聖誕遊LA Day 3

12 月23日 (Monday)，Day 3

呢日比較無聊，都係做下正經野，處理下d重要事務。食完早餐我地一早就去左DMV續車牌，公公就續ID 卡，因為過左期無renew，所以今次仲要考埋筆試。好彩網上有晒pass paper 可以溫下書，一次過pass。但係就悶親妹妮，好彩我地一早網上預約好，因為一落車就見到條人龍，點解佢地唔預約呢？續晒牌返屋企hea 左一陣等飲茶。。。雖然我地係LA，但係生活都好港式，因為公公想約d親戚朋友見面都係飲茶多。

EE買左顏色筆比妹妮畫下野，等佢kill time，其實我地都帶左圖書黎，叫起上手可以解悶

呢個係另一個昨晚買既頭箍，襯晒佢鋼琴表演條裙呀！雖然好似'婚禮'左d, 我自己好鐘意呀。。。但係呢d大人戴唔到，係細路仔戴先好睇

索性搬去飯枱畫

尋日買左個bad head set 頭器，今日搵妹妮做白老鼠試下先！佢好鐘意卷髮架，成日恨攣攣毛毛，有得set 頭不知幾開心，仲叮囑我一月二日要幫佢set 頭，開學嘛！-_-

好喇，夠鐘出門口了，set左頭開心晒！

連擺個甫士都S左 ＾O＾

中午約左表姐飲茶，其實叫做表姐係表上表果種表姐，但係係LA既親戚唔算好多，都係公公d老表。但係當年來到LA，表姐都好幫手，幫手搵屋呀，買傢俬等。點知飲完茶妹妮又話眼瞓

而家成五十幾磅，我只可以抱到一陣架咋

表姐第一次見妹妮呀，妹妮又唔怕醜（平時對住陌生人都要warm up下) 好快就熟絡了，飲完茶我地仲去左表姐屋企坐。表姐後園有個泳池，妹妮話暑假要再黎游水喎！如果呢度唔係十幾個鐘機，我都好想暑假再黎！！

真人見到表姐見佢外表無點變，睇相就覺得老左了

之後又返屋企hea左一陣，呢日無節目難得妹妮又無投訢

今次租屋住真係無决定錯，起碼好過酒店得間房，而家成間屋又有埋花園，真係幾捨意

仲有好多檸檬樹！

妹妮摘左幾個檸檬，我仲用黎沖左檸檬茶飲！

整體呢間屋都好滿意，好乾淨又新淨

跟住再去睇下間舊屋，已經好多年無返黎了，妹妮見到間屋都話鐘意。。。佢而家鐘意住house喎！

租客啱啱搬左，而家趁有空檔所以打算執下間屋再出租

後園有棵橙樹，不過以前食過d橙唔甜架 

而家清晒間屋，因為無傢俬所以今次返黎都唔可以住入去。

呢個N年前既掛飾都仲係度呀！

妹妮似孚一d都唔覺悶，佢好似覺得去參觀下呢度d屋幾有趣咁

呢個前園以前種晒花同埋有好多天堂鳥架，但係租客又點會有心機幫你打理吖

同公公影多張相先，呢度都有不小回憶架，尢其勾起好多婆婆既回憶

妹妮話仲有幾朵靚花係度呀

其實呢d粗生粗養既小花小草望真都幾靚架！

趁公公同舅父去搞租屋手續，我地去左Baskin Robbins 食香蕉船

搞掂後再直落去趆南餐，呢間叫趆南餐館，d食物都幾好味架！

其實我地屋企附近有個商場，大概行3個街口就到，呢間去'快行'左兩個鐘。因為妹妮習慣早瞓，成日怕佢眼瞓，明天又要早起身有節目，又驚佢唔夠瞓。點知去到mall佢仲醒！

去左gymboree，好多野大減價，但係好小款有妹妮size，見到呢對貓貓鞋好鐘意。但係著上去只係剛剛好，著多個月都驚唔啱著，所以無買呀。

都係去children corner玩下，外國d mall真好，有個playground比d 父母'放細路'（好似放狗一樣）等佢地玩下。不過我都唔敢掉低佢自己玩，都係𥄫實好d，始終世上都好多捌子佬嘛，美國咁大捌左真係唔知邊度搵返呀

妹妮趆玩趆精神，要睇住佢變相我都無得行，不過呢個商場本身比較小型，唔算多想行既鋪

但係都'的'左妹妮去睇下disney store，仲諗住呢度有好多野賣，點知又唔係，本來想買個disney既木樽比妹妮返學用，居然都無

見到咁多公主衫，妹妮即時攞黎併下

最新有套Frozen公主，但係連披肩要成US199！！雖然靚，香港又未有，但真係買唔落手

最後我地都係得個行字，留返聽日去迪士尼至買啦！