聖誕遊LA day 9 Knotts Berry Farm

嗱嗱聲寫埋幾篇遊記，12月29日去左Knotts Berry Farm玩機動遊戲。其實Knotts我都係第一次去，因為唔係好'好'機動遊戲，而且真係鐘意玩既就去Magic Mountain好過啦。但係妹妮始從係香港迪士尼玩完個RC Racer 之後好似上左癮咁，猛叫住要玩過山車，去到LA Disney都嫌小兒科 -_-

Magic mountain 又太激（自己都唔敢玩），於是去Knotts唔係太刺激，應該啱我地啦！點知呢日賴醒一早9點鐘去到，原來個park 10點先開！真係吹漲！！但係門口好多同我地一樣咁on 居既人，哈哈！

好彩park出面間精品有開門，我地入去kill time，見到呢d公仔好靚呀，做得好精緻架

呢個聖誕樹掛飾好靚呀，雖然無d女仔公仔咁無媚，但係好細緻，好鐘意呀，同EE一人買左一個

原來係made in China架，中國人真係好勁，咩都做得出。

妹妮就搵野玩吓，外國人好在比較豁達，你搞搞震無幫襯都唔會歧視你

買完野再飲完咖啡，終於開門了！！

Knotts Berry Farm代表人物係Snoopy，一入到去見到Snoopy d friend即刻影相

其實都見到snoopy 架，但係排隊條龍好長所以決定玩左先！第一個係望落比較'hang can' 既過山車

就係咁無倒頭，淨係自轉打側，上斜落斜啫，接受到既 

到我地喇，妹妮玩完後話好好玩要玩多次呀！

我地當然無翻兜，因為已經開始有長龍了。去玩下另一d先啦

呢個扮輕氣球妹妮話： 都無野既，唔夠刺激 -_-

好彩呢度好多野有高度限制，唔係樣樣都有得玩架！

呢個千鞦好似無咩野，比較小心理壓力呀，就去玩啦！

點知fing到好高妹妮都打開手，望落去好似好危險咁呀，即刻叫佢扶番住啦

扶住一樣超興𡚒

仲話想玩呢個free fall，好彩佢未夠高咋！

跟住去左玩呢個revolution，妹妮叫佢做洗衣機， 就咁睇好似自轉式既海盜船，應該handle得到既。上到去初頭真係好似海盜船咁一d都唔驚，但係上到頂5, 6下差不多垂直離地咁滯，加上又自轉，又唔係fing得快，反而離心力好大好鬼驚呀！！如果fing得快可能無咁驚，直到落到海盜船高度，大概離地70度左右先至無咁驚咋！仲擔心妹妮會驚得滯，一落黎問佢點呀？佢話個心都跳得快左呀，不過好好玩。。。吓？？係咪真架？

EE話以前成日玩呢個，而家唔係好夠膽，我就啱啱驚完真係咪搞，見到d 人360度fing 左6個圈。因為高度關係妹妮未玩得！！YEAH！！

嘩！呢度有Johnny Rockets呀！上次去Old Pasadena時都有諗過食架，但係果日聖誕咩都關晒門，今日難得見到一於去食下！呢個park多野食過尋日個Sea World好多呀，除左Johnny Rockets, 仲有好多其他食店，唔似尋日淨係得hot dog stand！點知又係要等位

趁等位我地行左去影下相，睇下精品

呢度有好多Snoopy野賣，叫妹妮揀件tee，因為呢日好熱呀，加上大汗妹玩左一陣就成日濕晒，頭髮都要紥起，褲腳都摺起埋。

點知妹妮反而無揀d女仔d既圖案，而係揀左七彩！佢話鐘意七彩喎

 等左成45分鐘位終於到我地了，好彩一邊行一邊等先無咁悶咋

好耐無見過呢個menu了，真係發美國瘋呀！

叫了出名的milkshake比妹妮，朱古力+香蕉真係天作之合！

懷舊點唱機應該係呢度既signature display 

我地點左蕃薯條，點知個茄汁咁cute!  

妹妮見到好surprise，超開心！

仲有Philly Cheese steak burger

同埋mushroom burger，食晒都真係幾飽！

妹妮鐘意呢個philly cheese steak多d, 最鐘意依 cheese咁話 

食飽飽梗係再去玩過啦，就係後面呢個4人一車既過山車，呢d一d都唔恐佈架。唔記得以前d 天氣同而家係咪好唔同，但呢排都係一有太陽就熱到出汗，著短袖都得，但係只要一陰小小，無左陽光就凍到要著褸，d溫差真係好大呀，所以日日要揹任年褸等3點後著。

 

其實我唔係好驚呢種有loop既過山車，因為夠快所以其實唔會好驚，但係妹妮未夠高玩。KnottsBerryFarm 有一邊係比小朋友玩既迷你版機動遊戲，初初我地話去玩，但係妹妮居然話： 呢d咁BB！（唔係化，你都唔係好大咋噃！）不過因為妹妮生得高，有好多可能係6歲玩唔到既佢都玩到。

呢d垂直spiral既就真係見到都驚！同妹妮講唔玩得住呀，留番大個d再黎同Daddy玩啦。佢話可能到時佢已經嫌呢d BB了 －＿＿＿＿＿＿－""（滴汗"）

到我地喇！！

呢個都係算小兒科

大膽妹直情唔駛扶住呀

本來想去睇冰上劇場，EE話呢d冰上show即係平時香港賣成幾百蚊一張飛果d show，於是我地早成半個鐘去排隊。。。點知場show已截龍，而且兩個鐘後果場已經開始排緊隊，自問真係無咁好心機同神心去排成個幾鐘頭隊，去玩下好過了！ 

於是周圍逛下睇下仲有咩啱玩啦

坐下呢個礦洞火車

點知妹妮話：我估呢個唔係好好玩

我問：點解咁覺得呢？

妹妮：因為有人揸車既 （又係噃！咁都比佢留意到！！有人揸既快極有限啦，坐咁多次過山車都無人駕駛嘛，有道理！）

但係我地都坐左 ：P

跟住行左一陣呢條復古街聽下人唱歌

想去排多一樣遊戲，但條隊又要成個鐘。唯有呃妹妮走啦，好彩佢又好易tum又易呃。呢日我地又玩role play，佢成日要做家姐，我做妹妹，睇下家姐幾錫妹妹？！

 

後來無咩唔駛排。。。我地一邊行一邊睇下野啦，見到d遮又擺甫士嘞！

然後行到兒童區見呢個小型跳樓機都殺啦！

點知咪又玩得一樣咁開心！

因為約左舅父6點黎接我地，所以係時候準備離場了，再去精品店睇多次，妹妮搵到本漫畫書睇到入晒神

算叫做玩左大半日，但離開時妹妮話： 我有d嬲呀？（點解？）因為玩得咁小囉！

無計啦，有d有玩唔到，有d又大長龍，呢日的確玩左好小遊戲咋

跟住我地去左Ontario Mills 個outlet mall 諗住再戰一下，食完飯後已經8點了，點知行左半個鐘就見d鋪頭陸續關門。。。原來呢日星期日早收呀！！間間都關8:30, 平時關10點架！！早知行左先食野啦！後來唯有去附近既Walmart只下癮啦。

妹妮去玩具部執起隻BB後就當湊B咁湊。。。佢真係母愛泛灠！ 平時都成日話希望第時有一個囡囡一個囝囝架喇！睇下佢叫我"薯"既時候幾肉緊，真係嘈親個BB咩！

又用件外套綁成揹帶

真係湊BB咁架，我地行左成個鐘佢一邊湊B一邊跟住我地行，仲話好鐘意個BB，不過呢d BB公仔多數都好鬼核突，真係買唔落手呀。。。於是又係tum下佢咁就放低左！

返到屋企食埋哈蜜瓜，又係時候覺豬了！