年初二 澳門吃喝之旅

今個假期我地無旅行去，所以短短地去兩日澳門玩下。年初二，我地一早搭左10：30船過大海！ 



本來想去大家樂食埋個早餐先，點知餐廳逼到爆一個位都無，唯有買上船食。妹妮對上一次係兩歲時去澳門，闊別3年了，佢去澳門已經無印象，但係知道媽me前果排間中要去澳門返工囉。一早起身見到已執好行李但又無佢自己平時去旅行霸住個黑色喼，就以為無佢份，問點解唔執佢個黑色喼呀？後來知道有份去好開心到飛起！

一早已打電話去book左新葡京個自助餐，但係要去比錢落訂先hold實個位。於是去到碼頭索性上左葡京巴士，一到步妹妮就猛話澳門好靚呀，舊葡京仲靚過新葡京喎，連上shuttle bus送張財神都話要帶番屋企貼門口！

老實講，平時間中都去下澳門，無細心留意原來街道D街燈同地磚其實真係幾靚。街燈都掛住兩盤花，地磚又砌晒花，而且保留左好多舊建築，真係另有一番風情，比起香港一味拆晒D舊野，起晒摩天大廈，澳門真係靚好多

呢日都未算多人，我地都仲好自如咁行得到，未至於好逼。因為之後一日係巴士上見到呢度逼到行唔到

黎到議事亭點都要影番幾張相留念下

行下行下去到福隆街，其實之前都係跟同事黎過一次咁大把，我地唔係好熟地頭架咋。知道呢頭有野食，順便又影下相

求其入左一間食下翅，呢間好似係前年同同事黎玩時食過架，不過印象模糊，唔記得好唔好味了 

妹妮淨係飲羅漢冬瓜水

＄75 紅燒翅，似街邊碗仔翅

另一煲係雞湯翅，＄125，呢煲似樣D，有排翅同有雞。不過我自己鐘意食紅燒翅多D

呢條街週圍都有好多野食，手信賣，見到又影下相

食完翅爸B話想食蝦子麵，呢間就出名食竹昇麵。排晒隊架！仲有告示註明初二要加二呀

都排左成15分鐘先入到去架

不過D麵真係好正呀，好彈牙，爸B話豬手好好味，但媽me唔食既。

另外湯麵都好食，爸B鐘意蝦籽撈，但我覺得湯麵都好好味

仲有炸雲吞呀，好鬆化，有D似蛋散質地。

食飽飽差唔多兩點, 我地去check in。今次住十六蒲，因為好遲先book，氹仔d酒店都爆滿，加上同事住過都話好又方便，試下啦。妹妮話呢間酒店好靚喎！

而家叫妹妮揸機都好定了，影5張只有1張cut左爸B個頭，其他都清楚見到晒我地個樣同身

上到去酒店又話原來3點先可以check in，我地又食過，去左附近間義順食燉奶。

妹妮最近鐘意飲椰汁，所以叫椰汁鮮奶。媽me同爸B叫左雙皮奶同疆汁燉奶

又返去酒店check in，叫妹妮同桃花影相，佢即時擺晒甫士

上到房喇，間房無威尼斯人果D咁大，但係都好新淨

而且upgrade左我地去海景房

行左成朝，爸B已經開始攰了，妹妮成隻熊咁壓上面。不過話時話其實妹妮四十幾磅壓上黎又幾舒服架

妹妮仲幫爸B按摩潻呀，佢話上次去蘇梅時做spa時d姐姐都係咁樣按摩架，所以咪識同爸B按摩囉. 爸b見佢摸下摸下咁, 話幫妹妮做massage個姐姐真係爽, 一d力都唔駛出

小管家除左係屋企會幫手排好D鞋，黎到酒店都一樣要我地排得整整齊齊

瞓左一陣晏覺，係時候出動去食自助餐了，我地諗住慢慢逛下逛下行過去

自從有了自由行，香港同澳門都變得人山人海了！

無啦啦妹妮又甫士王上身！

仲要媽me陪

唔知點解佢咁鐘意擺D扭頭扭髻甫士呢？？

好鐘意呢張相呀！！妹妮叫後面既新葡京係‘獎盃’，我地就係去獎盃食buffet喇

因為新年關係，大人要＄340/位，小童都要＄31x/位。平時都係＄280/位咋，平過香港酒店既buffet好多呀，而且張buffet枱長到見唔到尾！

幾個同事都推介，試過都覺得物有所值，值得一試。



除左切切下既烤牛肉，仲有煎牛扒，D牛扒塊塊都有雪花架，一D都唔韌

妹妮就最鐘意甜品嘞

妹妮好鐘意食buffet, 知道有buffet食好開心，但食野好慢，見到鮮炸起天婦羅有蝦有冬菇, 有最近妹妮係學校食完既番薯, 剩係食tempura 蝦同番薯都食左好耐！

食到有財神出現，派朱古力金幣利是潻

爸B博命去攞生蠔，不過我覺得生蠔麻麻地

海鮮枱都有好多野食

不過妹妮鐘意魚生多D

未食完鹹已經想食甜！！自製pancake + 雪糕，睇落又幾吸引噃

見到甜品枱上樣樣都想食咁呀！

最後攞埋棉花糖潻

呢度有好多玉石雕刻同象牙雕刻擺設，呢D手工藝真係好精細呀，好難想象點樣整到出黎架呢？

回程返酒店，我地慢慢行幫助消化，對上果次妹妮得兩歲半，行得一陣就話攰要抱抱。上次無帶BB車，把一陣手都軟埋，真係行多一陣都唔想架！

而家已經好好多，行到攰都無扭抱抱，淨係嗌下攰

都捱到大三巴喇！

平時多數係影日景，呢次可以影下夜影嘞！

見到大三巴妹妮又常神番晒，仲要擺甫士影相潻

新年期間仲有花燈！

澳門隨街都有D靚景影相，但係傻妹突然聽到D車聲又話驚驚，做咩咁細膽呀？

街邊D桂同石春地好有地方特色

終於行到返酒店了

妹妮睇左一陣電視已經唔捨得熄，問佢知到係電視講咩嗎？佢就話唔知，咁睇黎做咩呀？？好彩佢算乖，睇多左一陣都係乖乖洗臉刷牙覺覺豬，聽日再玩過！