妹妮與朋友仔

一個月前妹妮話返學校無朋友仔，只有Ryan同佢玩，功課叫佢畫個朋友仔出黎，佢即時畫左Ryan，仲好鬼似潻呀（見下圖Ryan真身），留意妹妮仲幫‘自己’加番兩條辮，等佢自己可以長頭髮！ 不過而家返屋企已經聽佢講多左好多朋友了，除左Ryan仲有Julian, 同Derrek，佢話成日四個一齊玩喎，佢每次講起Derrek仲特別開心。

有件事覺得個畫面好搞笑，但係其實唔應該笑既。。。話說有一日我同爸B係屋企等妹妮去完playroom返黎屋企。聽到樓下有細路聲我地望落樓，果然見到妹妮呀。點知呢個鳥瞰式既情影出現 ： 妹妮狀似叉住腰咁雙手向後，上身傾前向對面馬路既朋友仔大叫：我都唔鐘意同你地玩呀，全部呀！ 然後即時雙手蹺埋個頭另向另一邊。之後可能D朋友仔已經入𨋢見無人啋佢就另番個頭向馬路。當時我覺得個場面好搞笑，不過爸B話妹妮咁惡係好唔啱架。妹妮返到黎我地梗係問佢做咩啦。佢話朋友仔Jana同Isabell話佢曳曳，但佢都無曳喎。Yaya就話佢地係playroom玩玩下可能閙交妹妮已經蹺住手走埋一邊，人地tum佢佢都唔啋人在先。一輪輔導之後。。。

第二朝我地問妹妮放學仲去唔去playroom呀？佢話 : yes yes...（一秒之後）NO NO
我話朋友仔成日都會閙交架，不過you don't remember it overnight。妹妮卻話 ：but I still remember  （真係吹漲！）
你係會記得，不過唔好記住咪得囉！
之後Yaya話如果Derrek唔同你玩會點呀？ 妹妮話：會say sorry，再叫佢一齊玩啦！
於是佢終於明白講和呢個道理，話會同Jana 同Isabell 講 sorry. 

後來下午放學Yaya話妹妮好識do係D好適當既時候走埋去同人地和好，好快又一齊玩過！


呢個女隻腳唔知係咪有牙架！著左對鞋都唔夠一年就踢到爛晒，仲甩晒皮！都唔知佢點著？！見到咁就算啱著都換過對比佢啦。呢對鞋仔好靚架，我地舊年7月去北海道旅行時買架，一口氣買兩對，呢對已經係第二對了。香港都唔見D咁靚既款。。。於是有日因為要用sogo coupon去sogo換左對黑鞋比佢，個樣係鈍D不過勝在個鞋底好軟，妹妮話著左好舒服。第一次試著時仲話自己係著左高踭鞋潻。



以前妹妮都係廳張畫畫枱做功課，不過爸B話唔夠‘正經’， 於是搬番入書枱做啦



又好似係專心D咁噃！