢又唔恨整，又唔會螺住去。

姐姐仲拎左成本貼紙任佢揀，妹妮揭完後居然唔揀公主揀Kitty!

近排妹妮唔只鐘意黃色同綠色，仲一輪咀噏埋橙色，紫色同粉紅色。叫佢只可以揀一隻色佢都話要晒5隻色。去到理甲店當然都要求塗晒5隻色啦！

仲揀埋邊隻手指塗咩色潻！

好colorful呀！！不過又幾靚噃！好鐘意呢D有酒笠既手仔。

每隻再加kitty貼紙，好cutie呀！！！

豬手仔

妹妮好開心，不斷話要比呢個比個個睇佢d靚指甲！

某個星期日我地去溜冰，今次係第二次試，輪到爸B同佢踩

無踩成幾個月了，唔知妹妮記唔記得點溜冰呢？

爸B當然無咁好心機逗住妹妮溜冰啦，成日自己行左去前面叫妹妮跟住佢

但係妹妮先第二次玩，基本向前行都難，邊有咁叻啫，最驚係嚇怕左佢以後唔敢玩咋。

好彩玩完後問佢下次再玩好嗎佢都一口答好咋！！